الموضوع: غبور العبور كسرلى مسامير و صواميل الكاوتش اثناء الصيانة !!

المشاركة الأصلية كتبت بواسطة ahmed_ramadan

طيب أنا الميكانيكى بتاعى بيستخدم المسدس من ساعة أما وصل مصر و بيفك و يربط معظم مسامير العربية بيه و الحمد لله مواجهتش مشاكل فى الفك و التركيب قبل كده بالصليبة

المشكلة مش فى المسدس، المشكلة فى استخدام المسدس بغشومية و المصرى معروف بغشوميته قصدى بجبروته

زى كده اما حنفية المطبخ مثلا بعد ما تتقفل و خلاص مفيش مياة بتنزل، تفضل تقرص عليها اكتر، دى الفكرة العامة للى حصل

المشاركة الأصلية كتبت بواسطة matantawy

المشكلة مش فى المسدس، المشكلة فى استخدام المسدس بغشومية و المصرى معروف بغشوميته قصدى بجبروته

زى كده اما حنفية المطبخ مثلا بعد ما تتقفل و خلاص مفيش مياة بتنزل، تفضل تقرص عليها اكتر، دى الفكرة العامة للى حصل

صح كلامك! أنا عملت صيانات لغاية 115 ألف في توكيل رينو ومحصلش أي مشكلة مشابهة وكذلك الترصيص والروتيشن في Fit and Fix ومحصلش برضه أي مشكلة في الصواميل..المشكلة في الضمير! وبعد كل ده تلاقي واحد بيدافع عن الغلط ويلبسها في ناس تانية ملهاش ذنب!

انا جيت يا ولاد :D

روحت الساعة 9 فرع العبور و دخلت للباشمهندس "شريف عصام" اللى عملت عنده الصيانة امبارح و كنت بهدى فنفسي طول الطريق عشان الغلط ميجيش من عندى

حكيتله اللى حصل بكل صراحة و هو تفهم الموضوع بالذات بعد ما شاف الصورة و سمع تفاصيل كل حاجة و حس ان اللى قدامه فاهم مش بيرمي بلاه و خلاص
و هو كان محترم جدا جدا و رد عليا بكل صراحة
-ايوة المسدس بيعمل مشاكل
-لأ احنا مش بنستخدم torque اعلى بس ممكن لأي سبب يكون الربط حصل فيه مشكلة
-انا (الباشمهندس بيتكلم عن نفسه) مش فى ايدي قرار تغيير قطعة زى دى (المسمار و الصامولة)
-سياسة المركز ان القطع دى لا تغير فى الضمان (قلتله اه بس دي باظت بسبب المركز مش بسببى)
-قاللى اللى اقدر اعمله انى اخليك تقابل اللى فى ايده القرار

قابلت باشمهندس مينا اظن انه مدير الورشة او حاجة زى كده

اتعامل معايا بأدب و احترام و سمع القصة كلها و شاف الصورة و كرر نفس كلام الباشمهندس شريف ما عادا انه لم يعترف ان المسدس ممكن يعمل مشكلة
فى الأول قاللى هنعملها بس على حسابك، اتناقشت معاه و وضحتله ان لأ و خليته بنفسه يقول ان المربوط بالمسدس الصح انه يتفك بالمسدس و هنا مسكت و قلتله جميييييل، طيب انا لو العربية عطلت كاوتشة نامت فى الشارع اعمل ايه؟
هنا بدأ يتراجع بس قعد تانى يحاول يتهرب من المسؤولية بس فى الأخر قاللى هنعملها على حساب المركز و شكرته

استلم العربية و دخلها لنفس الفنى اللى اشتغل فيها امبارح و فهمه المشكلة و هيعمل ايه و طلعت انا فى الانتظار

