نيو اكسنت اتوماتيك x كيا ريو اتوماتيك

**mshanafi** · 20-09-2008 03:33 AM

يا تري مين يكسب ... و ما سر عدم انتشارهم بصورة ملحوظة؟
- هل لازم حجز ولا فيه بضاعة حاضرة؟

**Hosam_Optrawy** · 20-09-2008 04:05 AM

الاتنين تقريبا واحد فى حاجات كتير
الشاسيه واحد
السعر تقريبا واحد فى المانيوال والاوتوماتيك
النيو اكسنت تتفوق فى الموتور 1600 و 112 حصان
الريو تتفوق طبعا فى التوكيل
وموضوع الحجز ده تسأل عليه فى التوكيل

**mshanafi** · 20-09-2008 05:09 AM

انا شايف ان موتور النيو اكسنت 1600 CVVT اللي موجود نفسه في الالنترا و السيراتو يدي ميزة كبيرة ليها . شكلي هتنازل عن مساؤى الوكيل واجيبها ان شاء الله . . ...........
فين رد المخضرم حازم خضر ........ انا عارف انه مر بالمقارنات دي قبل كدة .....

تحياتي الى كل اعضاء نايل موتورز ....... بجد افادة لكل من يبحث عن راي خبير في مجال السيارات

**ahmed1981** · 20-09-2008 09:54 AM

أنا رأيي الريو أفضل من حيث التوكيل
وموتورها 1400 موفر وحديث برضه مش قديم
وإحنا داخلين على عصر غلو البنزين والضريبة برضه
وصالونها شيك لدرجة إني لما ركبتها في معرض المصرية بأرض الجولف وقارنت بين شياكة الصالون في السيراتو والريو
الريو كانت أشيك جداً

**hazem_khidr** · 20-09-2008 04:36 PM

المشاركة الأصلية كتبت بواسطة mshanafi

انا شايف ان موتور النيو اكسنت 1600 CVVT اللي موجود نفسه في الالنترا و السيراتو يدي ميزة كبيرة ليها . شكلي هتنازل عن مساؤى الوكيل واجيبها ان شاء الله . . ...........
فين رد المخضرم حازم خضر ........ انا عارف انه مر بالمقارنات دي قبل كدة .....

تحياتي الى كل اعضاء نايل موتورز ....... بجد افادة لكل من يبحث عن راي خبير في مجال السيارات

انا جيت اهو يا باشا

و معذره اني لسه شايف الموضوع حالا:)
بالنسبه للنيو اكسنت و الريو العربيتين قريبين من بعض اوي.
نفس الشاسيه و نفس العفشه باختلاف الموتور.
تعالي كده نمسكهم حاجه حاجه

الموتور :
موتور النيو اكسنت متفوق و اسرع لكن علي حساب زياده استهلاك البنزين
غير كده ان موتور الريو اكتر من كافي.

الشكل :
بالنسبالي شكل الريو افضل من النيو اكسنت بكتير.

قطع الغيار:
بيتفقوا في قطع غيار كتير زي العفشه و تيل الفرامل الخ الخ
لكن الاكسسورات الخارجيه زي الفوانيس و ما شابه ذلك اكيد النيو اكسنت حتبقي ارخص و حتبقي منتشره بره التوكيل اكتر نظرا لانتشار العربيه.

التوكيل:
مش حتلاقي مشاكل في النيو اكسنت لسبب انها تجميع كوري مش مصري
و كل المشاكل بتظهر في التجميع المصري يعني حتروح التوكيل او اي مركز
خدمه معتمد تغير سيورك و فلاترك و كل حاجتك و شكرا:)

اعاده البيع:
سعر اعاده البيع للهيونداي اكيد اعلي من الكيلا لكن الفرق مش كبير مش حيزيد عن الفين جنيه لكن حتفرق في المده اللي حتبيع فيها
النيو اكسنت حتتباع اسرع من الريو في اعاده البيع.

تقطه اخيره ممكن تشكل عندك مشكله:
غبور اكيد بعد ما يوقف انتاج الفيرنا حيتجه للنيو اكسنت
و ساعتها حتبقي العربيه الشعبيه رقم واحد زي الفيرنا حاليا.
النقطه دي ميزتها انها بتخلي قطع غيار عربيتك منتشره و رخيصه
لكن بتبقي العربيه ما فيهاش اي نوع من التميز نظرا لكثرتها.
في الاخر الاختيار في ايدك انت
الريو مميزه عن النيو اكسنت و افضل في الشكل لكن من جانب اخر قطع غيارها حتكون اغلي شويه و اندر
انا لو مكانك حجيب الريو

**mshanafi** · 20-09-2008 06:44 PM

بصراحة موضوع انتشار العربية دة يفرق معايا كتير. لاني اتلسعت في الفورد مونديو 2004 لانها مش جايبه اكتر من 35 % من تمنها دلوقتي هنا في الكويت .

شكراً حازم باشا

**hazem_khidr** · 20-09-2008 06:47 PM

لا حضرتك الموضوع مختلف
المونديو قطع غيارها غاليه
و مش منتشره و مش اي حد يفهم فيها.؟
انما الكيا و الهيونداي تكنولوجيا واحده و قطع غيار واحده تقريبا
فماتقلقش من النقطع دي
هو سعر اعاده البيع حيقل عن الهيونداي شويه و حتاخد وقت في بيعها
لكن حتتباع و عادي جدا.
بالنسبه للخليج يا باشا انت عارف اسعار العربيات هناك عامله ازاي في الارض دايما.
و خصوصا اي ماركه غير الياباني و الامريكاني القديم ايام ما كان الامريكاني
امريكاني بجد ايام الكابريس:(