الموضوع: أخر زيارة للتوكيل( أبو رواش)......و مش مبسوط

السلام عليكم يا وحوش

بقالى فترة عندي صوتين و مش عارف مصدرهم أيه......فقررت أروح التوكيل.....أكشف و أعمل صيانة ال 120 هناك.

دخلت على موقع رينو مصر بصيت على سعر الصيانة.........لقيتها 2200 و شوية من غير الضرايب.........قولت مش مشكلة بس أكون مطمن.

رحت النهاردة الصبح فى ميعادي.....قولتلهم على الصيانة و على الصوتين......و الحمد لله الصوتين كانوا باينين.

مبدأياً تكلفة الصيانة 3300 أو 3400 بدون الضريبة !!!!!!

يعني تدخل على 3700 مستريح....سألتهم هتغيروا أيه....يمكن ترس الديفازر مثلاً.....أو طرمبة مياه........مفيش غير.....سير دينامو و سير كاتينة و فلاتر و بوجيهات و زيت موتور و زيت فرامل و مياه.

الأول قالولي هتبات لبكرة......قولتلهم نأجل الصيانة و نشوف الأصوات....لأن أصلاً سير الدينامو و الكاتينة كانوا متغييرين على صيانة ال 90 مع ترس الديفازر بس عدى عليهم 3 سنين.

الأصوات بس علشان تبقوا عارفين
1- الصوت بيظهر مع تبطيل العربية و ساعات مع تدويرها.....و ساعات لو شعرت بنزين و شلت رجلك سواء جايب D أو R أو غيرهم.....و الصوت نفسه عبارة عن صوت حاجة بتخبط في بعض على خفيف (بلاستيك أو معدن بس صوت مكتوم)

2- الصوت التاني كان بيظهر في حالة واحدة......ماشي على الأول و توصل ل 3 أو 3.5 rpm و تشيل رجلك من على البنزين............تسمع صوت زي نعرة كده.

المهم أنا رجعت على الساعة 3 تقريباً و دخلت سألت قالولي لسه شوية......طيب أيه اللى تم.........مش عارفين.

شوية وقالولي المهندس هيطلع يجرب معاك.

طلعنا و حاولت أسمعه الصوت التاني.......مفيش

قالي أنهم عملوا حاجة فى شداد الموتور السفلي علشان يشوفوا هيمنع الصوت ولا لأ......و منعه.....يبقى كده هو اللى عاوز يتغير.

قولت بسيطة............راح قايلى على المفاجأة بقى.

الباشمهندسين اللى بيتشغلوا على العفشة لقوا العربية محتاجة الأتي
1- 4 مساعدين غير أصليين..........المساعدين koni Sport Adjustable بالمناسبة السعيدة :)
2- جوز مقصات
3- جوز مساعدين كدابين
4- علبة دركسيون
5- الكوبلن اليمين فيه أصلاح برة التوكيل.

بالنسبة لرقم 1......لا تعليق.
بالنسبة لرقم 2 و 3.......برضه لا تعليق.......أنا أصلاً مش بشتكي من العفشة و هى أكتر حاجة أيدي فيها أول بأول.
بالنسبة لرقم 4.....معاهم حق نسبياً........العلبة بادئة تبوظ......و لسه قدامها مش أقل من 20 ألف كم كمان علشان يبقى أسمها بايظة
بالنسبة لرقم 5..........العبقري اللى بص.......لقى أثار شحم علشان كاوتشة الكوبلن كانت أتقطعت و الشحم غرق الجنب ده......و رحت عملتها و الدنيا تمام.........هو شاف منظر الشحم قالك يبقى كده فيه إصلاح فى الكوبلن برة التوكيل !!!!!!!!!!!!!!!!