الموضوع: تغيير مياة التبريد 301

المية اللي نازلة في العريبة تغيرها ب 5 سنين أو بعد 200 ألف كيلو متر,
أيهما أقرب.

دول فترة صلاحية الأضافات اللي في مياة التبريد, واللي هما مانع التجمد وموانع الصدأ والمواد المزيته لطلمبة المياة
وممكن تفضل بنفس المية بعد المدة دي كمان, ولكن يفضل تغيرها عشان نحافظ علي دورة التبريد,

وللأسف صديقك أضحك عليه والمفروض كان يسأل قبل ما يصدق اللي قاله كدا زي مانت سئلت,
وزي ما موضح أستاذ حسام لما تيجي تغير سائل تبريد يفضل عدم غسل دورة التبريد في البنزين لأن دا اللي بيخلي الدورا يبدأ فيها الصدأ بسبب مية الحنفية اللي بتستخدم في غسيل الدورة واللي كلها أملاح ومعادن ومش بتخرج كلها بعد غسيل الدورة وبتسبب صدأ.

المشاركة الأصلية كتبت بواسطة HOSSAM99

قلبك جامد يا أحمد بك
تقعد المياه 5 سنين أو 200000 كم
خليهم 3 سنين أو 120 ألف كيلو متر زي ما جدول الصيانة بيقول

علي فكرة عربيتنا المازدا مو 97 المياه الأصلية فضلت في العربيه لغاية 2009 لا نقصت و لا لونها أتغير و منزلنهاش غير لما علبة الرياداتير العلوية أتشرخت و غيرناها

بالمناسبة ال301 بتاخد حوالي 6.5 ليتر لو فضيت السائل كله
غير كده و مع غسيل المحطة مش هتاخد أكتر من 4 و بالتالي في 2.5 ليتر مياه عادية في الدوره يبقي ده أول مسمار في نعش دورة التبريد
الصح تفضي و تزود سائل جديد بدون غسيل

والله يا حسام باشا أنا لو عليا بحب أمشي زي ما الجدول بيقول في الحاجات المهمة اللي زي سير الكاتينة وزيت الفتيس,
لكن مياة التبريد اللي بتنزل في بيجو وكل الجديد عموماً من نوع OAT
وحتي عربيتكم المازدا طالما فوق موديل ال 1996 هتكون في الغالب كانت OAT عشان كدا المية عاشت فيها 12 سنة.!!! بسم الله ما شاء الله بجد.

المهم المية الخضراء القديمة اللي هيا IAT كانت بتستخدم أضافات علي سائل التبريد كانت صلاحيتها بتنتهي بعد حوالي سنتين, أو 60 ل 100 ألف كيلومتر,

أما الجديد كله بيستخدم OAT أو HOAT
والأضافات دي بتزود عمر سائل التبريد لحد 5 سنين أو 250 ألف كيلو متر كا متوسط,,

ودا مثال علي نوع مياة من نوع OAT زي اللي بينزل في البيجو, الشركة اللي عاملاها ACDelco
موجودة في ، وكنت مصورها من بنزينه أمارات مصر في التجمع الخامس.



مكتوب علي العلبة تحت علي الشمال تحت كلمة محلول تبريد,
حماية لمدة 5 سنوات / 240.000 كيلو متر.


عموماً اللي يحب يغير قبل المعاد دا هوا حر طبعاً, ولكن أنا بقوله صلاحية المية الصحيح بتقعد قد أيه,
وأدي معانا مثال ممتاز من عربية أستاذ حسام فضلت 12 سنة من غير مشاكل ما شاء الله.

وعموما التغير مش مكلف, سواء سعر المياة الأصلية أو التغير,
بس الصح أنها تتغير صح,,
لأنها لو متغيرتش صح, ودورة مياة التبريد أتغسلت بمية حنفية في بنزينه,
هتبقي دي بداية موتها بالبطيئ بسبب الصدأ اللي هينتشر وياكل في كل حته فيها من مسامسير وطلمبة مياة وسدد في مواسير الرادياتير, ألخ.

يبقي الأفضل الواحد يسيبها لحد ما تبدأ تنتهي صلاحيتها, ويفكر يغيرها صح من غير ما يغسل الدورة بمية حنفية, يعني يغير بمية من نفس النوع, أو يغير بمية مقطرة مرتين تلاتة لحد ما ينضف القديمة.

وأنا برضه أعرف ناس كتير عدو ال 6 و 7 سنين علي المية الأصلية ولسه المية بحالتها ومفيش مشاكل لأن أساساً سائل التبريد الأساسي اللي هوا الأيثيلين جليكول صلاحيته مش بتنتهي.
اللي صلاحيتهم بتنتهي هيا الأضافات اللي علي سائل التبريد,
لكن المياة المقطرة و سائل التبريد بيفضلو شغالين من غير أي مشاكل.

ولو حد حابب يعرف ويقرأ أكتر عن ماء التبريد, دا موضوع كتبت فيه من شوية عن اللي أعرفه عن مياه التبريد,
http://www.nilemotors.net/Nile/40636...post3875434320