الموضوع: الى خبراء المنتدى ارجو منكم النصيحة

المشاركة الأصلية كتبت بواسطة hosamzaki

السلام عليكم
الى خبراء المنتدى ارجو منكم النصيحة اريد شراء عربية ميجان حالة كويسة علشان من عايز ادخلش فى مشاكل المستعمل معايا فلوس فى حدود 55الى 65 الف .
انا سمعت كلام كتير عن الميجان و اريد منكم التوضيح كى استقر هاعمل اية.
- ناس قالتلى بالمبلغ ده ما يجبش غير مويلات 2005 او 2006 .
- و ناس قالتلى هات الموديل اللى نور التابلوة بتاعة ابيض مش البرتقالى ..و ناس قالتلى العكس
- و ناس قالتى المويلين دول فيهم مشكلة فى سوفت وير الفيتيس.
- وناس قالتلى العربية دى بتغير موبينة كتير و طرمبة بنزين و علبة دريكسيون.
- و ناس قالتلى بلاش علشان العربية دى خطر الكمبيوتر ممكن يهنج و انت ماشى و تعمل حادثة.

ارجوكم الامانة فى الرد انا دماغى وجعتنى من كتر الكلام.

بص يا حسام انا هرد عليك بالترتيب و على قد عشرتى القليله مع الميجان لانى لسه جايبها
-هوا فعلن المبلغ دا ميجبلكش غير 2005 2006 بس 65 تجبلك 2005 حاله نظيفه اوى
-موضوع نور التابلوه دا متعلق بسنه العربيه يعنى تقريبا من اخر 2007 التابلو بقا نوره ابيض و االله و اعلم بس دا ليه علاقه بالموديل
-موضوع الموبينه و طرمبه البنزين الحاجات دى بتتغير عمر افتراض يعنى انتا ممكن تشترى العربيه و تفضل معاك 3 سنين مثلا و متغيرهاش غير مره
-اخر واحده دى واسعت منهم اوى دول اعداء الرينوه
بس انا راى شوف واحده 2005 2006 سعرها مناسب ليك و فاليها حته حته و روح اكشف فى التوكيل او مركز خدمه معتمد و توكل على الله مع العلم انى معملتش كدا و روحت كشفت فى صقر قريش بس ربنا سترها معايا
و عايز اقولك حاجه اخيره قطع غيارها مناسبه جدا جدا لاكن مش نفخ زى ما الناس فاكره و بالنسبه لصيانتها و الناس الشغالين فيها عندك
صقر قريش (حرفين الرينوه)
التوكيل و مراكز الخدمه المعتمده
طارق بتاع الهرم
فيه 2 شغالين فيا فى مدينة نصر واحد فى الحى السابع و واحد فى حسن المامون
الشرقاوى فى الحرفيين و كذا و احد تانى فى الحرفين برده
و فيه كام واحد فى دمشق مصر الجديده
الحاجز النفس الى بين الميجان و لاناس اتكسر خلاصصص
ربنا معاك

المشاركة الأصلية كتبت بواسطة hosamzaki

ارجوكم الرد السريع من خبراء الميجن علي اسئلتي السابقة لاني امامي عربيتين بختار بينهم الاثنين نفس الحاله.تقريبا
واحده ميجان 2005 ماشيه 100000 الف فول اوبشن سيدان 60000 جنيه
و الثانيه ميجان 2005 ماشيه 140000 بانوراما سيدان 65000 جنيه
الاثنين اوتوماتيك
الرجاء الامانه في الرد لاني هادفع تحويشة عمري
و هل السعر كويس ولا غالي

السعر في الاتنين معقول بس المهم الحالة ايه؟
هل دي أول عربية تركبها؟
أنا هفترض انك ركبت عربيات قبل كده وهقولك هتعمل ايه بالظبط
أول هتروح تشوف العربية بناء على كلام صاحبها..يعني مثلا لو هي فبريكة أو رشة منطقة معينة، فيها عطل معين محتاج تصليح أو مفيهاش إلخ.
لو الشكل العام عجبك من الخارج والداخل..يبقى تروح تكشف في التوكيل
- في التوكيل هيعملو لحضرتك كشف كامل على العربية وهيقولك حالتها ايه بالظبط، ولو فيها حاجات محتاجة تصليح أو صيانة هيقولك وكمان هيقولك ع الأسعار بتاعتها (طبعا هتبقى غالية جدا عشان في التوكيل)
- دلوقتي هيبقى قدام حضرتك الحالة العامة والتقرير وتقدر تفاصل في الفلوس على هذا الأساس أو تلغي البيعة من أصله لو طلعت العربية عاملة حادثة مثلا أو فيها مشاكل في أجزاء رئيسية (فتيس، موتور، إلخ)
- خلي بالك العربية ليها مصاريف تانية بعد الشراء زي نقل الملكية والترخيص والاصلاحات البسيطة اللى أكيد مفيش مستعمل بيخلى منها، فحاول تنزل في الفلوس على قد ما تقدر وانت المستفيد.

وربنا يوفقك وتلاقي حالة نظيفة.