الموضوع: لو معاك 140 تشتري إيه زيرو أوتوماتيك؟

السلام عليكم، رجاء تقديم النصيحة، عايز عربية زيرو أوتوماتيك لا تتعدى 140,000 بكتير.

- أهم نقطة عندي هي راحة البال يعني مش عايز أخاطر ولا عايزها تشغلني بأي حاجه خالص ولا عايز أغيرها إلا بعد حين.

- لو قطع غيارها غالية لكن متوفرة في التوكيل ومراكز صيانتها محترفة وسريعة والخ ماشي عادي.

- مش مهم أوي توفير البنزين لأني كدا كدا مش باستخدم العربية كتير.

- اللانسر أظن أكتر عربية تتفق معايا لكن مش عارف إيه ظروفها حاليا، البومه وشكل 98 ده شكلهم قدم أوي مقارنة بالعربيات الجديدة وكمان أسعارهم غالية. شكل الشارك ده عاجبني شويه لكن بدأ يقدم وأشعر إن فيها مشكلة لأنها لم تنتشر وحتى ماباشوفهاش في المعارض لا زيرو ولا مستعمل كتير.

- فكرت أزود أكتر في سبيل قفزة وجاهة اجتماعية وأجيب حاجه "شبه" الدفع الرباعي وفكرت في تيريوس، شكلها عاجبني جدا من أول مانزلت وكانت سيارة أحلامي وانا في تالته إعدادي حلم المراهقة الدفين اللي جوايا من التسعينات من أيام ألبوم قمرين بتاع عمرو دياب، لكن ناس كتييير بتقول عليها فاشلة وكل يوم تثبت فشلها خصوصا في موضوع الأمان.

- انطلاقا من نفس الحلم فكرت في رينو داستر لكن لقيت إن شكلها قبيح من قدام ومن ورا، يمكن تتظبط لو اتحطلها استبن ورا زي بتاع التيريوس لكن لقيت إنها عربية كهلة كدا مافهاش رفاهية وتانك البنزين لازم يتفتح بالمفتاح والخ وعربية تحس إنها تعيسة فقر تجيب الغم

- فكرت أزود أكتر في سبيل قفزة وجاهة شبابية تمثل حلم المراهقة المتأخرة وأجيب حاجه شكلها رياضي مميز زي هيونداي فيلوستر لكن غالية أوي على شكلها العجيب غير المفهوم غير المهضوم المحير ده ماتفهمش حلوه واللا باظت منهم! لو كان شكلها ماشي على نسق التطور الطبيعي للهيونداي الكوبيه مثلا كنت جاهدت من أجلها.

- انطلاقا من نفس الحلم فكرت في هيونداي النترا كوبيه، مش عارف إيه رأيكم في الالنترا بشكل عام وفي الكوبيه، حاسس ان شكلها مقفع كدا كأنها سخنت منهم طقطقت في الفرن لكن مازلت شايف شكلها كويس، إنما من ناحية العفشه والتوكيل والخ والحاجات دي إيه النظام؟ الكوبيه أوتوماتيك بـ 140 تقريبا إنما أول أوتوماتيك أربع أبواب بـ 150 ربما، الفرق بينهما في عدد الأبواب والصالون والسعر فقط .. صح؟ واللا فيه فروقات جوهرية؟

رجاء المساعدة في الاختيار. انا ركبت لانسر 98 و 2001 و 2009 وفورد كا 97 وهيونداي كوبيه 2006 وإبيزا 2000 وجوليت 2004. كان أكثرهم راحة بال اللانسر 2001 و 2009، وأنضفهم من ناحية التقفيل والتوكيل الإبيزا، وأجملهن الكوبيه، وأزبلهن الجوليت، وأوطاهن اللانسر 98، وأحقرهن توكيل وقطع غيار الفورد لكن شكلها أيامها كان ملفت ومميز أوي وده اللي خلاني صبرت عليها سنين.

أبيزا الجديده كويسه؟ كيا ريو هاتشباك؟ لانسر شارك؟ الانترا كوبيه أو عاديه؟ أكسنت عاديه أو هاتشباك؟