الموضوع ده منتشر بغباء وله عدة حلول قطعية :
أولاً : مهما يقولك أي حد إن الكاوتش فيه حاجه أو العجلة مريحة أو أي حوارات من هذا القبيل نفضله فوراً ، وسيبه وامشي حتى لو شفت بعينك الفردة على الأرض .
ثانياً : تعرف على طرق تخريم الكاوتش المتبعة في هذه المحطات وهي :
1. مسامير أو زجاج على مدخل المحطة ودي أقدم خدعة .. وده بيتم غالباً في بنزينات الطرق السريعة ..
والحل : حاول تدخل المحطة من على الأطراف ولو ممكن خشها من فتحة الخروج .
2. عامل المحطة ينبهك للكاوتش وعامل الكاوتش يخرم بالخاتم المقلوب أبو إبرة ..
الحل لو العامل نبهك ولا كأنك سمعته .
3. عامل البنزين مركب مسمار في الجزمة وهو بيمون يقوم مريح على عربيتك وبالجزمة وهاتك يا دب ..
الحل : انزل من عربيتك لما تمون ومتسمحش لحد يسند عليها بتاتاً
4. محطة زحمة وحركة كتير وواحد موطي وبيخرم في الكاوتش وانت مش شايفه ..
الحل : انزل من عربيتك أو بص في المرايات كويس وانت قاعد ..

وفي النهاية افعل ما يلي :
1. اشتري كمبريسور عجل تقيس به الضغط وتزود هوا .. هينفعك جداً حتى لو الفردة مخرومة لحد ما توصل لمحل ثقة ومضمون .
2. حط شنبر أو اتنين في شنطة العربية .. ولو العجلة مريحة فعلاً وقالك لحام وقطران على دماغه .. قله ركب الشنبر وانفخه هياخد بكتيره 3 جنيه المهم ميقربش من الكاوتش .. وحاول تصلحه في مكان تاني ..

المهم عدم الاستسلام لتصليح الكاوتش في أي بنزينة ، ومع تصاعد الوعي بذلك الحكاية دي هتختفي تدريجياً ..
تقبلوا خالص مودتي