العربيه شكلها فوتت:( محتاج مساعده فى موتور استيراد للكليو

**TMenshawy** · 05-03-2014 11:36 PM

السلام عليكم,

أنا معايا كليو 2002 1200سى سى. العربيه بقالها كذا شهر الزيت بينقص منها بمعدل كبير. بدأت الاحظ الأرض تحتها بس عمرى ما لقيت زيت واقع على الأرض. بعدها لاحظت بعد رفع العربيه انها ملطخه زيت كتير من تحت.

المهم رحت للميكانيكى (واحد متخصص فى الرينو) أكتر من مره وقعد كل مره يقولى على سبب محتاج يتصلح: مره وردة الطبه, مره غطا فلتر الزيت, مره ان خرطوم الباور مرشح (مع ان زيت الموتور هوا اللى بينقص!) وأخر حاجه كرتيرة الزيت محتاجه تتقفل بسيليكون حرارى. المهم بعد تغيير كل قطع الغيار وحل كل المشاكل دى, لقيت ترشيح الزيت لسه موجود فى العربيه من تحت.

بعد أخر مره كنت عند الميكانيكى بكام يوم لقيت دخنه بيضه بدأت تطلع من الشكمان وازدادت يوم عن يوم :( رحتله تانى, قالى يبقى الزيت بيتحرق مع البنزين والموتور محتاج طقم شنبر أو على الأقل وش السلندر محتاج روديه مع تغيير كاوتش الصبابات ( مع العلم ان سحب العربيه كويس). بس نصحنى انى الأحسن أغير شورت بلوك (موتور من غير جير بوكس) بواحد استيراد علشان أخلص من المشكله دى حيث ان العمرة الكامله أو النص عمرة أخرها سنه أو اتنين وهحتاج أعملها تانى.

ياريت لو حد يقدر يساعدنى ويجاوب على الاتى علشان أعرف أحسن حل وأتصرف ازاى من غير ما يتضحك عليا:

1) ايه هوا الروديه؟ هل المقصود كشط وش السلندر؟

2) هل صحيح ان الشغل فى وش السلندر أو تغيير الشنابر مش بيدوم وهيحتاج يتعمل كل سنه أو اتنين؟

3) ازاى أعرف اذا كان الموضوع بسبب وش السلندر (وساعتها محتاج روديه مع تغيير كاوتش الصبابات) أم بسبب البساتم (وساعتها محتاج طقم شنبر)؟

4) ايه الأحسن: تعميير الموتور القديم أم شراء استيراد؟

5) هل حد عنده فكره عن سعر الشورت بلوك الاستيراد بالتركيب؟ ايه أخبار الضمان وازاى أتأكد ان حالته كويسه ومش متعمر؟

6) هل الأحسن انى اشترى الشورت بلوك من تاجر استيراد وأخلى الميكانيكى يركبه أم أروح لفرنش موتورز وهما يعملو الموضوع من أوله لأخره بس بسعر أعلى؟

7) لو المشكله الاساسيه فى نقصان الزيت هوا احتراقه مع البنزين, ايه سبب ترشيح الزيت من تحت؟

8) هل لو فكرت أبيع العربيه بحالتها كده, فى حد هيشتريها بسعر معقول؟ ولا هيخسفوا بتمنها الأرض؟

شكرا ليكم مقدما وأسف على الاسئله الكتير بس دى أول مره اتحط فى موقف زى ده والدنيا مش واضحه بالنسبه ليا!

**medohai510** · 06-03-2014 01:10 AM

للأسف شغل العمرات في معظم المواتير الحديثة لا تدوم العمرات فيها طويلاً لأسباب كثيرة منها الصانيعي وقطع الغيار المضروبة
لكن يوجد بعض الاعضاء جربوا العمرة ونجحت الحمد لله
قبل ما تعمل أي حاجة أسئل علي الموتور الاستيراد عند حد مضمون
زعتر - بشطر - ......
والله الموفق

**TMenshawy** · 08-03-2014 05:30 PM

المشاركة الأصلية كتبت بواسطة medohai510

للأسف شغل العمرات في معظم المواتير الحديثة لا تدوم العمرات فيها طويلاً لأسباب كثيرة منها الصانيعي وقطع الغيار المضروبة
لكن يوجد بعض الاعضاء جربوا العمرة ونجحت الحمد لله
قبل ما تعمل أي حاجة أسئل علي الموتور الاستيراد عند حد مضمون
زعتر - بشطر - ......
والله الموفق

شكرا لردك... للأسف مش لاقي عند زعتر أو عصام بشتر. أنا لقيت عند 3 أماكن بس فى تفاوت فى السعر غريب:
1) رينو الأصدقاء اللى فى شارع المرسيدس, طالب فيه 3500 بس أنا عمري ما اشتريت منه حاجه قبل كده.
2) الشيخ جمال ب3200.
3) الصعيدى ب2800.

هل تعرف رينج الشورت بلوك لكليو 1200سى سى حوالى كام؟
أصل فرينش موتورز عندهم برده وقالولى انهم بيبيعوا ويركبوا. الشورت بلوك عنده ب3800 (غير المصنعيه) بس هيقيسلى الكبس ويدينى ضمان شهر. فهل أتكل على الله معاهم (مع انهم أغلى حوالي 600-700 جنيه)؟

حاجه كمان, هل تعرف الموتور القديم ممكن يتباع ويجيب كام؟

شكرا مقدما.

**أسامه الحسيني** · 23-08-2014 01:39 PM

المشاركة الأصلية كتبت بواسطة tmenshawy

شكرا لردك... للأسف مش لاقي عند زعتر أو عصام بشتر. أنا لقيت عند 3 أماكن بس فى تفاوت فى السعر غريب:
1) رينو الأصدقاء اللى فى شارع المرسيدس, طالب فيه 3500 بس أنا عمري ما اشتريت منه حاجه قبل كده.
2) الشيخ جمال ب3200.
3) الصعيدى ب2800.

هل تعرف رينج الشورت بلوك لكليو 1200سى سى حوالى كام؟
أصل فرينش موتورز عندهم برده وقالولى انهم بيبيعوا ويركبوا. الشورت بلوك عنده ب3800 (غير المصنعيه) بس هيقيسلى الكبس ويدينى ضمان شهر. فهل أتكل على الله معاهم (مع انهم أغلى حوالي 600-700 جنيه)؟

حاجه كمان, هل تعرف الموتور القديم ممكن يتباع ويجيب كام؟

شكرا مقدما.

موضوع محير فعلا بس انا لو مكانك يبقي فرنش موتور وضمان شهر واشترى دماغي