الموضوع: رسائل ربانية

حصل خير
انتى على فكره ممكن تكونى باصه للموضوع من نظره تانيه
يعنى انا لو شوفت نفس المنظر هيجى فى بالى ان دا واحد معندوش دم ولازم ياخد باله وانى لازم انا كمان اركز و انا سايق
فاهمانى
هو طبعا ربنا بيبعن زى ما انتى بتقولى كدا رسايل للانسان عشان يتعظ والغافل هو اللى مبيياخدش باله وبيفضل فى اللى هو فيه
وربنا يستر علينا ونموت وربنا راضى عنا وعن اللى عملناه فى حياتنا

السلام عليكم .

من الحاجات اللي دائما أشعر انها من الكنوز المعطاه الى العبد هي الرسائل الربانيه دي في غالب الاحوال على فكره كل واحد بيفسرها بمزاجه وزي ما اخونا بلازر قال كل واحد هايشوف الرساله من منظور معين يختلف من شخص لآخر .......وزي ما حضرتك تفضلتي وقلتي مين يفهم الرسائل دي ويستفيد منها لئنها رحمه من الله شديده وكتير بيحصل للواحد مواقف العقل غير قادر على تفسيرها ..........

يعني على سبيل المثال كتير الواحد يكون هايموت على حاجه معينه يعملها وفجأه النور يقطع او يحصل اي حاجه تعطل اللي الواحد مصر انه يعمله حالاً .....نوع من الرسائل المعطله خلينا نقول المهم انها شيء من الله بيعطلك ومالهاش تفسير عملي عندي انا شخصياً على الأقل يعني ايه اللي يخليك مثلاً وانت في عز سربعتك ونازل خلاص مشوار مهم جداً الساعه 9 صباحاً فتحت باب المصعد ولسه باقول بسم الله توكلت على الله سمعت صوت حاجات بتقع عندي في البيت رجعت وانا كلي عصبيه ونقم وسخط وحاجات كتير أوي أشوف وعمال اقول هي ناقصه عطله اوفففففففففف......تخيلوا والله العظيم هي كلها فرق ثواني شيلت اللي وقع وطالع تاني كهربة العماره فصلت كلها نتيجة ماس في الدور الأرضي وفضلت الكهرباء فاصله اكتر من 3 ساعات........... سبحان الله أولاً كنت هاكون بداخل المصعد والله اعلم كنت هافطس بقى جوه ولا هاطلع سليم.....النقطه التانيه هي حتى لو قلت مش هايجرالي حاجه وهاطلع سليم فاكنت وقتها هتأخر 3 ساعات مش 3-4 دقائق سبحان الله.....

خليني انقل لنقطه تانيه وهي كثرة تكرار مثل هذه الامور مع طبعاً ايمان الانسان بدينه ووحدانية الله سبحانه وتعالى ووجوده دي اللي هاتخلي الواحد يفهم ويقدر الرسائل دي والا هاتكون زي قلتها .....والله يا استاذه علا ايمان الواحد بالجزء ده ليه اثر نفسي ايجابي فوق الوصف الواحد بيحس انه فعلاً مش مطلوب منه يقلق ولا يشيل هم بكره ولا اي حاجه ماهو في تدابير الخالق سبحانه وتعالى كده كده هاتحصل بس خد بالك منها وافهمها لئن ممكن جداً تحصل قدام عينيك وماتاخدش بالك منها فكأن شيئاً لم يكن ................

بما إننا في منتدى سيارات ومواضيعنا ليها علاقه وطيده بالسواقه والطرق...........كام واحد مننا وهو سايق عربيته ومسرع شويه ربنا يمن عليه بلفت نظر رقيق وسبحان الله تلاقي نفسك هديت سرعتك وقلت بلاش أجري خليني امشي بالراحه ..........مانا كده كده هاوصل ان شاء الله .........هو يعني لو جريت هاختصر قد ايه من الوقت !! ركزوا كده والله يا جماعه وشوف كم الرحمه اللي احنا فيها متمثله في كده ....وحاجات كلها ممكن تكون بسيطه جداً .......تفتح الراديو في عربيتك بالصدفه تسمع آيه في محطة القرآن تقلب حالك مثلاً .......تشوف منظر في الطريق ......ست غلبانه بتعبر الشارع او بتبيع مناديل ورق حتى ......

مش عارف انا غالباً زي ما متعود من نفسي شكلي كده خرجت بره الموضوع يا علا واتكلمت في حاجه تانيه بس موضوعك بصراحه اصله جاي في وقت يمكن هو نفسه يكون رساله لينا اننا ناخد بالنا من الحاجات دي ونركز فيها اكيد في معنى ومعية ورحمه ورا الكلام ده كله......فا اعذريني لو الكلام خارج الموضوع ويا رب ما اكون سبب في بوظان السياق العام للموضوع وجزاكم الله خير يا علا وجعله في ميزان حسناتك ان شاء الله .

