الموضوع: خرطوم مية الردياتير ضرب فى البيجو 301 - أقرأ قبل ما ترخص

فعلا بيجو بقت زفت بدليل ان من اول فئه نازله بال abs و 2 ايرياج و صاجها محمل جدا جدا ما شاء الله.
العربيات كلها فيها عيوب و مش علشان غلطه فني البصمه احكم ع العربية كلها حتي لو العربية فعلاً فيها عيب صناعة شركه بحجم بيجو هتلاقي حل و بعدين من كام عربيه اتباعت حصلت المشكلة دي.
و مش هقول الكوري فيه و فيه بس بيجو عمرها ما تتساوي ب الصيني و لا الكوري

هو كل مشكلة في اليزية او 301 ناس تخوش تهيص كدة العربيتين بيحرقو ناس كتير

خير ان شاء الله
بس نصيحتى متسكتش عن حقك و العربية هتتصلح على حساب التوكيل ان شاء الله
بس موتور انهم يبدلوها بعربية تانية صعب جدا لان فى الحالة دى جهاز حماية المستهلك بيشترط تصليح العربية فى الضمان و لو تكرر هذا العيب مرة اخرى يتم تبديل السيارة بسيارى اخرى او تستبدل فلوسك ...

قدر الله وماشاء فعل وربنا ييسرلك حل المشكلة في اسرع وقت...

أنا ليا استفسار ياجماعة بخصوص اللمبه بتاعة الحرارة وظيفتها ايه بالظبط ؟ هل هي مؤشر علي ارتفاع درجة الحرارة قبل ماتؤدي الي حدوث مشكلة أكبر لأجزاء أخري من الموتور ولا ايه..هل دي بديل عن المؤشر المتدرج المعتاد في سيارات تانية اللي هو ممكن تلاحظه قبل وصوله الي درجة معينه وبالتالي تجنب حدوث مشكلة في الموتور مثلا ؟

أولاً احب أشكر كل الإخوة الأفاضل على تضامنهم معى فى الدفاع عن حقى, و كنت أتمنى إنى ابلغكم انى وصلت لنتيجة مرضية جداً أو حتى مرضية نسبياً, لكن الحمد لله على كل شئ اولاً و اخيراً, كانت النتجة هى الوصول لأقل الخسائر.

المختصر:

1- تحملت تكلفة نقل العربية, وكانت مبلغ 250 جنيه, الحمد لله حاجة بسيطة

2- تحملت جزء من إصلاح خرطوم مياه التبريد, فى الاول قالولى 350 جنيه, و عند الحساب كان مبلغ 166 جنيه فقط (أظن كانت محاولة مهذبه للترضية أو إعتراف بصورة مهذبة إنى انا مش المسؤل لوحدى عن العطل اللى حصل).

3- لم يتم إعطائى تقرير فنى بطبيعة المشكلة و أسبابها و حلها, حيث تم إبلاغى فى حالة الرغبة فى تقرير, بالتوجه إلى فرع صلاح سالم للحصول على التقرير بعد الإتصال بـ 19207 و طبعاً ده معناه إنى اسيب العربية عندهم كام يوم و اتشحطط فى المواصلات (زى ماحصل فى اليوم اللى إتعطلت فيه و رجعت فى تاكسى بعد نص الليل, و طبعاً كل لجنه لازم تقف و يسألك جاى منين و رايح فين).

4- بالمناسبة, بعد ما حاسبتهم, سألتهم على سعر تركيب نظام تثبيت السرعة للبيجو 301 هاى لاين, المهندس مصطفى قالى إن سعره 1000 جنيه, يا ترى هو ده فعلاً سعره؟

5- بعد أول ساعة من النقاش و الإقناع فيهم بخطأ التصميم و إنهم مسؤلين عن تكلفة الإصلاح و المسؤلية عن أى خطأ فى الماتور (ده لو لا قدر الله حصل), لما اخويا انفعل بعد ما اتقله ما معناه "يا تصلح على حسابكم او زى ما تحب" اتصل بواحد معرفة على التليفون عشان ياخد رأيه فى الموقف السخيف ده و بأمانه اخويا انفعل ووصف شركة بيجو بإنها شركة تيييت, المهندس مصطفى طلب من الإستاذ أيمن إنه يسجل كلام أخويا ده (أظن كانت محاولة للترهيب برفع قضيه علينا بتهمة السب و التيييت).

