مروح على البيت وبعدي على المرج والنهاردة سوق الثلاثاء ، وطبعا كعادتي مقفل كل الأبواب وبابقى سايب الإزاز اللي على شمال مفتوح حتة صغيرة وساعات كله
والسوق كان مكتظ بالناس وعشان كدا الطريق ماشي حبة حبة ، وفجأءة واحد خبط نفسه في المراية اليمين وعمل فيها موجوع ، وانا بصتله على اساس هو الغلطان ، لاقيته عمال يشاورلي انه مش سامع وشوف انت عملت فيا ايه وكل شوية مش سامع ، فحسيت انه عايزني انزل الازاز ، فطنشت وشاورتله بحقك عليا ، فأصر اني أنزل اشوف خبطته ازاي وحاول يفتح الباب ! لكن الحمد لله كنت مقفل كله ، فلما لاقيت محاولاته الغير مبررة لفتح الباب أو إني أنزل ، فمشيت بالعربية وتجاهلته تماماً والطريق ماشي بالراحة أصلا ، فمحاولش انه يجي وراريا وإلا كانت هاتبقى باينة أوي

وغرضه ان كان يلهيني معاه عشان أكيد حد تاني تبعه يسرق شنطة اللاب توب

ياريت الناس كلها تاخد بالها وربنا يحفظنا من كل سوء