استفسار بخصوص عمليه الليزك

**ramy_gamal** · 28-11-2013 12:01 AM

المشاركة الأصلية كتبت بواسطة shnory

شوف حتعملها فين وازاي وبكام علشان انا عاوز اعملها برضه
واحتمال اعملها في مركز العيون بتاع سموحه بس لسه مكسل ومش واخد قرار

يا باشا انت تامر
بس انت عايز الليزك العاديه ولا احدث حاجه الفمتو سمايل
بالنسبه ل العاديه كنت سمعت عن د / بيتر حبشى بيقولو كويس ولسه جاى من امريكا وكل دراسته هناك واسعارة كويسه فى حدود 3000 او 3300 حاجه كدة
بس انا يمكن استنى شويه لان اخويا جاى من امريكا واحتمال يعملها هنا هو كمان هو هيكون على شهر يناير

**alavokatooo_o** · 28-11-2013 03:15 AM

المشاركة الأصلية كتبت بواسطة r_gamal1

اتحسن شويه ولا بقه 6/6 ولا انت نظرك مكانش ضعيف اوى
هل فى مشاكل فى يوم العمليه

يمكن التعبير خاني في الكلمه دي ومش عايز اقولك ومتفتكرش اني ببالغ لو قلتلك ان في حاجات بشوفها اصحابي العادين مش بيشفوها زي يافطه بعيده مثلا وبالنسبه ليوم العمليه المشكله كلها انك في العمليه بيحطلك قطره مخدره تمام لما مفعول القطره دي بيروح اوعي وشك بقي تحس ان حد بيلعبلك في عينك

بس مع استخدام القطرات بانتظام كل الكلام ده بيروح بسرعه واطمن واعملها ومتخافش من حاجه

**ghost11** · 28-11-2013 07:01 AM

يا باشا خليكى زى ما انتا كده احسن انا كنت بادردش مع دكتور مصرى فى قطر فبيقولى اللى خلانى اطفش من مصر هو غياب الضمير وقالى على اسم مستشفى كبير ومشهور فى مصر بعمليات الليزك وجراحة العيون كان بيشتغل فيه

بيقولى الدكتور يبقى عارف ان سمك قرنيه المريض غير مناسب للعمليه ومع ذلك بيعملها ويروح نظره بعد 5 او 6 سنين وهو عارف انه هيرجعله يعمله نقل قرنيه من واحد ميت ب50 الف جنيه

فنصيحة بلاش ربنا يبعد عنك الشر

**yaserbasha2000** · 28-11-2013 07:22 AM

انا الحمد لله عامل العمليه دي من 2003 و الحمد لله حتي الان النتيجه مرضيه جدا بالنسبه لي

اولا الفرق بين اليزك والفيمتو ليزك و السمايل هي في تكنيك جرح الطبقه الشفافه لكن العمليه نفسها واحده انا طبعا وقت ما عملت مكانش فيه غير الليزك

احتياطات العمليه :

1-عمل قياس نظر و التاكد من ثبات قياس النظر مرتيين متتاليتين الفرق بينهم عام علي الاقل
2-مسح للقرنيه لتحديد سمكها و تحديد نوعها (و ده موجود من زمان يعني انا عامله في 2003)
3- فيه كمان فحص لتحديد ان القرنيه مش مخروطيه (دي حاله لا يتم عمل العمليه ليها و غالبا الحاله دي بتقترن بدرجات الاستجماتزم العاليه يعني 8 و طالع)

**PUTTPUTT** · 03-12-2013 01:20 AM

المشاركة الأصلية كتبت بواسطة ghost11

يا باشا خليكى زى ما انتا كده احسن انا كنت بادردش مع دكتور مصرى فى قطر فبيقولى اللى خلانى اطفش من مصر هو غياب الضمير وقالى على اسم مستشفى كبير ومشهور فى مصر بعمليات الليزك وجراحة العيون كان بيشتغل فيه

بيقولى الدكتور يبقى عارف ان سمك قرنيه المريض غير مناسب للعمليه ومع ذلك بيعملها ويروح نظره بعد 5 او 6 سنين وهو عارف انه هيرجعله يعمله نقل قرنيه من واحد ميت ب50 الف جنيه

فنصيحة بلاش ربنا يبعد عنك الشر

هو فعلا بس لو العين لو انفجرت لاقدر الله مش هاينفع ترجع تاني
الموضوع ببساطة انك بتلعب في خلقة ربنا وعمرك ماهتعرف تعمل واحد على مليون من خلقة ربنا
الناس كلها متفقة هنا على ان في سمك قرنية مش مناسب وهو بيرفعها زيادة
يعني باختصار بيقلل سمك القرنية زي مايقلل سمك لوح خشب ف هايتكسر اسهل او يقلل سمك صاج ف هيتطبق اسهل
ودي عين مش رفرف هاترميه وتجيب غيره
اي حاجة في الجسم بيحصل فيها مشكلة مابترجعش زي الاول ابدا زي اي واحد عنده مشكلة في العظم زي الانزلاق الغضروفي عمره مابيرجع زي الاول
بلاش احسن انا مش ناوي ازهق واقولكو لا لحد لما تقولولي اطلع بره

**ALshahba** · 15-12-2013 08:36 PM

يا جماعه العمليه دي مفيده جدا جدا ..... بلاش تخوفو الناس
فى ناس كتير جدا بتعاني من الضعف الشديد من النظارات وبتعاني من لبس النظاره ايضا
التقدم العلمي ليس معناه ابدا تغيير خلق الله ............ "مالكم كيف تحكمون"

- ولكن انا عندي سؤال ملحوظ : لماذا اغلب الاطباء والمشهورين من الاثرياء وغيرهم ......مازالوا يلبسون النظارات ؟؟؟