الموضوع: صلاحية الزيت

المشاركة الأصلية كتبت بواسطة borio1704

بغض النظر دلوقتي عن مدة صلاحية الزيت كام ...

إنما ما حدش من الإخوة الزملاء فسر لنا إيه سبب تغير خواص الزيت لما يخرج من العلبة


أنا مثلا عندي أحد الأسباب ... بس هل هو ده السبب الوحيد؟؟

أحد الأسباب المهمة في قصر عمر الزيت وبالذات لما تكون العربية ما بتمشيش هو طريقة تشغيل العربية نفسها..


إزاي؟؟


معظم الناس اللي ما بتمشيش بالعربية مسافات طويلة أثناء السنة بيبقى حاجة من اتنين..

يا إما واحد عنده وسيلة انتقال تانية طول الأسبوع (باص العمل مثلا) وما بيخرجش بالعربية الخاصة بتاعته إلا في نهاية الأسبوع

أو واحد كل مشاويره قريبة من بيته... فما بيعملش كيلومترات كتير


الحالة الأولى أحسن من التانية بمراحل

ليه؟؟


أوحش حاجة لزيت العربية إنك تشغلها وتتحرك بيها.. وبعدين قبل ما العربية والزيت يلحق يسخن تكون سيادتك وصلت المكان اللي عايز تروحه.. فتقوم طافيها.


طيب إيه اللي بيحصل؟؟


المشكلة الأساسية إن الموتور بيكون بارد.. ومع بداية التشغيل بيحصل تهريب لبعض نواتج الاحتراق (العادم) إلى داخل البلوك نتيجة إن الشنابر لسه ما تمددتش وما أخدتش وضع التشغيل الصحيح


العادم ده بيبقى فيه مركبات كبريت... بخار مية.. كربون.


لو الموتور فضل شغال فترة طويلة نسبيا (حوالي نص ساعة داخل البلد أو مسافة أكتر من 15 كيلو).. المركبات دي وبخار المية بيطلعوا من فتحة الفايظ (PCV) وبترجع تتحرق مع البنزين

إنما لو طفينا الموتور بدري... المركبات دي بتفضل موجودة جوه البلوك.. وتتفاعل مع الزيت وتفقده خواصه

فيه ظاهرة معروفة عند كل الناس اللي بتمشي مشاوير قصيرة كتير بعربياتها.. عندهم غطاء الزيت بيلاقوه معرق ميه من جوه


الظاهرة دي لا يمكن تلاقيها في عربية شغالة وبتعملها 20 كيلو مثلا في المشوار الواحد.


ده السبب الرئيسي اللي علشانه بيقولوا في الكتالوجات إنك لما تكون بتعمل مشاوير قصيرة كتير لازم تغير الزيت على مدد ومسافات أقل... وبيعتبروا ده من أساليب القيادة الشاقة


طبعا... معظم الناس شايفة إنه لما بيتحرك بالعربية مسافات قصيرة يبقى كده محافظ عليها...



للأسف لأ...



عموما.. يا ريت لو حد عنده سبب علمي تاني يقولنا.



...

احسنت