الموضوع: مقارنه قويه بين تويوتا كرولا 2014 و رينو فلوانس 2014

المشاركة الأصلية كتبت بواسطة Meggieboy

فعلا جنط ١٧ بيدى ثبات و هاندلنج أعلى و طبعا مش بس بينزل جنط ١٧ لأ ده كمان بتنزل معاه عفشة sport tuning بس للأسف الكلام ده بيوطى العربية و بيبقى صعب قوى فى شوارع المحروسة و بيحسسك بكل النقر و المطبات فى دهرك و دماغك ده غير حك العربية من تحت فى كل مطب....أنا كمان بنصح بجنوط ١٦ لشوارع مصر

يعني عفشة اعلى فئة اللى فيها جنوط 17 تختلف عن الفئة اللى فيها 16؟؟

هو طبعا انسب حاجة 16 لبلدنا الجميلة

المشاركة الأصلية كتبت بواسطة meggieboy

لو حضرتك تقصد الفلوانس، أعلى فئة اللى هى ب 188 ألف جنط 16........
كان فيه فئتين واحدة ب 195 ألف و واحدة 199 ألف جنط 17 و عفشة رياضية بس أتغلى الحجز عليهم و أصبحت أعلى فئة اللى ب188 ألف و دى جنطها 16 مع عفشة عادية مناسبة جدا لطرق مصر و رائعة فى أمتصاص المطبات

على موقع رينو مصر اعلي فئة فيها جنط 17 وبصراحة شكلها جميل الـ16 شكلها وحش جدا جدا

المشاركة الأصلية كتبت بواسطة Meggieboy

على فكرة أنا مش متحامل و لا حاجة....طبعا أكيد أنا بحب الرينو و كل ما هو أوروبى و لكن بمنتهى الأمانة لو الفولكس مكنش نزل بفتيس DSG أنا كنت أكيد هجيب باسات أو جيتا و لو كان الأوكتافيا برده نزلت من غير نفس الفتيس كنت برده هجيب واحدة بالتأكيد...

أنا بحب جدا أتناقش مع الناس اللى بتفهم و حضرتك واحد منهم و أرجو أنك متكنش مضايق من النقاش...أنا هدفى الأول أنى أقتنع أكثر بقرارى و لو كان غلط أعدله و كمان أستفاد من النقاش الموضوعى مع حضرتك و كل اللى بيقرا هذا النقاش يستفاد أو على الأقل يمكن يطلع بمعلومة جديدة تكون خافية عنه....أرجو أنى مكنش بثقل عليك

أنا هجاوبك على نقطك بس صدقنى للأستفادة و ليس للتعصب للرينو
1-انا شايف ان مناسب ليا 2 ار باج ﻷني بركبها لوحدى و لو كنت محتاج اكتر كنت اخترت الهاي لاين فيها 7 ايرباج مش 4 .
1-أحنا طبعا بنقارن فى نفس الشريحة السعرية لأن فيه فرق حوالى 18 ألف و ده مش قليل لو طلعت للهاى لاين، و بنفس المنطق ممكن نطلب أسبيشيال أوردر فى الفلوانس و ندفع و نجيبها ب ESC لأنها بتنزل بيه بره....و بنفس المنطق برده هأقول أنا مش باخد أبدا ملفات على العاصى و بقدر مقدار ثبات عربيتى و بسوقها طبقا لهذا المنطلق....يعنى حضرتك لو النيسان تيدا و لا الهيونداى ألنترا مع كامل إحترامى و لكنه واقع.. نزلوا ب VSC هل كده الدنيا بقت تمام و تقدر تعيش حياتك على سرعة فوق 100....و تاخد مناورات و ملفات...أبسلوتلى مش ممكن...الألنترا لسه زى ما هيه هتعوم من ورا و التيدا هتبقى مراجيح.....
شوف ملاك الفنتازيا و الجيتا و الباسات و الأوروبى عامة....هل عمر حد منهم فرق معاه و لا طلب زيادة فى الثبات و المناورة على سرعة....إستحالة....حضرتك العربيات دى صخرة على الطريق بفضل الثبات المدروس و ديناميكية الهوا و توزيع مركز الثقل و الأحمال فى الملفات....نزودلها VSC و ماله مش عيب و يبقى أحسن و أحسن و لكن العربية فى حد ذاتها ملهاش حل و بتديك الثقة فى المناورة و هو ده السبب الأساسى اللى بيخلى راكبى هذه السيارات بعد ركوبها مينزلوش منها مهما قلتلهم أن المنافس بقى بيقول بابا و ماما...إستحالة اللى ذاق ثبات الأوروبى يقنع بأى شىء أخر

