طريقة فك سربنتينة السخن دايو لانوس...بالتفاصيل والصور والشرح

**مصطفى-حسن** · 13-11-2013 11:06 PM

السلام عليكم ورحمة الله
الشتا داخل علينا وهنبدأ نحتاج التكييف السخن
وفية ناس التكييف السخن شغال عندها تمام فمش هيحتاجو الموضوع دة
وفية ناس السخن عندها ملغى
والسبب غالبا ان بيكون فية تسريب مية جوة العربية فى الدواسة
تروح للميكانيكى عشان يصلحلك العيب
فالميكانيكى يستسهل ويروح قايلك كلمتة المشهورة :
الغى السخن ياباشا ملوش لازمة

وطبعا الميكانيكى بيقول كدة من باب الاستهال لا اكثر
لان السربنتينة مكانها مزنوق ومقرف شوية

والحقيقة هيا ملهاش لزمة فى فصل الصيف فقط
لكن اول ما الشتا يدخل هتحتاجها ضرورى جدا
والا هتضحى بميزة كويسة الشركة عاملها فى العربية وهتلجأ للطرق البدائية للتدفئة فى الشتا

تقفل الازاز ولو الجو كتم فى الصالون تنزل الازاز حاجات بسيطة ويجيلك سرسوب هوا سقع من برة دة غير الدوشة اللى بيعملها فتحة الازاز 2 او 3 سم عشان النفس

وبكدة بقيت زيك زى العربيات موديلات السبعينات فى طريقة التعامل مع الجو الساقع فى فصل الشتا

وطبعا دة مش حل

الحل انك تفك السربنتينة بتاعة السخن وتطلعها وتشوف اية اللى فيها وتصلحها وتركبها تانى
ودة اللى هنعملة دلوقتى خطوة خطوة وبالصور

الاول هنفك الكونسولة بتاعة فرامل اليد
هتطلع الجوز كراسى لقدام وتفك المسمارين دول

وبعدين هترفع فرامل اليد لفوق خالص
وترفع الكونصولة من ورا وتعديها من فرامل اليد وتطلعها

وبعدين تخش على الفتيس
وتشد الفرام بتاعة لفوق هتلاقية طلع فى ايدك
وتقلبة وتشوفة من تحت ماسك بافيز او اى حاجة تانية
وتفكها وتطلع الفرام بالجلد برة خالص

وبعد كدة تخش على ال3 مسامير اللى ماسكين الكونصولة بتاعة الفتيس
واحد بين الكرسيين
وواحد جنب رجلين السواق
وواحد جنب رجلين اللى قاعد جنب السواق

وتسحب الكونصولة لفوق
بس بحرص عشان لسة الطرفين الكهرباء بتوع الولاعة لسة راكبين
هتفكهم من بعض وبعدين هتطلع الكونصولة

وهيكون دة الشكل النهائى

وهنبدا نفك علبة التوزيع بتاعة الهوا اللى بتبقى على اقدام السائق واللى جنبة
هنبدأ بالمسامير الواضحة

وبعدين هنشتغل على المسامير اللى مش واضحة
وعشان زاوية التصوير صعبة
او بمعن اصح لو انا صورتها فانت مش هتفهم هيا فين بالظبط
فانا هثبت المفك او البيبة 7 وهصور عشان تبقى فاهم مكان المسمار فين

وبعدين هنروح الناحية التانية
عند الى راكب جنب السواق
وبرضو نفس الطريقة للمسامير اللى مش واضحة

بعد ما تخلص هتلاقى الغرفة الاخيرة بتاعة توزيع الهوا على الاقدام نزلت لتحت
احتمال تحتاج منك بعض المساعدة فى السحب والتسليك لتحت ودة شكلها الاخير لما نزلت

بعد كدة هيفضل عندك مسمارين اوعى تفكهم
لانك لو فكيتهم هتتسحل بكل ما تحملة الكلمة من معنى عشان تقفل العلبة تانى
واحد جنب دواسة البنزين وهحط لك المفك علية عشان تبقى عارفة بس متفكوش

والتانى عند رجلين اللى راكب جنب السواق وهحط لك فية البيبة عشان تبقى عارفة ومتفكوش

هنا كدة هتبقى المسامير كلها خلصت
مش هيتفضل غير انك تنزل الفبرة لتحت
بس خلى بالك
الفبرة دى مش هتطلع خالص
الفبرة دى هتنزلها لتحت وتسحب منها سربنتينة السخن
بس قبل ما تعمل الكلام دة
هتنزل تحت العربية
وتفك المسمارين اللى تحت اللى ماسكين وحدة التكييف بالكامل عشان توسع لك شوية وتسمح لك انك تعرف تطلع سربنتينة السخن
هنرفع العربية
وننزل تحتها نفك المسمارين دول

