بتعمل إيه مع سايس العربية

**Sherif Sharaf** · 24-09-2008 01:56 PM

أنا خلاص يا جماعة مش طايق ......
أنزل اشترى حاجة من أى محل أرجع ألاقى المساحات مرفوعة، وواحد طول بعرض يقولى:"مع ألف سلامة يا بيه" .
طبعاً هو لا مسح العربية ولا حاجة وبالكتير رسملى خط بالفوطة على القزاز، وطبعاً لازم تدفع يا معلم.
أنا فى أحيان كتير أوى بطنش،بس المشكلة إن فيه ناس بتدفع، وده بيطمع ناس تانية أنها تقف الوقفة دى ولا شغلة ولا مشغلة، كل اللى بيعمله أنه يرفع المساحات (وساعات كمان بيكسل يرفعها) ويقولك "كل سنة وانت طيب يا باشا"..

أنا بأطالب بمقاطعة الشحاتين بالإكراه (قصدى السياس) عشان نقلل شوية من الظاهرة دى، لحسن دى بقت حاجة تخنق...

**hotboja** · 24-09-2008 02:01 PM

ايوة عندك حق دة كمان المشكلة ان فى اماكن كتير غريبة بيقفوا فية

زاى مركز البولنج فى مدينة نصر وارة البنورامة 6 سنين بروح هناك مفيش اى سايس

بس من اسبوع خلاص احتلو المنطقة هناك وبعد ما تلعب بولنج اتطلع هتلقى انتن هناك

كل سنة وانت طيب

مش مفاهم يعنى بعد كدة الوحد ينزل من اى حتة يتوقع سايس مستنيية مترابص بية

**MMamdouh** · 24-09-2008 02:06 PM

ولا اى حاجة... اكن مفيش اى جثة بتتكلم من اصلة... الا اذا الراجل بجد وسعلى مكان عشان اعرف اركن او وسعلى مكان عشان اخرجز

MMamdouh

**iBiZa** · 24-09-2008 02:17 PM

التجاهل التام (كأنة هوا يا سامح)

**شريف** · 24-09-2008 02:30 PM

مرة لقيت واحد شكلة غلبان اوى ماشى و السايس واقف مستنى اديلة فلوس رحت مدي للغلبان و نفضت للسايس اكيد اتفرس جدا D: . بجد ممثلين جدا و تلاقية بيعمل شوية حركات كانة معوق

**ArafatEHegazy** · 24-09-2008 02:53 PM

فعلا الموضوع زاد عن حده ....
حتي اللي بياخد مقابل انه بيخليك تركن ولا لأ ...بأ دلوقتي في جشع وكل يوم بتلاقي السعر عمال يزيد ...اللي كان بياخد جنيه دلوقتي عايز اتنين وثلاثه وموش عاجبه. تحس انهم فاكرين اللي راكب عربيه ده بيطبع فلوس في بيتهم وموش تعبان فيها ....يعني لو خارج كذا مشوار في اليوم وعندك كذا ركنه .....هتعمل ميزانيه مخصوصه للركن.

فعلا أحسن حاجه الواحد يطنشهم

**جمال** · 24-09-2008 03:49 PM

لو عمل حاجة مثل وسعلى مكان علشان اركن او ساعدنى فى الخروج يبقى اديله اللى فيه النصيب ( نص جنيه بحالة مثلا )
لو ماعملش حاجة و بيرمى جتته يبقى لما يقوللى كل سنه و انت طيب ارد عليه وانت بالصحة و السلامة و خلاص

**Noha.M** · 24-09-2008 03:53 PM

على حسب لو قدام النادى بتاعنا مثلا و عارفنى و دايما بيوسعلى مكان فبديه اللى فيه النصيب لكن نظام رمى الجتة دة بيحرق دمي اوى بس و بنفض طبعا
بس الحق يتقال انا بقيت بصطاد العيال الضغيرة اللى بتلمع العربية و اخليهم يلمعو و اقوله لو هتنضف نضف بجد و انا حاجى اعاين و هشوووف كل حتة انت حر بقا

**M!NA** · 24-09-2008 04:07 PM

السايس حسب نوعه و اسلوبه.... لو بلطجي و بيستهبل مش بستكفى أني مديلوش فلوس و بس ... لأ بحاول أرزعه أي كلمة
و لو ذوق بديله مبكسفوش

مرة كنت راكن عند السلاب - مكرم عبيد - لقيت حركة المساحات ديه معموله و لقيت الراجل جاي يجري أول ما شافني بفتح الباب

رحت اتنرفزت عليه و قلتله مين الحيوااااااااان اللي رفع المساحات كدا؟؟؟؟ قاللي دا واحد بيمسح عربيات في الشارع يا باشا
قلتله و هو فين
قاللي كان لسة هنا دلوقتي
قلتله دا حيواااااااان و رحت راكب و ماشي :d (طبعا كدا النتيجة واحد - واحد بيستعبط اسنعبطت أنا كمان)

مرة تانية بأة سايس و هو بيرجعني كان مادد رجله فدست عليها غصب عني... و الحمد لله محصلش حاجة... قلتله آسف مشفتكش
قاللي و لو دست على رقبتي كمان فداك

بصراحة الراجل ده من ذوقه كان نفسي أديله كل اللي معايا بس اديته جنيه يومها (من 6 سنين تقريبا)

الموضوع: بتعمل إيه مع سايس العربية

LinkBack

أدوات الموضوع

عرض

-

-

-

-

-

-

المواضيع المتشابهه

سايس الجراج اللى قدام الشغل بهدلى العربية بمسمار عشان مركنش !!!!!!!!

العربية بتعمل باك فاير عند التبطيل

العربية بتعمل باك فاير عند التبطيل

العربية بتاكل بنزين 50 لتر بتعمل 350 كيلو

العربية بتعمل ريحة بنزين جامدة قوي

الكلمات الدلالية لهذا الموضوع

المفضلات

المفضلات

ضوابط المشاركة