2.لو حضرتك ركزت في ديزاين مساند الرأس هتلاقيه ممتاز في حالة الحوادث من حيث امتصاص الصدمة و هو ده الهدف منها انها تمتص الصدمة عشان لو مش موجودة ممكن يحصل كسر في الرقبة ، و ليس اهميتها انها تبقي لازقة فيا.
2-هقول زى حضرتك معترض جدا جدا....كل شىء بيتطور....العربيات زمان مكنش فيها مساند راس و بعدين حطينا فيها مساند....طيب لما ترجع ظهر الكرسى....أيه أخبار المسند من رأس حضرتك....بعيد للدرجه أنه مع التصادم الشديد رأسك هتطير لقدام و بعدين ترجع مسافة طويلة للخلف و ده اللى بيسبب ضرر للعمود الفقرى و كسر الرقبة....لاحظ أن أسمه مسند رأس...طيب أزاى و هو مش ساند...و ده سبب تطويره من 2 حركات فقط لفوق و تحت أصبح أربع حركات فوق و تحت و أمام و خلف علشان دايما يبقى أقرب شى للرأس و يقلل مشوار أهتزاز الراس و بالتالى حماية العمود الفقرى و كسر الراس من سرعة الرده للخلف و بعد المسافة....

3.الاضائية ممتازة في العربية ومش محتاجة زينون و انا عن نفسي ركبت في الموديل اللي قبلو علي سبيل الدلع في التوكيل زينون ثلجى ممتاز واطى بس لان العالي ممكن يعمي اللي قدامي و يسبب حوادث و كان ب 1200 جنيه بس.
هرد على حضرتك بنفس ردى المتحامل قبل كده :) :)....طيب مثبات الفلوانس حلو و مش محتاج VSC ;) :).....الزينون طبعا سواقة تانية خالص لو كان الBOsch الأصلى اللى نازل مع العربية و خصوصا لواحد زى حضرتك بيسافر كتير....متعملش زى و تقول الVSC مش مهم :) :)

4.نظام الاضاءة النهارية led بيقلل من احتمالية الحوادث نهارا.
مظبوط تمام و ده برده موجود فى الفلوانس و كل العربيات الجديدة اللى هتنزل أوروبا (طبقا لمواصفات الأمان الأوروبية) و فى أوروبا لازم تشغله بالأمر....بس السؤال هل عدم وجوده يخليك تغير قرار شرائك للعربية....أكيد لأ

أنا مثلا و للأمانة كان نفسى الفلوانس تنزل بزجاج فوميه بدل أو مع الستائر الخلفية و لكن مش دايما بناخد كل اللى عايزينه....

هقول حاجة من عشمى و متزعلش منى و لا ملاك الكورولا يزعلوا من فضلكم....أنا سقت عربيات كتير قوى الفترة اللى فاتت فى مصر و أوروبا، و بمنتهى الصراحة الكورولا طول عمرها كانت من السيارات الغير ثابتة على السرعات و الكلام ده بمنتهى الأمانة ما عدا موديل 2005 يمكن شوية....على عكس الأوروبى....
السؤال أيه أخبار موديل 2014 لسه مش عارف و لكن التاريخ بيقول أن الثبات مكنش من أولويات الكورولا مقارنة بثبات الأوروبى....محتاج أتأكد من الملاك و خصوصا راكبى الأوروبى اللى أشتروا الكرولا الجديدة....ما هى المقارنة؟ بالنسبة لى هو ده القرار الوحيد المؤثر فى الشراء....عربية أصلها ثابت و عفشتها ثابتة و الهوا مش بيلعب بيها على الطريق...النقل لما بيعدى جنبى و أنا بطلع منه العربية مش بترقص....لو المواضيع دى كلها ظبطت....يبقى برافو كورولا تفوقتى على نفسك و قدرتى تتفوقى فى هذا الموديل

مرة أخرى بشكر حضرتك جدا على هذا النقاش و بحترم جدا وجهة نظرك و أرجو أنى مكنش ضايقتك بنقاشى و لكن قلما الواحد بيلاقى حد فاهم يتناقش معه.....ألف مبروك أختيارك الجيد و ربنا يوفقك و يحفظك من شر الطريق...تقبل تحياتى

الكلام كله زي الفل.

