وعليكم السلام ورحمة الله وبركاته
أولا لا بأس طهور إن شاء الله وشفاها الله وعافاها
ثانيا أنا زوجتي استأصلت المرارة بالفعل من أكتر من 3 سنين بسبب الحصوات وكان معظم الدكاترة برده على إن لازم استئصال والحمد لله على كل حال
هي العملية سهلة خاصة المنظار لأنه بالفعل بيفتح 3 فتحات صغيرين زي ما عملوا لزوجتي بس المشكلة إنها ممكن تقعد حوالي 6 شهور بعد العملية بتشتكي من نفس الآلام اللي كانت بتجيلها قبل العملية أو أخف شوية لأنهم علشان يستأصلوها بينفخوا المنطقة اللي فيها المرارة بغاز معين علشان تسهل عليهم عملية الاستئصال والموضوع ده بياخد فترة لحد ما الجسم يتخلص من الغاز ده ويرجع لطبيعته والجرح يلتئم وطبعا بتمشي على مسكنات وبعض الأدوية علشان تخفف الألم
لكن لو المرارة متشالتش والحصوات كبرت بتبقى خطر جدا علشان في أي لحظة ممكن تسد القناة المرارية
مش عايزك تقلق من العملية خالص بس حاول تروح لأكتر من دكتور مشهور وشاطر وتتأكد من إن لازم إجراء عملية الاستئصال وإن مينفعش تفتيت الحصوات بس من غير استئصال ، لو قالولك لازم تستأصل يبقى توكل على الله ومتقلقش
بالمناسبة زوجتي عملتها في مستشفى الجهاز الهضمي اللي في جامعة المنصورة ، بيقولوا الدكاترة هناك شاطرين وكل حاجة بس المشكلة إن المستشفى تعبانة (حكومي بقى !) لدرجة إن زوجتي راحت علشان يحجزوها تعمل العملية ملقتش سراير فاضية من كتر المرضى قاموا منيمنها على كنبة !!!
لو ربنا ميسرها ليك وتعرف تعملها في مستشفى خاصة نضيفة ودكاترة مشهود ليهم برده هيبقى أفضل علشان تبقى مطمئن
أسأل الله العظيم رب العرش العظيم أن يشفيها لك شفاء لا يغادر سقما
ومتنساش تطلع صدقة بنية الشفاء
المفضلات