6- تم إبلاغى إنه بعد إصلاح خرطوم المياه, هايقوموا بعمل تشيك على الماتور للتأكد من عدم وجود اى تلفيات ناتجه عن إرتفاع حرارة الماتور (رغم إننا ركنا بمجرد ما سمعنا صفارة التنبيه), بس لو حصل قدام مشكلة فى الماتور لا قدر الله هاتكون برده مسؤليتى و مش تبع الضمان و انا المسؤول عن الإصلاح على حسابى (ربنا يسترها من عنده).

7- طبعاً فى الأخر الموضوع إنتهى بنظام تطييب الخواطر المصرى من طرفنا و من طرفهم (و خصوصاً مع الإحساس بالذنب اللى هما حسيسونا بيه نتيجة إنفعال أخى و وصفه لشركة بيجو إنها شركة تيييت) , مش هاقول إن تطييب الخواطر حاجة وحشه, لكنى لم أجد إعتذار عن سوء تصميم غرفة المحرك و اللى اتسببت فى كل المشكلة دى.

و فيما يلى هاحاول أوضح التجربة النهاردة و نتائجها بالتفصيل قدر الإمكان:

أولاً: وصلت لمركز ابو رواش مع اخى - مهندس ميكانيكا إنتاج واللى كان معايا فى العربية أثناء حدوث المشكلة فى خرطوم مياه التبريد - و قابلنا المهندس مصطفى و المهندس ماهر مدير المركز والاستاذ أيمن المسؤل عن العلاقات العامة أو خدمة المستهلك (شئ من هذا القبيل) , قاموا بشرح الخطوات اللى تسببت فى حدوث قطع خرطوم التبريد و هى, إن مروحة التبريد مثبته فى منطقة الشبكة أما الماتور, و ليقوم فنى الترخيص بقراءة رقم الماتور فقد أزاح / حشر الخرطوم ناحية المروحة و لم يقم بإرجاعه, و بالتالى تبقى مشكلتى أنا مش مشكلتهم هم.



ثانياً: تحدثت معهم بصورة منطقية, و أخبرتهم إنه حتى ولو بصورة فرضية أن ذلك هو ماحدث, يظل الخطأ واقع على شركة بيجو لسوء التصميم لعدم وضع شبكة أو فاصل ما بين خرطوم التبريد و بين مروحة التبريد, فأخبرونى أن فى أوروبا و الدول العربية لا يقومون بأخذ بصمة الماتور, و أن ذلك يحدث فقط عندنا فى مصر - أه و الله مش بهزر - و لما قولتلهم يظل ذلك خطا من جانب بيجو لعدم وضع تصميم حجرة المحرك بما يتوافق مع بيئة العمل - اللى هى مصر و مستوى الفنيين فى خدمة الترخيص فى مصر - مثلما تقوم الشركة بإضافة نظام الــ إى إس بى فى تركيا و دول أوروبا الشرقية - لا يوجد فى بيجو 301 عندنا فى مصر - حيث يتواجد عندهم الجليد, و إن عيب الصناعة يشمل عيب التصميم الذى لا يتوافق مع بيئة العمل, لماذا لم تراعى الشركة أن فى مصر تؤخذ بصمة الماتور؟ هل شركة بيجو شركة جديدة فى السوق المصرى و مش عارفه الإجراءات؟



للامانة لما قولتله كده (مش عايز اكون سبب فى قطع عيش حد, وعشان كده مش هاقدر أقول هو مين) , شوفت فى عينيه نوع من الإقتناع و إنه مقدر اللى انا بقوله, لكن دائماً كان فى إصرار لمحاولة تدوير الموضوع على فنى الفحص (خلينا نتكلم بصراحة, لو حد فيهم مهما كان مييييين إعترف إن كلامى منطقى و إن التصميم ده مش متوافق مع بيئة العمل فى مصر, هايقولوله اتفضل اقعد فى بيتكم).



