التقسيط المباشر مع عبد اللطيف الجميل
السلام عليكم و رحمة الله و بركاته ..
أنا معايا بالكتير اوى 70000 جنية الحمد لله بعد بحث فترة طويلة و قرارات متخبطة بين الجيتز و اللانسر و الياريس و البيكانتو رسينا على بيكانتو الشكل الجديد و نستلف الباقى و تبقى حاجه جديدة و بحالتها و كسر زيرو بما انها حريمى ليا انا و مش طالبة بهدلة .. و فعلا اتفرجنا كتيير و كلها كسر زيرو والله و الحمد لله ربنا نجانا من حجات كتير فى الظاهر لقطه لكن فى الحقيقة مخبطة و رشه و اصحابها مخبيين !! غالبا من على الانترنت العربيات دى ..
طبعا منتهى الاحباط و ده ملخص 4 شهور من اللف و البحث و البهدلة من غير عربية ..
بعد المشوار ده اخدنا قرار الحمد لله اننا نجيبها زيرو و خلاص .. اه هنخسر فيها شوية بس اضمن و هدفع المبلغ اللى معايا مقدم و اقسط الباقى على سنتين ان شاء الله ..
كانت المشكلة اللى موقفانى موضوع البنوك .. مستحرماها بصراحة و مش مرتاحه ابدا اجيب عربيه عن طريق البنك و بعد شوية بحث ربنا هدانى لموضوع هايل هنا فى المنتدى ربنا يجازى صاحبة و جميع المشاركين فية كل خير عن التقسيط المباشر مع عبد اللطيف جميل اللى هى العالمية المتحده و فعلا كلمتهم و اخدت العرض هى فايدة اعلى شويه بس اضمن من البنك ..
الموضوع كان قديم شوية من 2008 و كان فيه اعتراض على شوية بنود فى العقد اظن انها اتغيرت دلوقتى .. بس مش عارفه هل فيه حد تابع الموضوع ده كفتوى و ان العقد الجديد عليه اى شبهه ولا لاء أنا بصراحة قريتة و مرتاحة مفيهوش ولا نقطة من نقط الاعتراض اولا مش هأمن و لافيه غرامات تأخير هى شيكات و مهاه 14 يوم بعد المعاد او يسحبو العربيه .. الحاجة التانية ان شاء الله اجيب وكيل ولا خليجى .. و عايزة رأيكو فى اللون البيج " الفانيليا " زى ما بيقولو عليه فى التوكيل ..
حاسة انى تايهه جدا بقالى فترة طويلة و دايما بحب الجأ لنايل موتورز حيث الخبرة ..