خرطوم مية الردياتير ضرب فى البيجو 301 - أقرأ قبل ما ترخص

**Ashraf Fawzy** · 04-03-2014 08:59 PM

المشاركة الأصلية كتبت بواسطة raad13

فيه عضو معانا حصلتله نفس المشكلة من 3 شهور تقريبا!! بس احقاقا للحق شركة بيجو ملهاش ذنب ان فني المرور حمار و معندوش ضمير و بيحشر الخراطيم في المروحة!! على العموم اي حد يرخص عربيته بعد كدة اول حاجة يعملها انه يفتح الكبوت و يتاكد ان كل حاجة مكانها و الأفضل انه يكون مصور شوية صور عشان يقارن قبل و بعد الترخيص

طبعاً شركة بيجو مش متعمدة إن تصميم غرفة المحرك مش متناسبة مع بيئة العمل فى مصر حيث أن مستوى فني التراخيص مش عالي. بس برده مش معقوله تكون الشركة مش واخده بالها إن فى مصر بنحتاج ناخد نمرة الماتور و ده معناه إن الفنى هايحرك الخرطوم ناحية مروحة التبريد و ممكن ينسى يرجعه, يبقى الشركة المفروض تحط شبكة لمروحة التبريد أو تحط عازل ما بين الخرطوم و المروحة.

و برده الشركة متحملة مسؤلية عدم التنبيه على العملاء من خلال الموزعين إنهم يخدوا بالهم من مشكلة قطع خرطوم مياه التبريد عند أخذ نمرة الماتور, و خصوصاً إن زى ما حضرتك قولت, إن المشكلة دى حصلت قبل كده, يعنى مش لازم أستنى لما يبقى فى عشرة عشرين ثلاثين عميل يقعوا فى نفس الموقف السخيف ده عشان ابدأ أنبه.

و بالمناسبه أنا جايب العربية من أحد فروع الشركة اللى موجوده على موقعهم الرسمى, و فى كل الأحوال بمجرد ما بتشترى العربية بيتم تسجيل رقم هاتفك عند شركة بيجو, يعنى عملية التنبيه مش هاتكون شئ صعب جداً, و العملاء هايحسوا إن الشركة بتابعهم و بتاخد بالها منهم.

**bassem_foda** · 04-03-2014 11:25 PM

الاخ العزيز
حاول تراسل شركة بيجو الام (الشركة الرئيسيه) وتفسر ليهم مدى سلبية وكيل بيجو بمصر
على ان يشمل رسالتك بيانات السياره

وربنا يوفقك

**ali tmam** · 05-03-2014 08:49 AM

المشاركة الأصلية كتبت بواسطة Ashraf Fawzy

ألف مبروك على الترخيص, ربنا يرزقك خيرها و يكفيك شرها. و الحمد لله إنك قريت الموضوع قبل الترخيص و نبهت على الفنى.

و ياريت شركة بيجو تقبل إقتراحى ليهم و تنبه على العملاء الجداد من خلال التليفون أو من خلال معارض البيع إنهم ينبهوا على الفنيين بتوع الرخصة زى ما انت عملت, ده بيسمى الأمن الوقائى.

للمرة التانية الف مبروك و ربنا يباركلك فيها, بالمناسبة, متنساش تجيب قفل دريكسيون أو قفل كاوتش - عجلة - عشان الظروف اللى بتمر بيها البلد اليومين دول.

طبعاً البيجو 301 فيها نظام إيموبليزر, يعنى العربية مش هاتدور - ولا حتى الدريكسون هايتحرك من مكانه - إلا لما تكون بتستخدم مفتاح العربية اللى فيه شريحة إلكترونية مشفرة مرتبطه بمحرك عربيتك, بس الحرص الزيادة مايضرش فى الظروف دى.

