ساعدوني في حل هذه المشكلة

**aelsaid** · 24-09-2008 02:38 PM

إخوتي الأعزاء. سلام عليكم
أنا إشتريت بيكانتو و رحت أرخصها. الغريبة إن البصمة للعربية طلعت نفس رقم الشاسية اللي في ورقها لكن رقم الموتور الأخير مختلف عن الورق في آخر خانة 3 بدلا من 4 ؟؟؟؟
ما حدش إتكلم لحد دلوقتي و أنا سايب الورق في المرور مع واحد يخلصه و قال لي تعالى بعد ساعة خد الرخصة و النمر. الغريبة إن ورق العربية كله بنفس الرقم الغلط. كده حتى لو طنشوا المره دي معناها إن الفحص القادم إن شاء الله ممكن حد يرخم و أنا مش مرتاح
أعمل إيه

**poopoo_966** · 26-09-2008 12:38 AM

متقلقش كله خير ان شاء الله المفروض ان اوراق العربيه بما فيها الافراج الجمركى بتحمل رقم الشاسيه و الموتور كتابتا و بصمه كمان يعنى على الافراج هتلاقى بصمه واقعيه متاخده من الموتور اثناء تخليصها من الجمرك و دى طبعا هتبقى بالرقم الصح و على كدة اللى بيخلصلك ورق المرور بياخد نموذج فحص بالبصمه الحقيقيه و يروح المرور بيعدلوله الرقم الغلط اللى اتكتب سهوا و ان شاء الله كله يبقى تمام وصح الصح و ابقى طمنا عملت ايه

**osamaelbaz** · 26-09-2008 03:12 AM

انا كان عندى نفس المشكلة وبعت الورق الشركة اتعدل ورجع تانى

**aelsaid** · 26-09-2008 03:18 PM

مشكورين إخوتي على الردود
اللي حصل حااليا إن الرخصة طلعت فعلا على الرقم اللي في الورق و اللي مخالف للرقم الفعلي على الموتور و لي عندكم كام سؤال:
ورق الإفراج الجمركي كان لمجموعة من العربيات مش لعربيتي لوحدها و بالتالي ما كانش عليه بصمة أصلا
ثانيا كل الأوراق الآن في ملف العربية في المرور أبعت للشركة تصلح إيه؟؟
واحد قاللي خليهم في التوكيل يدقوا لك الرقم المختلف على الموتور الكلام ده صحيح؟؟
و شكرا جزيلا لإهتمامكم