انا مش قادر اصدق ان اصلا في مقارنة بعربية مبالغ جدا في سعرها (مقارنة بالاوبشنز اللي فيها) لدرجة انها بقى سعرها زي الاوروبي (اوكتافيا مثلا) ومصاريف صيانتها (زي المرسيدس)؟؟؟؟!!!!!!

هو في كده،
وهو معقول اني احاول اقنع نفسي وابحث عن حجج ومبررات من هنا وهناك علشان اثبت ان الكورولا تستاهل السعر ده وتكلفة قطع الغيار دي؟؟؟؟

انا أكيد مش بفكر بالطريقة دي، وفي نفس الوقت انا مش ضد الكورولا، بس متهيألي ان كل هذه المجادلة والنقاش سيزول لصالح الكورولا لو ان سعرها نزل 20 او 25 الف وكمان سعر قطع الغيار يبقى في نفس رينج باقي الياباني زي المازدا والهوندا واللانسر..... لكن تقول لي فانوس ب 5225 علشان العربية مش منتشرة ولما تبقى تنتشر ان شاء الله نبقى نراجع اسعار قطع الغيار!!!!!!

ده على اساس اني بشتري توك توك تايواني مثلا من شارع الجمهورية والمستورد لسه بيجرب السوق!!!

للأسف، سوء إدارة وفكر تسويقي سيؤدي حتما لخلل في سوق الكورولا

فلوانس تكسب يا بتوع المدارس يا متعلمين

وشكرا

المشاركة الأصلية كتبت بواسطة psycholain

محتاج اصحح لحضرتك بعض المعلومات الى حضرتك قولتها للمتعلمين بتوع المدارس:
1.انا عاوز حضرتك تصدق ان فعلا فيه مقارنة لأن العربية مش مبالغ في سعرها زى ما بتقول بالنسبة للاوبشنز
http://www.nilemotors.net/Nile/380276-2014.html
2.سعرها مش زى الاوروبي خالص و جبت مثال بالاوكتافيا فحبيت اقولك سعر الهاي لاين كورولا 210 و سعر هاي لاين اوكتافيا 275 يعني فرق 65 الف تشتري بيهم عربيةفيرنا كسر زيرو ولو هنتكلم بلغة حضرتك (مقارنة بالاوبشنز) الكورولا كمالياتها اعلي وممكن تتأكد بنفسك في اللنك ده
http://www.nilemotors.net/Nile/380381-2014-2014-a.html
http://www.nilemotors.net/Nile/374651-2014.html
3.حضرتك قلت مصاريف صيانتها زي المرسيدس و الله لوهي زى المرسيدس في مصاريف الصيانة انا يزيد اقتناعي لان المرسيدس معروفة ان مصاريف صيانتها قليلة جدا و اللي يعرف الكلام ده الناس اللي راكبينها.
علي العموم جدول الصيانة و اسعار قطع الغيار معايا و مقارنة بالكورى مش هقولك الهوندا مثلا لا الهيونداي و الشفروليه ارخص.
4. اه الكورولا تستاهل السعر ده مقارنة بسعر العربيات دلوقتي و اديك شوية امثلة يمكن تكون مش متابع الاسعار الجديدة:
شيفروليه كروز 160
فورد فوكس 210
جولف 255
جيتا 245
سيفيك 215
النترا 180
كارينز 220
سيراتو 199
5. انا مش عارف سعر الفانوس ده جبتو منين بصراحة؟؟ انا رحت ابورواش و سئلتهم قالولي لسة معندناش ستوك هنقولك السعر ازاي !!!
وقالي ان الدفعة اللي هتوصل قبل العيد هيجي فيها الستوك الاول و هنبقي نحدد السعر .
وقالي كمان مستحيل السعر اللي بتقولو ده لانه مبالغ فيه.
انا برضو مسكتش و كلمت فرع العباسية و كام موزع معتمد كلهم اكدولي ان لسة مجاش هنحدد سعره علي اساس ايييه؟؟
وبعدين انا معايا موديل 2011 و اسعار قطع الغيار بدون مبالغة ارخص من الشيفروليه و من الهيونداي و لو حايب اكتبلك سعر كام قطعة ممكن اكتبهم لحضرتك و للسادة الافاضل المتعلمين بتوع المدارس اللي حضرتك نوهت عنهم.
تقبلو تحياتي

