الموضوع: ده محل أكل عيش

طب ايه رأيكم فى السلوك ده

شارعنا فى المقطم تقريبا نصفه اراضى فضاء، و مفيهوش محلات، و أغلب العمارات فيها جراجات و الشارع عرضه ييجى 30 متر و اماكن الركن و الحمد لله بالهبل و محدش بيلاقى ادنى مشكلة فى الركنة خااااااااالص.

جميل؟

فجأة من كام شهر انتشرت ظاهرة غريبة فى 3 عمارات، كام واحد يعمل مطلع على رصيف الأرض الفضاء اللى جنبه و حديدتين بينهم سلسلة و يركن فى الأرض الفاضية!!!!!!

مع ان مكان ركنته فى الشارع فاضى وواسع و لو على الأمان، مفرقتش، اللى عاوز يسرق العربية مش هيغلب انه ينزل بيها الرصيف البسيط ده من جنب السلسلة.

ربنا مسهلها علينا، باركن فى ثانية، لازمته ايه انزل و افك سلسلة و اطلع فوق رصيف؟

انا فى ميزة عند بيتنا ان فيه 4 مساحات فاضيه مكان عمارات لسه ما اتبنتش منهم 2 مفتوحين على بعض
2 منهم اتقلبوا جراج خاص متعرفوش ازاى
والحمد لله لسه قى قطعتين ارض فضاء
فبلاقى ركنه اغلب الاوقات

بس فعلا موضوع الركنه ده بقى حاجة متعبه جدا
انا اغلب مشاويرى بسيب عربيتى واركب حتى تاكسى احسن ما اتبهدل بالعربيه

موضوع ترجع تلاقى عربيتك مخبطوطه ومحكوكه والكلام ده ده الطبيعى معتقدش فى حد فى مصر مش بيحصله كده :)
انا اصلا بشوف كل يوم السايس عند الشغل عشان يطلع عربيه من العربيات اللى وقفه صف تانى بيزق العربيه اللى قدامه لغايه ما تخبط فى العربيه اللى وراها ويفضل يزق لغايه ما يلزقوا الاتنين فى العربيه اللى وراهم وهكذا
يعنى هتلاقى فى عربيات اتفعضت فى النص :)
وقبل كده شوفت سايس بيزق عربيه من اكره الباب شوفت انعدام ضمير اكتر من كده :(

من كام سنة كنت بلاقى ركنة عادى و المنطقة كانت هادية إلى ان فتحت قهوة و بقه خلاص الركن قدامه ممنوع طبعآ بأمر من اللواء القهوجى صاحب المخروبة

فى الأول كان واخد حتة صغيرة و بعد كده خد الناحية اللى قصادها فى الشارع و بعد كده إمتد الإحتلال إلى ما يقرب ربع الشارع فى شهور الصيف المزدحمة

و كان الأول لما ملاقيش حتة أركن فيها كنت بركن قدامه و هو ماكنش بيفتح بقه و أحيانآ كان بيحرك الكراسى عشان يوسعلى إنما دلوقتى خلاص البيه فرض سيطرته و يقوللى بلاش تركن عشان انت بتغطى العربية و تبيتها... و الله انا مكنتش متخيل ان الجعر ده بيكلمنى و يقولى بلاش تركن هنا

و طبعآ بلاغات ضده كتير من ناس فى المنطقة لكن طبعآ الراجل بيطلع برىء و إحنا اللى عالم مفترية

هقول إيه غير ربنا يطلعنا منها على خير

انا تحت بيتنا برضه محل بقال الراجل بيمنع أي حد يركن قدامه و صوته عالي علي طول و التفاهم معاه صعب و مبيجبش غير الصداع .. كان كل ما يشوفني راكن قدامه (كنت بركن قدامه بعد ما يقفل و أمشي بعد ما يفتح بشوية) كان يتخانق .. و اللذيذ إن الناس كانت شايفة إن انا اللي غلطان و إزاي أقف قدام محل الراجل و أقطع أكل عيشه ! (مش فاهم إزاي يعني ولا أكني راكن جوة المحل!) .. رحت أدور علي جراج حتي اللي بعيد منهم يا يقولي مفيش يا يقولي ماشي بس تسيب المفتاح .. و إحنا عندنا في الشارع كل واحد ليه ركنته و محدش يجرؤ يركن مكانه حتي لو مسافر ! المهم راجل في عمارتنا كدة طيب بيهزر معايا فا بيقولي إيه يا عم إنت عامل مشاكل ليه .. فا حكيتله .. قا قاللي بص انا هعزل كمان شهرين و إنت زي إبني .. إركن مكاني و انا هركن قدام المحل هو مش هيعرف يتكلم معايا و انا هتصرف معاه هوا بيتخانق معاك عشان سنك صغير .. و اما انا أمشي تبقي دي ركنتك يا عم بدل ما حد تاني ياخدها .. بس و قد كان من ساعتها بقيت أركن في المكان ده .

ساعات بقي بيحصل مشاكل بسبب إن العربيات بتزيد في الشارع و ناس بتبرشط .. و مرة واحد تاني فاتح محل في الشارع بيقولي إنت قفلت الحتة اللي كنا بنجمع فيها الزبالة الزبال ييجي يشيلها ! ونبي ده أقوله إيه ؟ الزبالة كمان بقالها مكان الواحد ميقفش فيه .

المهم يا علا إن للأسف كل واحد بيعتبر الشارع ملكية خاصة له .. مش هقولك اللي عنده محل بس .. لأ ده اللي بيركن في نص الشارع و يسيب العربية أو التاكسي اللي يقف ينزل الناس في نص الطريق .. أكنه بيطلع لسانه للناس و بيقولهم انا بتمشي في ملكيتي الخاصة ! و مع إحترامي برضه كل زاوية صلاة بتفرش الشارع كله و تقفله معتقدش ده حلال يعني إنه يعطل الناس و يخليهم يلفوا في متاهات عشان يعرفوا يوصلوا بيتهم .. يعني الناس تصلي في جامع كبير ياخد الناس كلها إنما مش تقفلي شارع رئيسي و اللي ييجي يتكلم يتعامل معاملة الخارج عن الدين ! ده ممكن يبقي مقبول في صلاة العيد مثلاَ بتبقي أجازة و الناس كلها نازلة في شكل أشبه بالإحتفال .. إنما 30 يوم رمضان .. مستحيل !

بالمناسبة يا كريم بمناسبة الخدوش و الحكات .. انا مرة واحد حكلي العربية في اون ذا ران موبيل الجديدة بتاعة أكتوبر اللي قبل ميدان جهينة ( أكبر بنزينة ممكن تشوفها !) مكان ولا إستاد القاهرة .. و اللذيذ مكنش واقف غير انا و عربيتين تانين و باقي الركنات صحراااااااااااااااااااااا .. حوالي 15 ركنة فاضية .. بس إزاي ؟ محمود واقف هناك اهوه أصبح عليه في الإكصدام .. انا من كتر الإستغراب مقولتلوش حاجة .. قلتله مش عارف و الله أقولك إيه بس اللي إنت عملته ده مش طبيعي يعني !