الموضوع: استلمت الحمد لله عقبالكو جميعا

المشاركة الأصلية كتبت بواسطة ahmed amin

ألف مبروك علي العربية, وربنا يبارك لك فيها.
والشكر لله, أحنا كلنا هنا أخوات,,

ربنا يبارك لك فيها, وأهلا بيك معانا في عصابة الأسود الأوروبية.

الله يبارك فيك ويخليك يا ا/احمد وشكرا جزيلا على مرورك بجد انت موسوعة وكل حاجة انت بتكتبها بتكون معلومة لينا كلنا
شكرا وبالتوفيق

المشاركة الأصلية كتبت بواسطة cahmeda911

ا/رامى انت شكلك عاوز تفاصيل التفاصيل بس مفيش مشكله وانا تحت امرك
بص ياسيدى انا كان معايا كيا ريو 2013 لما رحت ارخصها فى شهر 10-2012 مكنش معايا شنطة اسعافات ولا مثلث عاكس بس الاوراق والطفاية المهندس اللى فى المرور قالى مينفعش لازم الشنطه و المثلث واضطريت امشى واجى تانى يوم
انا استلمت البيجو يوم 8-1-2014 ورحت رخصتها تانى يوم علطول انت محتاج يكون معاك البطاقة الشخصيه وصوره ليها ويكون معاك طفاية حريق صالحة لو مش معاك هى بتتباع فى المرور ب 140 جنيه اللى هيا بفاريا احسن حاجة انا كنت بالصدفة فى وسط البلد من اسبوعين وجبتها من هناك ب 120 جنيه بفاريا بردو وكان فى نوع تانى تبع الانتاج الحربى ب 110 جنيه المهم انت بدخل العربية وحدة المرور على الباب واحد هيديك ورق الفحص من غير ولا مليم تخش بيها فى المكان المخصص للفحص هتلاقى عامل جة علشان يرفعلك رقم الموتور ورقم الشاسيه وهيحطهولك فى ورق الفحص وهتلاقى كذا مهندس واقف بتدى له ورق الفحص وهو بيملاه بس بيتأكد من لون العربيه واذا كان فيها فاميه وبعدين يمضى عالورق ويقولك طلع العربيه برة وحدة المرور وهنا تبدأ المعاناه فى البحث عن ركنه وخصوصا لما تكون العربيه جديدة وتكون خايف حد يظبطها المهم بترجع على شباك الخزينة بتطلب منه ورق رخصة على حسب سنه او اكتر انا اشتريت 3 سنين ب 45 جنيه وبعدين بتروح على الجهة المقابلة لشباك الخزينة بتلاقى كذا شباك لبتوع التأمين الاجبارى بتختار واحد بيديلك اصل وصورة من التأمين بتحتفظ بالصورة وتخلى الاصل مع ورق الرخصة وبعدين فى نفس المكان هتلاقى شباك للتصوير هات منه دوسيه ب جنيه وفى نفس المكان هتلاقى بتاع الطفايات هيشيك على الطفايه اللى معاك وبعدين يختملك ورقة مخصصة للطفايه دى كنت اخدتها مع ورق الفحص وبعدين تجمع ورق الفحص مع ورقة التأمين الاصلى مع صورة البطاقة مع ورق الرخصة بعد ما تملاه وتحطهم فى الدوسيه بعدين تروح للمكان المخصص لتقديم الورق وهما حوالى 5 او 6 شبابيك مش مترقمة هو بس مكتوب عليهم رخصة جديدة هم كل الشيابيك رجاله ما عدا شباك واحد عليه واحدة ست وهى محترمه جدا وبتنجز الصراحة هتشيك على الورق وبعدين تديك ورقة بمبلغ الضريبه تروح تدفعه بالخزنة هيديلك نسختين من الايصال ترجع واحد للشباك اللى قدمت عليه الورق والتانى تحتفظ بيه وبعدين تروح تستنى على شباك تسليم الرخص على ما يندهو اسمك وبعدين تروح تستلم اللوحات والف مبروك
بالنسبه لموضوع المثلث وشنطة الاسعافات اللى ذكرته فى الاول فى البيجو المهندس شاور لى بأيدة فى ما معناه مش مهم عالعموم خليهم معاك لان هما بحالات
كل اللى ان ذكرته مرور مدينة نصر اللى بتعامل معاه من فترة طويلة فأنا مش عارف لو هيكون فى اختلاف من مرور للتانى
ارجو اكون وضحت كل شئ ا/رامى ولو في اى استفسار انا تحت امرك

انا مش عارف اشكرك ازاي , بجد انت جبت التفاصيل زي ما انا عايز
جزاك الله خيرا وربنا يباركلك في سيارتك
انا مع مرور مدينة نصر علشان كده كنت حابب اعرف انت عملت ايه

تحياتي

الف مبروك وربنا يباركلك فيها ويسعدك بيها ..وياريت توضحلنا أداء السيارة معاك عامل ايه وخاصة العزل وهل الدركسيون قابل للتعديل، وأخبار وضعية القيادة أيه؟؟... ربنا يكرمك

المشاركة الأصلية كتبت بواسطة hazem osman

الف ضمبروك وربنا يباركلك فيها ويسعدك بيها ..وياريت توضحلنا أداء السيارة معاك عامل ايه وخاصة العزل وهل الدركسيون قابل للتعديل، وأخبار وضعية القيادة أيه؟؟... ربنا يكرمك

الله يبارك فيك يا ا/حازم
بالنسبة للاداء العربيه ما شاء الله ممتازة
بالنسبة لباقى الاسئلة محتاج شوية وقت علشان اعرف ارد عليك بأمانة

الف مبروك