والله انا ماكانش قصدي استفزك ب إفييه "بتوع المدارس المتعلمين" أنا مش عارف انت خدت الموضوع على صدرك أكنه شتيمه لا سمح الله... فين حس الفكاهة يا سيد؟ :)

انا بالفعل متابع اغلب اللينكات اللي انت اشرت ليها، والغريبة انها بتأكد وجهة نظري واللي هي واضح انها عكس وجهة نظرك!!!!

الموضوع مطروح للناس لتعم الفائدة للقرار المناسب لاحتياجات كل شخص مقارنة بالماديات مش لإثبات مين البريمو.

الخلاصة بعد مراجعة كل اللينكات....
الكورولا سعرها مبالغ فيه... اوكتافيا A7 ب220 الف
ق. الغيار: الاسعار المذكورة في الينكات (اللي انت اشرت ليها) اسعار التوكيل والواضح انها فعلا أغلى من المرسيدس (مش تريقة) ,, على فكرة ق. الغيار دي اسعارها من التوكيل في التجمع. اكيد ما هياش افتكاسات يعني

وسيبك من جدول الصيانات، ركز في اسعار ق. الغيار (يعني مثلا برابريز، فانوس، رفرف، تيل... ) مش زيت وفلتر وبس

على فكرة يا رجالة... انا خلصت في آخر حتة فلوانس (موكا) من محمد زكي. تسليم فوري.
ومبدئيا لغاية لما التقرير يجهز....
انا اكتشفت ان فيها Xenon Auto Adjust اول لما بتدور العربية تروح مظبطة ارتفاع وزوايا الزينون اوتوماتيك (زي بالظبط الرسيدس C 240 )

المشاركة الأصلية كتبت بواسطة fdroubi

والله انا ماكانش قصدي استفزك ب إفييه "بتوع المدارس المتعلمين" أنا مش عارف انت خدت الموضوع على صدرك أكنه شتيمه لا سمح الله... فين حس الفكاهة يا سيد؟ :)

انا بالفعل متابع اغلب اللينكات اللي انت اشرت ليها، والغريبة انها بتأكد وجهة نظري واللي هي واضح انها عكس وجهة نظرك!!!!

الموضوع مطروح للناس لتعم الفائدة للقرار المناسب لاحتياجات كل شخص مقارنة بالماديات مش لإثبات مين البريمو.

الخلاصة بعد مراجعة كل اللينكات....
الكورولا سعرها مبالغ فيه... اوكتافيا a7 ب220 الف
ق. الغيار: الاسعار المذكورة في الينكات (اللي انت اشرت ليها) اسعار التوكيل والواضح انها فعلا أغلى من المرسيدس (مش تريقة) ,, على فكرة ق. الغيار دي اسعارها من التوكيل في التجمع. اكيد ما هياش افتكاسات يعني

وسيبك من جدول الصيانات، ركز في اسعار ق. الغيار (يعني مثلا برابريز، فانوس، رفرف، تيل... ) مش زيت وفلتر وبس

على فكرة يا رجالة... انا خلصت في آخر حتة فلوانس (موكا) من محمد زكي. تسليم فوري.
ومبدئيا لغاية لما التقرير يجهز....
انا اكتشفت ان فيها xenon auto adjust اول لما بتدور العربية تروح مظبطة ارتفاع وزوايا الزينون اوتوماتيك (زي بالظبط الرسيدس c 240 )

الف مليون مبروك و ربنا يديك خيرها و يكفيك شرها-اللون الموكا جميل و ساحر جدا
جبت انهي فئه؟