الموضوع: صراع الوحوش: XTRONIC CVT من نيسان و CVT-iS من تويوتا...حقائق و مفاهيم

كلنا المفروض عرفنا دلوقتى بعض/ كل المعلومات عن الفتيس ال CVT اللى نيسان/رينو و تويوتا بيستخدموه حالياً فى عربياتهم....طبعاً فى الاخر الجيربوكس فكرة عمله الأساسية واحدة فى الكل و لكن كل الفكرة فى برنامج السوفت وير اللى بيحاكى النقلات و هو ده اللى السواق بيحس بيه فى الاخر
نبتدى بتوضيح بعض النقاط و هو ان ال CVT جيربوكس مفهوش تروس و لكن طارتين متحركتين مع قطر متغير ينزلق عليهم سير و تغير الاقطار مع انزلاق السير هو ما يحدد نسب التعشيق و الكلام ده كله بيتحكم فيه كمبيوتر تبعاً لظروف القيادة
مميزات ال CVT هو توفير حوالى ١٥٪ فى استهلاك البنزين عن الجير الاوتو العادى مع سلاسة غير طبيعية فى النقلات و تحقيق اقصى عزم موتور عند اقل عدد لفات
مشكلته احساسه الغريب فى السواقه مع وجود صوت ونه فى بعض الظروف و احساس سير بينزلق من على طاره فى بعض الاوقات و هو احساس غير محبب للسائق المحترف
نيسان اكبر شركة باعت جيربوكس CVT فى العالم و تويوتا اكبر شركة باعت عربيات فى العالم
حالياً نيسان بتستخدم احدث موديلات ال CVT و هو XTRONIC CVT فى سياراتها زى الماكسيما، ألتيما، فرسا، جوك و قشقاى و روج و طبعاً رينو فلوانس و ميجان
اما تويوتا فحالياً بتستخدم نسخة ال CVT المطور بتاعها و هو CVT-iS و هنا is معناها intelligient shift و بتستخدمه حالياً فى الكورولا ٢٠١٤ فقط كأول استخدام طبعاً عندها عربيات بتستخدم CVT عادى زى ال HYBRID

الفرق بين المدرستين
تويوتا اعتمدت على اراء بعض مستخدميها و محللين صحفيين جربوا ال CVT العادى ومعجبهمش مشاكله من ناحية احساس السواقة المختلف و صوت الونه و احساس السير اللى بينزلق و قعدت تطور فى النقطة دى لكى تحسن احساس النقلات ليكون اقرب ما يكون للجير الاوتو العادى و طبعاً ده كان على حساب القيادة الرياضية و استهلاك البنزين و ده سبب تسمية ال CVT بتاعها INTELLIGIENT SHIFT

نيسان على الناحية الأخرى لم تهتم بالتركيز على شعور السائق و احساسه بالنقلات معتمده على دراسه قوية للسوق الأمريكى و هى ان 90% من السائقين لن يستطيعوا تميز الفرق بين الجير الاوتو و ال CVT و كل همهم ان العربية يكون عزمها شديد و نقلاتها سلسه و موفرة فى البنزين و أخذت تطور فى هذه المنطقة و جعلت مواتيرها تصل لاحسن ادائها و اعلى عزمها اللى بيسموها ال SWEET POINT او ال G POINT بتاع الموتور اللى بيكون فيها فى احسن معدلات حرقه و اعلى عزمه عند اقل عدد لفات

انه مدرسة احسن؟
السؤال هنا انه مدرسة احسن؟ هل ال CVT-is بتاع تويوتا و احساسه القريب من احساس الاوتو مع عدم وجود اصوات او احساس سير بيقع او يفوت من على طاره فى بعض الحالات و لا مدرسة نيسان بال XTRONIC CVT اللى كان هما أفضل أداء لهذا الجيربوكس بغض النظر عن مشاكله الموجودة

كل شركة ليها وجه نظر تحترم....تويوتا فكرت ان هذا الفتيس مرحلة حالية و يجب تطويره ليماشى و يلائم المستهلك عكس نيسان التى رأت أن ال CVT عامة فكرة جديدة مستقبلية مستمرة يجب ان يتأقلم عليها السائق و لهذا عملت على تطوير مميزاته لترغب العميل فيه و تجعله ينسى عيوبه من أجل مميزاته أملاً فى استخدامه على الأمد البعيد

فكر يحترم لكل مدرسة و كل وحش سواء تويوتا او نيسان و فى الأخر دورنا هو التوضيح و القرار يرجع للمشترى

المشاركة الأصلية كتبت بواسطة hossam_elwani

وعلى الجانب اﻻخر مﻻك الكروﻻ 2014 منبهرين باداء الفتيس فيها

حسام باشا، معلش يمكن انا مكنتش واضح شوية
ال CVT اول ما نزل هو اللى كان فيه مشاكل زى ما شرحتها قبل كده اللى منها صوت الونه او الاحساس الغريب فى السواقه او احساس سير بينزلق من على طاره و كان مشهور كمان بخاصية ال RUBBER BAND EFFECT و هى ان فى حالة كبس دواسة البنزين للاخر العربية بتاخر لحظة و بعدين تطلع زى السهم
وقت ضغط الدواسة انت بتشد الاستك و بعدين مرة واحدة الاستك بينطلق كالسهم و ده سبب تسميته RUBBER BAND EFFECT
حالياً الجيل المطور اللى بين ايدينا اللى هو XTRONIC CVT مفهوش الكلام ده خالص او تقدر تقول قل الى درجة لا تشعر بها....انا حكمى لسه مش كامل علشان معملتش كيلومترات كتيرة و لكن اقدر اقولك ان ال feedback ايجابى جداً فى النقل و التجميع و متناغم جداً مع الموتور وافضل بكثير من الاستيب ترونيك مع الميجان II

قصد كلامى فى الموضوع ان تويوتا بعد ما طورت ال CVT بتاعها من هذه المشاكل ركزت اكتر كمان و كمان على احساس النقلات انه يكون طبيعى و لكن كان على حساب استهلاك البنزين
اما نيسان بعد ما طورت ال CVT بتاعها من هذه المشاكل اكتفت بتلافى عيوبه و ركزت اكتر مع تحسين اداؤه مع الموتور و استهلاك البنزين

الاتنين تم فيهم تلافى عيوب ال CVT العادى بنسبة كبيرة جداً