الله يبارك فيك يا أستاذ عمرو
أنا اشتريتها أول فئة وكيل ب ١٣٥٠٠٠ من سمير ريان أستلام فوري لون أحمر غامق الحمدالله نزله بالكاسيت العريض شكله جميل احسن كتير من الكاسيت اللي في الموديلات اللي فاتت, أول فئه خليجي كانت ب ١٣١٠٠ من غير ضمان و كانت زياده DVD Pioneer وكاميرا خلفيه, كنت قلقان من موضوع الضمان و فتوكلت علي الله و خليتني في الوكيل

أستلمت معاه الإستبن و الكوريك و شنطة العده و مثلث عاكس و ٢ مفتاح ريموت و ٢ كتالوج عربي و انجليزي و كتيب الخدمة و لسه مستلمتش الضمان كلمت الوكيل أول صيانه بعد ١٠٠٠ كم

ولسه مرخص تلات سنين الحمدالله الضريبه في السنة ٢٨٥ والتأمين الإجباري ١١٨ في السنه و ٤٥ ورق فحص اتكلفت تقريبا ١٣٠٠ ,٣ سنين و الطفايه ١٣٠

العربيه جميله جدا و واسعة. الشنطه مش حاسس انها ضيقه أوي كده حجمها معقول مش قد ال ٣٠١ بس كويسه اول مستلمتها فولت العربيه و التفويله المفروض تعمل ٥٢٠ كم مش عارف ده كتير ولا قليل

العفشه كانت ناشفه شويه والكوتش لاقيته ٤١ ظبته علي ٣٠ و الدنيا بقت أحسن صوت العربيه عالي شويه بس مش مضايقني اعتقد انه هيقل بعد التليين وان شاء الله امشي شويه بس و اقلكم انطبعاتي عن العربيه انا كنت محتار بينها و بين ٣٠١ بس الحمدالله انا سعيد بأختياري ربنا يبعد عنها الحوادث يارب

كلمت الوكيل علشلن أسأل علي الكماليات الإنذار ٧٧٠ و السينسور بارك ٥٥٠ و مسند اليد الهاي كوبي مش موجود دلوقتي

ياريت تساعدوني بخصوص الكماليات اللي عاوز ازودها اركبها في التوكيل و لابره وايه احسن مكان اركب فرش جلد فيه

في حاجه مش عارف ليها حل و لا لأ المفتاح مبعرفش اشيلوا من العربيه لو الفتيس علي اي حاجه غير P في حل اني اشيل المفتاح و هي علي N.

و حاجة تانيه ال Lock مش بيقفل أول مانحرك بالعربيه لازم أنا اقفله هي حاجه بسيطة بس عاوز اعرف لو ركبت أنذار الأوبشن ده هيكون موجد

معلش أنا معلوماتي علي قدي أوي في العربيات في هصدعكم بأسئله كتييير شكرا يارجاله