-نقطة سلبية: الفنى مكنش بيشتغل فى العربية غير و المهندس مينا موجود فى الورشة، يعنى اول ما ساب الورشة الفنى ده ساب العربية و رجع للعربية الى كان شغال فيها، قلت هيخلص العربية اللى دورها معاه، خلصها و دخل فى اللى بعدها !! نزلت لمينا و قلتله و دخله الورشة إشتغل فى العربية، خرج من الورشة ركن العربية تانى !
نزلت ادور على باشمهندس مينا تانى، كان بيجرب عربية و اما رجع قلتله قاللى هشوفه و ربع ساعة و يخلص
بعد نص ساعة من اللاشئ نزلت تانى و سألت عليه لاقيته فى الورشة روحتله بصراحة و كان معاد الصلاة و كنت عاوز اروح بقى يعنى !! قاللى 10 دقائق بيصرف صواميل بدل اللى باظوا و فعلا فى حوالى ربع ساعة كان باشمهندس مينا خارج بالعربية من الورشة و ادانى المفتاح

سألته لقيتوا ايه و عملتوا ايه؟

قاللى غيرنا اتنين فى الكاوتشة اللى ورا شمال و واحد فى الكاوتشة ورا يمين
و قاللى ربطنالك الكاوتش بالمسدس خفيف و بعد كده صليبة

و روحت و شوية و هنزل اعمل الtyre rotation و اشوف ايه هيحصل المرة دى

و لازلت مش مقرر هكمل صيانات عندهم ولا لأ، بس الأكيد انى أخرى 20,000 مثلا، لسه مش عارف بس مش مبسوط بالمركز من ناحية التكلفة و الانتظار و عدم الأمانة اللى مفروض يكون عليها مركز بالحجم و المستوى و التكاليف دى !

جدير بالذكر ان من محاولات باشمهندس مينا انه يوضحلى انهم على كفائة و كده انه قاللى احنا بنعمل صيانة ل150 عربية يوميا، مقدرتش امسك نفسك و رديت و قلتله و احنا بنشوف شكاويهم على nile motors بقى :D اتمنى يكون الباشمهندس بيدخل على المنتدى و يرد على كلامى لو أخطأت فى حاجة

المشاركة الأصلية كتبت بواسطة toty_305

-عامة زي الصنايعي ما بوظ صمولة بجهله ...التوكيل مش هيخسر حاجة لما تسيبة

-خد عندك بقى كمبة الهطل اللي هيحصل في عربينك

-كفاية عندك انك لما حصلت مشكلة هتروح تبهدلهم بكرة ...جرب تعمل الحركة دي في اي ورشة احتمال تروح من غير السيارة

-التوكيلات بتعمل مصايب ده شئ مفروغ منه و فيه ناس مشيت بطبة زيت موتور مفتوح و حاجات غريبة ...كلامي السابق لا يعني انحيازي للتوكيلات بس صدقني أخف الضررين d:

انا مخدتش بالى من الرد ده امبارح ف اسمحلى ارد

-تم اثبات بالدليل النهاردة ان الغلط مش من الصنايعي و المركز صلح الحاجة على حسابه، ده غير انى قلت لحضرتك اللى بتعامل معاهم دول انا عارفهم و إسأل عن Tire Mania

-معاك ان لو ورشة ممكن معرفش اخد حقى، بس فى 100 بديل و ورش معروفة فيها ناس محترمة بتعترف اما تغلط، و على هذا، المركز مش جنة، كونه بيسمح بإبداء الرأى ده واجب و ليس منحة من عنده

-المركز اللي بياخد اكتر من 10 اضعاف الفلوس اللى كنت هدفعها فى الورشة، اما يغلط يتلسوع و يعترف بغلطه و يعتذر و يصلح ببلاش و يعتذر تانى عن العطلة اللى سببها ليا و إلا مايلزمنيش و اوفر فلوسي و اروح ورشة و بالفلوس اللى وفرتها اعمل اللى انا عاوزه

متأسف بس انا اختلف مع حضرتك فى كل النقاط اللى ذكرتها !
اننا نسيب مركز كبير يغلط و نعديها و نقول اهو احسن من الورشة، ابقى انا كده بساعده يتفحش فى الغلط و يتمادى فيه، و القاعدة دى تطبق من اول البيت لرئيس الدولة و كلنا شايفين نتايج اللى سكتوا زمان