اقتباس المشاركة الأصلية كتبت بواسطة edodahab مشاهدة المشاركة
الكلام بتاع حضرتك كله جميل و مثالى بس انا اعرف ناس من توكيلات تانية و اصحاب مصالح بيهاجموا عربيات لصالح عربيات
و متنساش ان حضرتك متعرفش الاشخاص الحقيقية و ايه مدة صدقهم
انا مبدافعش عن العربية بجهل و تابع مداخلاتى هتلاقى انى بتكلم بكل حيادية و زى ما فيه ناس كدة فيه ناس اكتر محترمة بتقدم النصحية لوجه الله
اما بالنسبة لنظرية المؤامرة لو حضرتك مصدق ان فيه تلات اعضاء جدد قرروا يجيبوا العربية و كانوا مقتنعين بيها تماما و كلهم سبحان الله بقدرة قادر يغيروا رأيهم فى اخر لحظة انت حر بس انا مش مصدق عشان واسعة اوى
شكرا ليك و عذرا للاطالة
و ربنا يستر طريقنا
على فكره هما مش تلاته دول بقى اربعه
عشان أنا كمان غيرت راي قبل ما انزل احجز بـ 12 ساعه بناء على نصيحه حد أعرفه شغال في مجال السيارات وأنا واثق انه ملهوش هدف في انه يغشني
وبدأت رحله البحث تاني من أول وجديد وبقيت عمال أطلع وانزل بالسعر لحد ما اتجننت فكرت في الاوبترا واللوجان والساجا والبيرسونا والريو والـ rb و 301 لحد ما وصلت للكروز وبردوا مفيش فايده وفي الأخر استقريت على صني برضوا بس الشكل القديم وإن شاء الله أشتريها اليومين الجايين دول عشان اخلص من صداع البحث اللي مبيخلصش
واحب أقول لحضرتك ليه الناس بتغير رايها في أخر لحظه عشان متظنش في الناس سوء النيه

لأن ببساطه ممكن حضرتك تسيب عربيتك وتنزل تلف لفه على معارض السيارات وتبتدي تسأل الناس هناك رايكم ايه في العربيه هتلاقي انه على أفضل حال 70% هيقولولك أبعد عنها بما فيهم المعارض اللي عندهم العربيه وبيبيعوها مع ملاحظه كمان ان العربيه بتتباع عندهم بؤفر برايس يعني المفروض مكسبها بالنسبه لهم أعلى لكن برضوا هتلاقي كتير أوي هيقول لك بلاش وده اللي حصل معايا

لما تدخل المنتدي هتلاقي أعضاء مش قليلين بيشتكوا من العربيه بشكل عام ومن الفرامل بشكل خاص وهتلاقي ناس مقدمه شكاوي في حماية المستهلك وده حتى لو افترضنا زي ما حضرتك بتقول ان دي ناس مغرضه بتشتغل لصالح شركات تانيه فده برضوا هيخليني كواحد بيحط فلوس في عربيه يقلق ويبعد عشان ميضيعش فلوسه في حاجه مش مضمونه وده برضوا اللي حصل معايا

ضيف على ده ان ناس كتير من اللي بتفكر فيها بتفكر فيها عشان الوبشنز والسعر مش عن أقتناع تام لأن شكلها مش جذاب ومبهر زي عربيات تانيه شكلها تحفه فلما الواحد بيكون مش مقتنع بشكل عربيه بس بيشتريها عشان الاوبشنز ويلاقي ناس مش قليله بتقول له بلاش في الغالب بيكون ده على هوا شيء داخلي جواه بأن شكلها مش عاجبه وده برضوا اللي حصل معايا (ودي طبعاً اذواق في الأول والأخر)

أنا حبيت أقول الكلام ده عشان بس أوضح لحضرتك أن مش معنى ان الناس بتغير رايها في عربيه فده مش معناه انهم مغرضين ولا برضوا معناه ان العربيه وحشه فبلاش سوء الظن بالناس
ولو فتحنا مجال للشك فنوايا الناس فده هيفتح برضوا شك في نوايا حضرتك من الموضوع وهتلاقي ناس ممكن تقول على حضرتك من شركه نيسان وبتحاول تروج للعربيه مش كده برضوا ولا ايه
عشان كده بلاش نفكر بنظريه المؤامره دي عشان ملهاش لازمه وهتخلي المنتدي يفقد قيمته كمرجع لأي حد عاوز يستفسر عن اي حاجه تخص العربيات

وعموماً بعد لف كتير الخلاصه مفيش عربيه كامله المهم تلاقي العربيه اللي تناسب امكانياتك وفيها الاساسيات اللي انت عاوزه وفيها عيوب انت تتقبلها ودي حاجات بتختلف من شخص للتاني

وفي الأخر ربنا يبارك لحضرتك في عربيتك ويسعدك بيها ويبعد عنك شرها يارب