الله يبارك فيك استاذ اشرف وان شاء الله تكون اخر المشكلات واشكرك على النصيحة وربنا يباركلنا جميعا فى عربيتنا ويبعد عنها العين والحسد والناس الغشيمة

**Ashraf Fawzy** · 05-03-2014 12:09 PM

المشاركة الأصلية كتبت بواسطة ali tmam

الله يبارك فيك استاذ اشرف وان شاء الله تكون اخر المشكلات واشكرك على النصيحة وربنا يباركلنا جميعا فى عربيتنا ويبعد عنها العين والحسد والناس الغشيمة

أمين, بالمناسبة انت ناوى تأمن على العربية؟ و هل فى شركة تأمين ترشحها؟ أنا دورت فى قسم التأمينات بس المعلومات قديمة شوية - من حوالى 3 - 5 سنين - و كنت عايز أأمن عليها ضد السرقة و الحوادث و عايز شركة تكون عندها مصداقية و سرعة فى التعامل.

**daylight_1986** · 05-03-2014 01:23 PM

علي فكره مشكله حضرتك هي مشكله كل مستهلك في مصر موضوع خدمه ما بعد البيع لان مفيش عندنا منظمات مجتمع مدني بجد تحافظ علي حقوقنا يعني حضرتك مش دافع مبلغ هايف عشان المعامله تبقي بالطريقه بتاعه يا ترضي يا اما شوف انت عايز ايه انا رايي بجد بما اننا قدرنا نعمل موقع كويس زي ده يبقي بجد عندنا فرصه اننا نعمل حاجه اهم يعني فيها ايه لو عملنا اعلان في التلفزيون عن مشاكل توكيلات السيارات في مصر نرفع قضيه نفكر اننا نعمل اي حاجه غير كلمه معلش والحمد لله انها جت علي قد كده عيب بجد لما يبقي كل بلاد العالم لما بتحصل مشكله في العربيات بتتسحب وبتتصلح علي حساب الشركه الا في مصر والي سافر فينا بره عارف كويس قوي يعني ايه خدمه ما بعد البيع بجد لازم نلاقي حل وانا معاكو في خطوه عايزين تعملوها بس بجد كفايه قوي استغلال لحد كده مش يبقي الواحد دافع في العربيه اكتر من تمنها في بلادها ومع ذلك كمان مهضوم حقه في خدمه ما بعد البيع بجد حاجه تحرق الدم بجد ربنا يكون في عونك بس بجد مش عايزين نسكت

**ali tmam** · 05-03-2014 06:09 PM

المشاركة الأصلية كتبت بواسطة ashraf fawzy

أمين, بالمناسبة انت ناوى تأمن على العربية؟ و هل فى شركة تأمين ترشحها؟ أنا دورت فى قسم التأمينات بس المعلومات قديمة شوية - من حوالى 3 - 5 سنين - و كنت عايز أأمن عليها ضد السرقة و الحوادث و عايز شركة تكون عندها مصداقية و سرعة فى التعامل.

اخى العزيز موضوع التامين ده انا سالت فيه وكانت اغلبية الاراء او بمعنى اصح الفتاوى تقضى بحرمانيته وبصراحة انا مرتاح لهذا الراى وبعدين انا بصراحة اى مسالة بلاقى فيها شبهة الحرام بحاول ابعد عنها وربنا سبحانه وتعالى بيقدر ليا الخير دائما هذا راى ولحضرتك حرية الراى واتخاذ القرار

**Ashraf Fawzy** · 05-03-2014 11:47 PM

المشاركة الأصلية كتبت بواسطة medori

استاذ اشرف، هو فعلا المشكلة من فنى الكشف، و كان حصل مع واحد هنا قبل كدة و صلحوة على حسابهم بس واضح ان الموضوع اتكرر معاهم اكتر من مرة فلقوها هتخسر معاهم بالمنظر دة، اعتقد انهم حاسبوك على اقل حاجة ممكن تدفعها اللى هى تمن الخرطوم بس من غير مصنعيات و لا ضرايب كنوع من التعاطف مع مشكلتك.

