الموضوع: المرور رافض يرخص السيارة موديل 2015

المشاركة الأصلية كتبت بواسطة ابو هنا

السلام عليكم ورحمة الله وبركاتة
استلمت اوراق السيارة من التوكيل وكله تمام على موديل 2015م من افراج جمركي ومبايعات وفاتورة شراء ، ذهبت صباح السبت 1 / 3 / 2014م الساعة 8 صباحاً الى مرور ابيس بالاسكندرية وكنت تاني سيارة في الفحص ، خلصت كل حاجة في اقل من 15 دقيقة من
1- شراء الملف 17.5 جنيه ( حيطبئ ال 20 جنيه ) .
2- التامين الاجباري كل الشركات نفس السعر 320 جنيه .
3- طفاية حريق بافاريا 2 كيلو علشان السيارة 1600 ب215 جنيه متنساش تحفر رقم الشاسية على الطفاية .
4- مثلث وشنطة اسعافات 75 جنيه .
5 - رفع بصمة الشاسية والماتور .
6- ضريبة 3 سنوات على السيارة 776 جنيه .
كل الفات كوم والي جي كوم تاني خالص
مهندس الفحص رافض رفض نهائي تسجيل السيارة موديل 2015م وصباح الجعلصة الى في الدنيا ، رحت لقائد المرور كمل الجعلصة ، الولي روح لقائد الادارة المركزية بمرور محرم بك للتاشير على الملف بان لامانع من الترخيص موديل 2015 ، كل ده والساعة موصلتش 9 صباحاً ، استنيت لحد الساعة 10 وكلمت الوكيل والحمد لله جاء الفرج خلال نصف ساعة واتصلم بيا والولي ارجع للمهندس وقلة اتصل بالمهندس / مجدي كبير المهندسين بمرور محرم بك الادارة المركزية وهو حيخلص الموضوع وبالفعل رجعت للمهندس وقام بالاتصال بكبير المهندسين وقاله البيجو 301 الجديد الي بداة بشاسية حرف s حترخص موديل 2015م لحد كدة تمام ،
يطلع رقم الشاسية بتاعي مفيهوش حرف ( s )
المهندس قالي عيد البصمة تاني ، عدت البصمة تاني وجدت حرف ( s ) موجود في رقم الموتور وحرف ( f ) موجود في الشاسية ، افتكست للمهندس انه ياصد ان حرف ( s ) مطبوع على الموتور وليس الشاسية والحمد لله بلعها المهندس ، جعلصها الظابط وبعد وقت عداها الظابط ، جعلصها الموظف واخد الملف للظابط بالرغم ان الظابط اشر على الملف بالموافقة وبعد شويه وافق الموظف
والحمد لله رب العالمين رخصت السيارة موديل 2015 وكنت فار تجارب لموديل 2015
رجالة الاسكندرية اي حد يعترضه مهندس المرور بخصوص موديل 2015 قلة كلم المهندس مجدي كبير المهندسين .

الحمدلله انها عديت ومبروك عليك أول موديل 2015 فى ابيس :b4_388::b4_388:

المشاركة الأصلية كتبت بواسطة nodz

ايوه يا باشا انا من اسكندريه و تبع مرور ابيس و اتنفخت قوى لما وقف الترخيص بس التوكيل قالولى النهارده فيه ورقه حتجيلهم و حيكلمونى

شباب التوكيل كلمنى و قالولى ان المنشور طلع و اعتقد انو حيوصل على الاحد فحبيت اطمنكو

ياعم احمد ربنا انها جت على كدة ،
انا كنت برخص العربية فى مرور بلبيس ، الشرقية ، وبعد ماعملت الفحص ودفعت التامين واللذى منه ، وخلاص واقف على تاشيرة البيه اللى مكبر دماغة ، دخلت ااشر على الورق عشان اسلمه للموظف ويتسجل ، لقيته بيقوللى روح اعمل عليها استعلام امنى من الادارة فى الزقازيق ، حاولت اقنعه انا والمندوب اللى جاى معاى من اامعرض ان العربية لسة زيرو ومالهاش ورق تانى فى اى مكان غير الاوراق اللى فى ايدينا ، من ساعة مادخلت المينا لحد سيادته ، مافيش فايدة عايز استعلام امنى ، استعلام امنى على ايه انا مش عارف ، وكل ورق العربية فى ايدى ومالهاش نمر ولا اتسجل رقم الشاسية والموتور عندهم فى المرور ،،،
قمة الغباء الحكومى ، وروتين ابن ستين فى سبعين
مع العلم انى تانى يوم روحت رخصتها فى اسماعيلية ، خلصت الرخصة فى لا زمن

المشاركة الأصلية كتبت بواسطة nodz

شباب التوكيل كلمنى و قالولى ان المنشور طلع و اعتقد انو حيوصل على الاحد فحبيت اطمنكو

معنى كده مفيش حد هيعرف يرخص 2015 تانى؟؟؟

المشاركة الأصلية كتبت بواسطة ابو هنا

افهم من كده ان الحمد لله كله خلاص رخص موديل 2015 ولا لسة في مشاكل

كله تمام يا باشا
المنشور وصل من يوم 19-3 و كله بيرخص عادي 2015

انا الحمد لله رخصت فى العاشر من رمضان الخميس اللى فات ومحدش قال حاجه عن 2015