متقولش كدا بس بوظت الموضوع ايه جا انتا نورتنا يا راجل :)
بس بجد والله الحاجات دى نعمه من عند ربنا
انا مره كنت خارج من محطه بنزينه ولسه هشد عشان كنت رايح مدينه نصر وانا ساكن فى فيصل
لاقيت عربيه فيرنا ماشيه وفى بينها و بين العربيت اللى راكنه حاره ممكن تعدينى قولت اما امشى فيها بدل اما اكسر شمال اهو اسهل
مفيش ثانيه والله والاقى واحد بماتريكس ماشى فوق ال 80 راح خابط بتاع الفيرنا
يعنى لو كنت انا مشيت كنت انا اللى هتخبط قعدت احمد ربنا والله علىا للى حصل دا بلذات ان كان معايا امى واخواتى فى العربيه
وبجد احنا مبنعملش حوادث او اى حاجه مش بسبب اى حجاه غي ستر ربنا و كرمه و رحمته بينا
مش بسبب شطارتنا او تمكنا او جوده العربيه انما هى اسباب مش اكتر
والحمد لله

بتحصلى كتير الرسايل الربانية ...بس اكتر رسالة غيرت حياتى معاها كانت بعد ما اتجوزت بحوالى 6 شهور ودة لما اكتشفت انى والحمد لله حامل وكأى زوجين كنا فرحانين والدنيا مش سيعانا والأهل والناس اللى بتبارك من قبل حتى المولود ما ييجى وبصراحة انا كنت فرحانة عادى عشان يمكن مستغربة الموضوع بس واللى يقوللى متجرييش ومتتنططيش والكلام اللى انتو عارفينة وانا عادى خالص واقول ان شاء الله المولود هييجى هما لية مكبري الموضوع أوى كدة

ومررررررررررررت الثمانية أشهر ودخلنا فى التاسع وبعدين نصة ووصلنا لأخرة ومفيش أى أعراض ولادة ناس كتير قاللولى عادى بتحصل كتير والدكتورة قالت لجوزى لازم تجيبها المستشفى عشان تولد وبصراحة انا كنت خايفة جدا لدرجة انى رحت عند دكتور تانى وقاللى انتى زى الفل دانتى لسة قدامك اسبوع كمان.. قلت الحمد لله.. بس جوزى كان مُصر انى لازم أروح المستشفى وبصراحة انا كنت بماطل لكن رحت معاة فى أخر يوم فى التاسع وكالعادة بدخل غرفة التحضير ومن هنا كانت الحكاية طبعا انا عرفت بعد كدة لية الدنيا كانت متوترة حواليا والدكتورة جاتلى فى أسرع من البرق ودة مكنش طبيعى ولقيت اخواتى وناس كتير بيسألو عليا قلت والله دة فيهم الخير بس كان فية همس غريب حواليا وانا كل اللى فى دماغى انى اغمض عينى وأفتحها ألاقى البيبى جنبى من التوتر اللى حاسة بية من نفسى مش من الناس وبعدين لقيت منظر غريب ماما قاعدة على باب الغرفة اللى انا فيها وبتدعى ربنا بشكل غريب ان ربنا ينجينى وحاجات كتير مش سامعة منها غير همهمات ودخلت باست ايدى واضطر اخويا وجوزى يخرجوها عشان متقوليش

انا عارفة انى طولت عليكو بس اللى حصل ان البيبى توفاه الله فى بطنى فى نفس يوم الولادة وكان فى نوع من الخطورة على حياتى دة اللى فسرت بية القلق اللى كان فى عيون كل اللى حواليا بعد كدة
المهم الرسالة كانت من الموضوع دة ايييييييييييييية
انى انا دايما كنت على خلاف دائم مع ماما وبعد اللى حصل دة تقريبا اتغيرت علاقتنا 360 درجة للأحسن طبعا وعرفت أد قيمة الأم كبييييييييرة ولايمكن توصف وذلك رغم ان الدكاترة كانو عارفين ان البيبى خلاص رغم ذلك ولدت طبيعى وحسيت بكل ألاام الولادة وأد اية الأم بتتعب جدا فى ولادتنا ما حال تربيتنا واتغيرت نظرتى للأم تماما وكانت دى البداية مع أمى والحمد لله الى الأن وبعد مرور خمس سنوات لم تشتكى منى ابدا
وعرفت ان دى رسالة ربانية لازم اتعلم منها حاجات مهمة جدا اولها حبى لأمى .

على فكرة ربنا رزقنى بعد كدة بمحمد وسهيلة وهما نور عيونى الاتنين وربنا عوضنى خيرا بيهم
ممكن اقول ان الرسال التانية هى الصبر على الابتلاء لأن بعدة بيكون فى تعويض كبير من رب العالمين .
والحمد لله على كل شئ .....

كلام سليم
فعلاً الرسائل الربانية من رحمة الله تعالى بنا
سواء كانت رسائل في المنام أو رسائل في اليقظة

لكن للأسف قد يتعرف عليها إنسان وقد لا يفهمها آخر
وهذا الأمر توفيق من الله سبحانه وتعالى وليس له علاقة بالنباهة أو بالذكاء

اللهم فهمنا وعلمنا وأدبنا وربنا وارحمنا واعف عنا

وفي الختام
باقي خمسة أيام في شهر البركة
والسلام عليكم ورحمة الله وبركاته