بصراحة المشكلة دى اول مرة اسمع عنها فى اى عربية و مخدتش بالى فى الميجان كان الخرطوم ماشى ازاى، فياريت اللى معاة عربية تانية يشوف اية الفرق فى مكان الخرطوم عن ال301 و يقولنا ممكن نحركوا ازاى عشان نبعدة عن المروحة عشان فعلا بعد كدة لو اتعملت حاجة برة و الميكانيكة حرك الخرطوم ميوديناش فى داهية.

خلى تعاملك دايما مع صلاح سالم لو حاجة صغيرة او سريعة و مع الفرع الرئيسى بتاع غمرة لو حاجة جامدة لأن ناس كتيرة اشتكت من توكيل ابو رواش دة و متقلقش على الموتور بدل خدت بالك من اللمبة و وقفت يبقى إن شاء الله سليمة و مفيش ضرر حصل

هو كشف الحساب كالأتى:

خرطوم مياه - كوليه مياه وسط : 84 جنيه

مصنعية تغيير خرطوم مياه علوى: 65 جنيه

ضريبة مبيعات: 15 جنيه و عشرة قروش

2 جنيه و اربعين قرش (قطع غيار (م) )

يبقى الإجمالى كله 166 جنيه و خمسون قرشاً

ربنا يبارك فيك على النصيحة الخاصة بأماكن الصيانة و إنك بتطمنى على الماتور, و الحمد لله إن التنبيه الخاص بحرارة الماتور بيتم من خلال لمبة التابلوه و من خلال شاشة الس دى, ولحقت أقف فوراً لان الطريق كان يسمح.

**Ashraf Fawzy** · 06-03-2014 12:03 AM

المشاركة الأصلية كتبت بواسطة ali tmam

اخى العزيز موضوع التامين ده انا سالت فيه وكانت اغلبية الاراء او بمعنى اصح الفتاوى تقضى بحرمانيته وبصراحة انا مرتاح لهذا الراى وبعدين انا بصراحة اى مسالة بلاقى فيها شبهة الحرام بحاول ابعد عنها وربنا سبحانه وتعالى بيقدر ليا الخير دائما هذا راى ولحضرتك حرية الراى واتخاذ القرار

ربنا يبارك فيك يا أستاذ على, على النصيحة و ربنا يكتب لينا اللى فيه الخير, مبدئياً فى أول بحث لى عن التأمين على السيارات و وجدت هذه الفتوى من دار الإفتاء المصرية و التى تبيح التأمين على السيارات, سأقوم بالمزيد من البحث و الله الموفق لما فيه الخير لنا جميعاً:

الفتاوى - حكم التأمين الشامل على السيارات

و هنا أيضاً مشاركة من احد الإخوة الكرام فى المنتدى عن مسألة التأمين على السيارات (خصوصاً و عموماً) و حرمانيتها:

حكم جمهور العلماء في التامين على السيارة ونوعه

**Waleed_Fathy** · 06-03-2014 12:34 AM

حصل معايا النهارده نفس الموضوع و انا برخص و ربنا سترها و لحقت الخرطوم قبل المروحه ما تقطعه
يا ريت الناس تاخد بالها
و ربنا يستر

**a7medsh3rawi** · 06-03-2014 12:49 AM

ما تصدقوش انها مشكله خرطوم يقطع مروحة لان اى عربيه مروحتها ليها داير بلاستيك بيحميها مش مروحة سقف علشان تقطع اى حاجه حواليها .. دا من ايام السبعينات كمان.
ودى اشكال المراوح :

وبعدين حتى لو الفنى طلع وقف على الخرطوم ومشى عليه مش هيتقطع من فوق ابدا .
الا لو بياخد البصمه بالليزر فجرى منه وقطع الخرطوم ( وانا استبعد تماما الموضوع دا )

اللى حضرتك عملته مع التوكيل دا اكبر دليل على ان مصر لسه فيها رجاله وبياخدوا حقهم لانهم اتعودوا مننا على السلبيه وعدم اللامبالاه وهم غلطانين من ساسهم لراسهم ومطلوب منهم انهم يحققوا مكسب حتى لو بالنصب والكذب والخداع .

احتسب عند الله عز وجل واصبر على الابتلاءات .