الموضوع: أخيرا بعت الأفيو

المشاركة الأصلية كتبت بواسطة saddam

صديقي المواطن
أفهم من تعليق حضرتك إنك مش متابع لرأي وتعليقاتي في المنتدى عشان كده مش واصلالك وجهة نظري
أنا طول عمري بنظر للعربية نفسها مليش دعوة بسعرها نهائي بدليل أنا لسه إمبارح شاري عربيتي رقم 10 ب 2500 جنيه فقط ومحتاجة مصاريف وشغل وضرايب متأخرة حدود 7 آلاف ولكن لما تخلص وتنزل الشارع متقدرش لا حضرتك باﻷفيو ولا حتى اللي راكب سيراتو وإلانترا ممكن تسول له نفسه ويوقف جنبك في إشارة ويتخيل ولو للحظة إن عربيته أم 140 ألف مثلا أحسن من عربيتي أم 40 ألف مثلا فالعربيات في السوق المصري تنقسم لبياعة ومش بياعة فالبياعة كل الشعب بيجري وراها فتلاقي سعرها غالي يعنب حضرتك مثل بسيط مين أفخم في الشارع وأغنى وصاحب مزاج وجاذب للنظر اللي راكب اﻷفيو ولا اللي راكب مرسبدس 180 موديل 1959 ومجددها بالكامل طبعا المرسيدس أفخم ومش حتوصل بتجديدها ل 70 ألف وإحنه عندنا في مصر العربيات المسيئة ﻹسم عربيات بس كلنا بنجري وراها وعاملين ليها سوق زي أنا من وجهة نظري أرى أنه من يحط في لانوس مستعمل 50 ألف فده من وجهة نظري مسكين ومغيب وعن نفسي لا أقرب هكذا عمل وإلا سأحسب نفسي أقوم بعمل من أعمال الفجور والعصيان في حين أقدر أركب ب 40 ألف قمة الفخامة تويوتا كراون تبع حمايات رئاسة الجمهورية أو كريسيدا بنفس السعر متانة وفخامة ثم حضرتك بتتكلم في إيه هو فيه حد عاقل في كوكب اﻷرض يسيب عربية شبح ب 105 ألف ويروح يشتري إلانترا ب 160 ألف اللهم إهدي الجميع وحضرتك اللي شايفه صح ومناسب ليك إعمله وعربيتك عجباك خلاص ربنا يحفظهالك بس متجيش في منتدى سيارات وتقول أنا معايه فرسه حضرتك اﻷفيو مش أكتر من بطه عرجاء بس حتغنيك عن المواصلات وحتغنيك عن سؤال اللئيم وستؤدي الغرض
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

بص يا صدام باشا....وبالرغم إن ده هايخرج برة الموضوووع الأساسى.... أنا من متابعى ردودك وباهتمام كمااان
وموافق على أغلب أرائك .... بس يعنى أنا برضو واحد من الناس اللى بيدور على عربية يركبها وتغنيه عن بهدلة المواصلات وسؤال اللئيم....ومعاك قلبا وقالبا فى غرابة السوق المصرى اللى لاتحكمه قوانييين وإنى بدل ما ادفع مئات الألوف فى عربية أقل ما يقال عليها إنها عربية أقدر أدفع بضع الألوف فى مرسيدس أو بى إم دبليو أو حتى تويوتا موديل قديم شوية وأظبطها بإيدى وهاتبقى أفضل 1000000000 مرة من الجديد اللى غالى على الفاضى ......... بس أنا هاتكلم بلسان عامة الشعب اللى بيلهث ورا لقمة العيش ومفيش عنده وقت يعمل الكلام ده ..........وده برضه يرجع لطبيعة صنايعية مصر العزيزة..... اللى ماينفعش مثلا تسيبلهم العربية وتيجى بعد كام يوم ولا شهر حتى وتستلمها جاهزة كاملة متكاملة.......... لأ لازم تقعد على ايديهم و إلا أبسط ما يقال إنه مش هايشتغل فى العربية عشان عنده زباين تانيين قاعدين معاااه.... مش هاقولك بقى إنها تتقلب ولا يشتغل ويركب حاجات مش أصلية ولا ولا ولا ...... طبعا مش كل الصنايعية... كل مهنة فيها وفيها.... أنا مش بهاجمك ولكن دى وجهة نظرى إنى شايف إن الواحد بيدفع تمن قعدته عند صنايعية أو تمن الوقت اللى هايتعطله فى عربية جديدة .... وبمناسبة إن أنا كمان من ضمن الكادحين اللاهثين خلف ما يسمى بلقمة العيش أحب أسأل حضرتك تفتكر اسه الحل؟؟؟؟؟؟؟؟؟؟؟