الموضوع: زيادة رسوم توثيق الشهر العقاري(حد أدنى 5 الاف جنيهاً) انذار للي معاهم توكيل

يا ريت تركزوا معي خصوصاً في الأمثلة اللي بالأرقام علشان تفهموا الحسبة صح

أولاً : لازم نعرف إن مفيش حاجة إسمها قيمة العربية تحدد وفقاً للمكتوب في العقد والكلام ده مطبق من كذا سنة .. هم عندهم جداول بأسعار السيارات زي اللي منشورة في القرار اللي حضراتكم شوفتوه .. بيحسبولك قيمة سيارتك وفقاً للجدول ويشوفوا القيمة الأكبر وياخدوا عليها 2% رسوم توثيق .. يعني لو حضرتك كاتب في العقد قيمة أقل من الجدول يحسبلك الرسوم على قيمة الجدول ولو كاتب في العقد قيمة أعلى من الجدول يحسبلك الرسوم على قيمة العقد
(مثال) لو قيمة العربية وفقاً للجدول 100,000 -- وحضرتك كاتب في العقد 90,000 بيحسب الرسوم على ال 100 ولو كاتب في العقد 110 يحسبهاى على ال 110 طبعاً .

ثانياً : قبل تعديل القرار كانت نسبة التخفيض من ثمن السيارة 10% عن كل سنة فاتت من تاريخ صنعها بعد القرار بقت 5% فقط ..
(مثال) على القرار القديم كانت نسبة التخفيض 10 % عربية حضرتك 4 سلندر موديل 2009 مشتريها وهتسجلها السنة دي 2013 وكاتب في العقد 50,000 في حين إن سعرها وفقاً للجدول 90,000 .. الأول هيحسب قيمة التخفيض 10% عن كل سنة ولما يحسب التخفيض مش هياخد لا سنة الصنع ولا سنة التسجيل لأن القرار بيقول كل سنة (تنقضي) من تاريخ الإنتاج وتاريخ طلب إجراء التوثيق يبقى هيحسب تخفيض عن سنة 2010 ،2012،2011 .. 3 سنوات × 10% يعني 30% يعني التخفيض 27000 جنية من 90000 يبقى ثمن سيارتك وفقاً للجدول بعد التخفيض هو 63000 جنيه في 2% رسوم = 1260 جنيه ... طب لو فرضنا إنك كاتب في العقد 65,000 يبقى هياخد طبعاً بالقيمة اللي في العقد لأنها أعلى وهتدفع 1300 جنيه

ثالثاً : بعد تعديل القرار أصبحت نسبة التخفيض 5% فقط .. مش بس كده هو طبعاً زود ثمن السيارات عن الثمن اللي كان في القرار قبل التعديل .. مش بس كده .. ده كمان زود على سعر العربية 5% عن كل سنة صنع من 2014 ل 2018 . نضرب مثال بالأرقام للحسبة بعد الزيادة .
(مثال) نفس العربية اللي حضرتك مشتريها 4 سلندر موديل 2009 رايح تسجلها في 2014 سعرها كان 90000 وفقاً للجدول قبل التعديل وأصبح بعد تعديل القرار 98500 هيطلعلك التخفيض 4 سنوات من 2010 حتى 2013 × 5% = 19700 .. يبقى سعر السيارة 98500-19700 (20% تخفيض) = 78800 × 2% رسوم = 1576
طب لو هتسجلها في 2015 .. يبقى سعرها وفقاً للجدول 103500 - 25875 (25% تخفيض) =77625 ×2% رسوم = 1552.5
لو هتسجلها في 2016 .. يبقى سعرها وفقاً للجدول 108700 - 32610 (30% تخفيض) =76090 ×2% رسوم = 1521.8

مع التأكيد مرة أخرى أن الرسوم تحسب على أعلى السعرين سواء كان السعر اللي في العقد أو سعر السيارة وفقاً للجدول بعد التخفيض ..
أتمنى تكون الصورة وضحت وأكون قدرت أفهمكم وفقاً لما فهمته .
تقبلوا تحياتي