زى ما إنتم شايفين اسئلتى كانت أسئلة منطقية - على الأقل من وجهة نظرى - فكان دائماً الرد يحمل المعنى المستفز و هو إما أقوم بالإصلاح على حسابى أو خلاص, برحتك, زى ماتشوف, للأمانه أنا مش متذكر الكلمات بالظبط, لكن بعد ساعة من النقاش كلماتهم إتسببت فى إستفزاز أخى بدرجة إنه قام بالإنفعال عليهم بشده - و الله أنا كنت بحاول أهديه من شده إنفعاله و وخوفى عليه يحصله حاجه من شده الغضب - فطلبوا مننا - الأستاذ أيمن - نطلع المكتب اللى فوق - عند المهندس ماهر - بعيد عن صالة إستقبال العملاء, طلعنا فوق معاهم و فضلنا فى نفس الدايرة, و لما قولتلهم مش هاستلم العربية, طبعاً قالولى اللى انت شايفه , و لما طلبت تقرير فنى - كما تم إخبارى عبر الهاتف بأن احضر إلى مركز أبو رواش و مقابلة مدير المركز للحصول على الكشف الفنى - تم إخبارى بأنى لن استلم التقرير الفنى منهم (و هو ما حدث), و إن أردت التقرير على الذهاب إلى صلاح سالم - و هنا أقسم بالله انا كنت على وشك الإنفجار فى وشهم - و خصوصاً لما الأستاذ ايمن المسؤل عن العلاقات العامة قال جملة إن شركة بيجو دى شركة دولية و مش معقولة تعمل خطأ فى التصميم, و هنا بقى إنفجرت نسبياً فى وشهم و قولتلهم "الشركة مش معقولة تعمل خطأ فى التصميم!, أمال العربية الـ 301 الـ 1200 سى سى و مشكلتها فى الجزائر دى كانت إيه؟"

طبعاً بعد ساعتين من المناقشة معهم و رفضهم التام لتحمل حتى مصاريف الصيانة - مش حتى النقل - و رفض تسليمى التقرير الفنى - قالولى إتصل ب 19207 و قدم شكوى و هما هايتصلوا بيك و بعد كده حدد معاهم إمتى تروح صلاح سالم تجيب التقرير.


زى ما أنتم شايفين, حاولت على قد ما أقدرت أدافع عن حقى - و الموضوع و الله ما هو مشكلة الــ 500 جنية مصاريف النقل و تكلفة الصيانة, أنا جايب العربية من معرض بسعر أعلى من سعر السوق لأنى محتاج العربية ضرورى و ماكنش ينفع أستنى 3 شهور, لكن الحاجة اللى أنا دايماً بتصيبنى بالحزن و الغضب هو عدم تقدير المستهلك المصرى و التعامل معاه و إعطاءه إنطباع إنه كم مهمل, يعنى أنا لم أقول إنى دافع فى العربية كذا و يحصل فيها خطأ ناتج عن سوء تصميم, تلاقى اللى يقولك - وهو ده اللى إتقالى - دى فى ناس جايبة بيجو بأكثر من 280 الف جنيه و حصل معاهم كده, يعنى إيه؟ يعنى من الأخر إحمد ربنا إننا ركبناك بيجو بالمبلغ ده؟!


ليه دايماً فى مصر لما واحد يدافع عن حقه فى الحصول على منتج جيد و خدمة ما بعد البيع جيده, تلاقيه بيتعامل من منطلق "يا عم إنت هاتفلق دماغنا بالـ ...... اللى إنتا دافعهم".


أقسم بالله على مدار سنوات عديدة من حياتى و بطبيعة عملى تعاملت مع مختلف الأجناس و الشخصيات من حول العالم, و لما واحد فيهم يدفع جنيه فى مقابل خدمة, و كأنه أنقذ حياتك, و إحنا هنا فى مصر بندفع مئات الألوف و نعامل من منطلق سياسة "ألامر الواقع, زى ماتحب, اللى إنت شايفه, يعنى إنت عايز إيه, ....." .


