الموضوع: عربيتي اللي شاريها زيرو من " شكري هيونداي " طلعت مخبوطة ومرشوشة مش فابريقة

المشاركة الأصلية كتبت بواسطة ashturbo

السلام عليكم جميعاً وأسعد الله أوقاتكم ...

أمبارح روحت أسمكر وأرش باب عندي في العربية كان آخد حكة وقولت بدل ما تهين العربية روح أظبطها عند سمكري محترم ونزلت فعلاً حرفيين أسكندرية وهم أكتر ناس متمكنين في موضوع السمكرة والدهان والتوكيلات بتصلح هناك عندهم ويبيعولنا العربيات بعد كدة مخبوطة ومرشوشة


ندخل فالموضوع ... أنا يوم الأستلام كنت بشيك على العربية ولقيت فرق بسيط في الفانوس الخلفي يعني واضح أنه مفارق شوية عن الصاج وفرق لا يذكر ... ندهت الرجل وقولتله ايه الفرق ده قالي ولا حاجة يا باشا ده شغل المصنع ومفيش أصلاً فرق بيتهيألك طبعاً كلام البياعين المخادعين النصابين ( أنا ماسك نفسي مش هشتم متقلقوش ) المهم لأن العربية كانت لسة يادوي نازلة أول دفعة ومكنش في فمصر كلها من أول توكيل أسكندرية لحد الفرع الرئيسي في القاهرة لحد الموزعين المعتمدين لحد المعارض العادية مخلتش حتة الا وسئلت فيها على الفئة اللي فيها abs - dual airbag لأن كله كان فاضي ....

المهم " شكري هيونداي " وده للي ميعرفهوش هو أكبر موزع معتمد هيونداي هو ورمسيس في أسكندرية ... كنت مكلمه وبعد أسبوع جابلي العربية لون أسود وأنا كنت عاوز نبيتي أو بترولي بس قولت مش مشكلة المهم المواصفات اللي أنا عاوزها والأمان والكلام ده ....

نرجع للسمكرة تاني روحت عند واحد محترم جداً أول ما شاف الحكة قالي العربية دي فابريقة ؟

هنا أنا عملت زي كدة >>>> :b4_444:


أيوة ياسيدي فابريقة ومن عند شكري موزع هيونداي ضحك كدة ضحكة صفراء وقالي العربية دي مخبوطة ومرشوشة قبل كدة ولما هنفتح هتتأكد أكتر ...المهم من غير تطويل في الكلام العربية طلعت راشة باب ورا وأكصدام وده اللي كان فيه الشغل الله أعلم بقى الباقي كان مخبوط ولا لأ والعبد لله شاريها زيرو ودافع 5 ألاف أوفر برايس وطالع مبسوط وهو لابس أحلى خازوق ( مقدرتش أمسك نفسي معلش ) ..

المهم دلوقتي أنا عملت الموضوع ده علشان تاخدوا بالكم من " شكري هيونداي " الغشاش النصاب اللي أكيد عمل كده في كتير زيي .... عن نفسي سأتخد الأجراءات القانونية تجاه الموزع ده وهقدم شكوى في حماية المستهلك وهعمله محضر ومش هسيب مكان أو فرصة الا وأستغلها علشان أبين للناس غش وخداع التوكيلات والموزعين في بلدنا الحبيب مصر .

اولا: ربنا يعوض عليك وحسبي الله ونعم الوكيل في النصابين واوعى حد يستهون بكلمة(حسبي الله ونعم الوكيل) لانك بكده بترمي حمولك على ربنا وهو هياخذ حقك والحمدالله انها جت في العربية...والحسنات هتنهال عليك..
لو ينفع تبيع العربية على حالتها وطبعا تكون معرف الزبون.. وتجيب بثمنها اي عربية اخرى استعمال وتكون اوروبي..لانك كل لما تركبها هتفتكر انك لبستها..

حسبي الله
ربنا يعوضك خير معلش