الموضوع: شكر و تحذير و نصيحة ( 3×1)

مبدأيا انا ميجناوي جديد معاكم هنا ودا اول موضوع ليا بخصوص العربية
الموضوع زي ما في العنوان متقسم 3 حاجات هبدأهم بالترتيب زي العنوان...معلش الموضوع كبير بس يستاهل ....

ولا:الشكر:عايز اشكر الاستاذ هيثم من شركة زيوت (xado) على اول تعامل معاهم ودا طبعا لاني لسه جايب العربية فا كنت بغير زيت وهو رشحلي التخليقي بالكامل (5w-40...Sm extra drive) ولقيته من نفسه بيسألني اذا كنت عضو هنا عشان احصل عالخصم 10% وبالفعل تم الخصم وبعتلي الحاجة تاني يوم الصبح لحد باب البيت وبدون رسوم توصيل وقريب هعمل تقرير بحالة الزيت

ثانيا:التحذير:العربية لما جبتها كانت سليمة وكنت عامل كشف عليا بالكمبيوتر في صقر قريش وكله تمام كان بس ظاهرلي شريط الايرباج ومش فاكر حاجة تانية كدا المهم عرفنا اللي فيها وتمام وخلصت البيعة الحمدلله واستلمت العربية....تالت يوم وانا ماشي في امان الله لقيت العربية مش بتنقل بتسبت عالتاني وحتى لما بجيب وضع المانيوال مش بيظهرلي اصلا الارقام في العداد قدامي ولا كأنه ليه اي تأثير وكتبلي طبعا check gear box المهم بطلت العربية وسيبتها حوالي ساعتين وخلصت مشواري ودورتها تاني اشتغلت تمام ولكن بعد شوية حصل نفس المشكلة تاني..قلت مابدهاش بقى...دخلت عالمنتدى لقيت الاعضاء هنا بيقولي على واحد اسمه طارق في الهرم (وهو دا التحذير) رحتله حكيتله اللي حصل سألني اول حاجة على سعر العربية قلتله سعرها وهو للمعلومية قليل عن السوق شوية بس بالتراضي مع صاحبها وكدا وكمان انا كشفت عليها بالكمبيوتر وعرفت المشاكل اللي فيها المهم اولما قلتله السعر حسيت اني شتمته وبدأيحاول يطلعلي في العربية اي حاجة قلتله انا كشفت عليها عند عادل في صقر قريش قعد يتريق على عادل وكلام كدا مالوش لازمة وانا مذهول وحسيت ان عادل فعلا اشتغلني في الكشف...المهم طيب يا باشمهندس اديني جتلك اهو قولي ايه المشكلة حط العربية عالجهاز وكانت الصدمة...قالي الفتيس دا بايظ ومش نافع وعايز يتغير وتمنه استيراد بالتركين حوالي 7500 جنيه الكلام دا من غير ما يعمل اي حاجة غير الكمبيوتر المهم قعد اقوله ازاي دا كان ماشي عادي جدا حتى النقلات كانت سلسة جدا ومافيش اي حاجة ملحوظة من الفتيس لما كان شغال ازاي في يوم وليلة كدا فتيس يبوظ قالي هو نصيبك كدا بقى وسدها في وشي وروحت البيت وانا مش شايف قدامي من الصدمة طبعاولحد كدا انتهى الجزء التاني.

ثالثا:النصيحة:بعد اللي حصل في ثانيا نزلت تاني يوم اسال على اي حد بتاع رينو قريب مني في الهرم لحد ما وصلت لواحد اسمه (محمد صبحي) في شارع ترسا في الهرم روحتله حكيتله كل القصة قالي سيبك من الاكلام دا واحنا هنجرب الاول قبل ما نحكم عالعربية قلتله ماشي المهم فتح الكبوت نزل شوية زيت من الفتيس على صباعه لقاه كويس وقالي كدا الزيت تمام...بعدين فك الكويلات وطلع البوجيهات لقى بوجيه معرق زيت قالي ممكن يكون دا عامل مشكلة راح جايبلي طقم بوجيهات من عنده وركبه وقالي اطلع جرب لحد بكرة كدا وقولي المهم جربت وبردو عملت نفس الحركة رجعتله تاني ربطلي الفيش بتاعة الكنترول يونت بافيز عشان لو كانت بتتهز او حاجة وبردو نفس القصة قالي كدا هنفك فيشة الفتيس والهيدروليك ونراجع عالسلوك والفيش ونشوف وبالمرة كان عندي بطاحة يمين عايزة تتغير قالي نعملها واحنا فاكين قلتله ماشي قالي بس معلش هتجيبها بدري عشان تاخدها في نفس اليوم قلتله تمام مشيت وجيتله تاني يوم العصر كدا فك الاكصدام والكرتيرة والمساعد والبطاحة وقعد غسل كل السلوك والفيش بتاعة الفتيس والهيدروليك بالبنزين وشيك عالبينات بتاعة الفيش ولقى فعلا سلك في قطع وفيشة مش محكومة صح عملهوملي وغيرلي البطاحة وكان عندي الطبة اللي في الكارتيرة واقعه ركبهالي من عنده وقالي كدا ان شاء الله خلاص جرب براحتك ومارضيش ياخد مني فلوس لحد ما اجرب واقوله ...والحمد لله بقالي دلوقتي 3 ايام وكله تمام وزي الفل...وكل دا تغيير البطاحة تركي وطقم البوجيهات والطبة بتاعة الكارتيرة وقصة الفتيس وخد مني 350 جنيه .... اللي عرفته بقى انه تقريبا دارس مش مجرد ميكانيكي لانه شكله اصلا ابن ناس ومعاه 3 صبيان في الورشة وشغلهم زي الفل بالترتيب في الاحسن ( عادل وبعدين هشام وبعدين بلحة) وغالبا عادي دا قريبه لانه بيبقى هوا اللي مشغل هشام وبلحة لما يكون المهندس محمد مش موجود...عشان كدا انا بنصحكم بيه وانتو بنفسكو شفتو الفرق بين الاتنين واحد استسهل من غير ما يتعب نفسه وكان عايز يدبسني في 7500جنيه عشان يرتاح هو والتاني مشي معايا واحدة واحدة لحد ما اتحلت

هو دا رقمه 01003390213 اسمه محمد صبحي اللي يروحله يقوله بس من طرف عمرو الصوفاني ودا مش اعلان ولا حاجة انا بس حابب افيد الناس هنا زي ما هما افادوني كتير واي استفسار انا تحت امركم

اولا مبروك على الوصول للعيب ثانيا طارق كويس جدا وانا بتعامل معاه من فتره وعمره ما عمل اى اشتغاله ثالثا اين هذا الميكانيكى فى شارع ترسه مع التوفيق وجزيل الشكر