المشكلة الأكبر إنى أنا متأكد إن جميع عملاء الماركات الأخرى بيمروا بنفس المشكلة اللى أنا عديت بيها أو أكثر, و كأن هو ده الشئ الطبيعى للتعامل مع المستهلك المصرى.


فى دول تانية كتير ما بتستهلكش نص الإستهلاك المصرى و المستهلكين بيعاملوا أحسن معامله من الشركات لإنهم منظمين نفسهم و بيتاضمنوا مع بعض, مش معنا كده إننا هانقف جنب بعض فى الباطل و نشجع بعض فى الباطل و نظلم الشركات, لكن زى ما الشركات بتاخد الفلوس اللى هى طلبتها - بالمناسبة سعر العربية البيجو 301 هاى لاين فى السوق الأوربى حوالى 10000 يورو - يعنى حوالى 97000 جنيه مصرى - و هنا فى مصر بنشتريها بما يعادل حوالى 15000 يورو, طبعاً بعد اليورو ما ولع, يبقى أنا من حقى إنى أحصل على منتج جيد و على خدمة ما بعد البيع جيدة.


و اكتر حاجة أنا سعدت بيها هى وجود منتديات مصرية متخصصة زى منتدى نايل موتورز, عشان نقدر نشارك افكارنا و أرائنا و تجاربنا و نقدر ندافع عن حقوقنا, فى الأول النتيجة مش هاتكون مرضية ليا أو لبعض الأعضاء, لكن مع الوقت و التضامن و المشاركة هايكون معمولنا الف حساب كمستهلكين, و اتمنى اننا فى المستقبل القريب نخرج من دائرة المستهلكين اللى بيطالبوا بحقوقهم, لمنتجين و مبدعين العالم كله يشهد بيهم.


هى دى تجربتى مع مشكلة خرطوم مياه التبريد اللى إتقطع من مروحة الردياتيرفى البيجو 301 هاى لاين - و اللى وفقاً لكل المهندسين فى مركز أبو رواش إنها ناتجه عن سوء تعامل من فنى الترخيص بالمرور - و أتمنى إن التجربة دى تفيد الأعضاء مثلما استفدت الكثير من تجاربهم, و أتمنى من الله إن مافيش حد يمر بنفس التجربة المزعجة دى.

المشاركة الأصلية كتبت بواسطة MHeikal

قدر الله وماشاء فعل وربنا ييسرلك حل المشكلة في اسرع وقت...

أنا ليا استفسار ياجماعة بخصوص اللمبه بتاعة الحرارة وظيفتها ايه بالظبط ؟ هل هي مؤشر علي ارتفاع درجة الحرارة قبل ماتؤدي الي حدوث مشكلة أكبر لأجزاء أخري من الموتور ولا ايه..هل دي بديل عن المؤشر المتدرج المعتاد في سيارات تانية اللي هو ممكن تلاحظه قبل وصوله الي درجة معينه وبالتالي تجنب حدوث مشكلة في الموتور مثلا ؟

ربنا يبارك فيك و شكراً جزيلاُ على مساندتك

بالنسبة لسؤالك, الإجابة نعم, أنا سألت المهندس ماهر فى بيجو أبو رواش النهارده على نفس السؤال - لأنى بعتبر ده عيب فى تصميم العربية, رغم إنها مميزة بمواصفات كتير - و كانت إجابته إن اللمبة لما تنور - مافيش مؤشر حرارة تدريجى زى معظم العربيات بما فيها العربيات القديمة - يبقى لازم تقف فوراً لإن حرارة المحرك وصلت لفوق الـ 97 , ولو فضلت سايق ده ممكن يتسبب فى إحداث تلفيات فى المحرك.

و السؤال هنا, مش ممكن الشركة تضيف سوفت وير يضيف اوبشن يظهر درجة حرارة الماتور على شاشة كمبيوتر الرحلات؟

لإن نفس الشاشة ظهر عليها جملة "Please stop the engine" لما عربيتى سخنت واللمبة الى فى التابلوه نورت, طيب ليه مايبقاش فى خاصية منها اقدر اشوف درجة حرارة المحرك فى أى وقت؟