وبعد كدة هتلاقى شفة حديد ماسكة السربنتينة بتاعة السخن من فوق ......انطرها بالمفك العادة

وبعد كدة هتبدأ تسلك العلبة الاخيرة وانت بتنزلها لتحت من الضفيرة بتاعة الكهرباء

وخلى بالك الموضوع دة محتاج صبر عشان متبوظش حاجة فى الضفيرة

هتنزل العلبة بايد وهتسحب السربنتينة بتاعة السخن بالايد التانية

ونبدأ بصبر وبحرص
نسحب السربنتينة من جوة العلبة

هنا هنشوف ان ماسورة من الماسورتين متاكلة خالص
والحقيقة انا عارف الموضوع دة من اول الصيف اللى فات
بس كنت مكبر دماغى علشان انا مش هحتاجها طول فصل الصيف

لكن اول ما الشتا دخل قلت ضرورى اعملها علشان اعرف اشغل السخن واخلط سخن على بارد واستمتع بالتكييف الدافى

انا كدة خلصت فك

هروح ادور على حد بيبيع مواسير المونيوم نفس القطر الخارجى 19 مم وهفور الماسورتين بالمرة بما انى فكيت وهلحم ماسورتين جداد عند اى ورشة فيها لحام ارجون (لحام الالمونيوم اسمة كدة)

وهصور الكلام دة وهقولكم على التكلفة وبعدين احتمال اقفل يوم السبت او الاحد وهصور بردة التقفل وهقول عل كل الملاحظات اللى ممكن تقابل اى حد وهوة بيعمل الشغلانة دى

وبالنسبة ليا التكلفة كلها هتكون فى حتتين الماسورة واللحام
وهبقى ابلغكم وبالصور زى ما قلت

ملحوظة اخيرة
كل العدة اللى احتاجتها كانت مفك صليبة عادى ومفك صليبة قصير طولة 7 سم وبيبة 7

**atpo56a** · 13-11-2013 11:28 PM

اولا انا اشكرك لوعدك لي بشأن تصليح دوره السخن للانوس اما ثانيا بصراحه شرحك ممتاز ورائع ومبسط لاي عضو يقرأه الف الف الف الف شكر علي التوضيح ربنا يجعله في ميزان حسناتك

**fepsceasar** · 14-11-2013 12:51 AM

موضوع مفيد جدا وفى انتظار باقى الاجزاء

**J A G U A R** · 14-11-2013 12:58 AM

مجهود ممتاز .. تسلم ايدك

**medo_mony** · 14-11-2013 01:53 AM

بجد ممتاز ممتاز يا باشا رائع والله وارجو من الادارة تثبيت الموضوع فورا

**Khaled Lanos** · 14-11-2013 02:57 AM

كالعادة إبداع وشرح ممتاز لمواضيعك..الله ينور
بس للأسف 95% من الشعب المصري مش بيشغل التكيف على السخن عشان ميخدش برد وهو نازل :)
نصيحة بالنسبة للسربنتينة بتاعك:
خدها ورح للخراط يفور لك الماسورتين دول ويعملك 2 جداد على نضافة أحسن بكتير من اللحام وكدا.
احنا عملنا الموضوع في عربية صديق عزيز (فيرنا) وبقالها سنتين شغالة تمام أهي الحمد لله.

**saddam** · 14-11-2013 03:31 AM

صديقي المواطن
موضوع متكلف ومصروف عليه وبنشجع كل حد بيشتغل بإيده وبيحاول ينفع ويفيد اﻷخوه أعضاء المنتدى الكرام ولا تحرمنا من كل جديد
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**swimmer25** · 14-11-2013 08:37 AM

إيه الحلاوة دي...متألق دائما
سؤال بقي عايز أعرفه
إنت بتعرف الحاجات دي منين..بتجرب بإيدك وتكتشف فين أماكن المسامير وطريقة فكها ولا إتعلمت في حاجة قبل كدا ولا قريت مانيوال ؟

الموضوع: طريقة فك سربنتينة السخن دايو لانوس...بالتفاصيل والصور والشرح

LinkBack

أدوات الموضوع

عرض

طريقة فك سربنتينة السخن دايو لانوس...بالتفاصيل والصور والشرح - انشر الموضوع فى :

-

-

-

-

المواضيع المتشابهه

(( لاول مرة )) طريقة اصلاح موبينة لانوس..بالتفاصيل والصور

طريقة عزل صدر وارضية السيارة (دايو لانوس) . بالتفاصيل والصور

طريقة عمل اضاءة تلقائية لدرج تابلوة لانوس .. بالتفاصيل والصور

طريقة فك تابلوة لانوس بالكامل ... بالتفاصيل والصور

الكلمات الدلالية لهذا الموضوع

المفضلات

المفضلات

ضوابط المشاركة