مطلوب نصائح قبل اما اروح أستلم ال301 النهاردة

**raad13** · 10-03-2014 09:36 AM

ان شاء الله و من غير مقاطعة المفروض هروح استلم العربية النهاردة من توكيل صلاح سالم, اتمنى اخد شوية نصائح للناس الخبرة في مرحلة الأستلام حتى مرحلة الترخيص

**rock82egy** · 10-03-2014 09:57 AM

ممكن ياباشا تقلي التوكيل كلمك امتي علشان يقلك ان الاستلام النهارده

اصلي المفروض كنت استلم امبارح بس الورق كان ليه مخلصش

فقالولي حنحاول نسلمك النهارده برضه

والف الف مبروك مقدماً

**Motaz Younis** · 10-03-2014 11:01 AM

الف الف الف مبروك .. ربنا يكفيك شرها ويديك خيرها يارب .. بس بعد اذنك عاوز اعرف انت ليه اخترت ال 301 بالذات .. اصل انا ناوى اشترى الفترة اللى جايه ومحتار لسه ..

**yasserelshakwe** · 10-03-2014 11:59 AM

بالتوفيق إن شاء الله
ولكن خد معاك واحد ميكانيكي ويكون صديق جداً لك علشان اصحاب التوكيلات أو أصحاب المعارض يوجد بهم شوية نصابين ممكن يعطوك سيارة عامله حادثة قبل كدة
واشتريها في الصباح وحذاري ان تشتريها في الليل ولو حتى تحت الاضواء الكاشفة في استاد القاهرة
وبالتوفيق ان شاء الله

**smsm2004w** · 10-03-2014 01:46 PM

بالتوفيق ان شاء الله مفيش مشكلة طالما هتستلم من التوكيل بس هتلف حوالين العربية تتأكد ان مفيش خدوش او خبطات وبعدين هتجرب كل حاجة جوه العربية الكاسيت والفلاشة السماعات الكراسى البارك سينسور الأنوار الولاعة التكييف وبعد الأستلام تروح على اول بنزينة تفول لأن العربية بينزلوها فاضية واول بتاع كاوتش تضبط الهوا على 31 و الف مبروك

**S O P H O S** · 10-03-2014 06:02 PM

شكل حضرتك روحت
عموما ربنا يوفقك ومبروك مقدما

**Ashraf Fawzy** · 10-03-2014 07:34 PM

اولاً الف مبروك على العربية, و هى عربية جميلة و مليئة بالمميزات, ربنا يباركلك فيها و يديلك خيرها و يكفيك شرها.

هاضيف نصيحة مهمة جداً بالإضافة لنصائح الأعضاء الكرام, لما تيجى ترخصها, نبه على فنى المرور لما يجى ياخد نمرة الماتور مايحشرش خرطوم مية الردياتير عند مروحة الردياتير, لإن ده هايتسبب فى قطع خرطوم مية الردياتير, و للأسف الموضوع ده حصل مع العديد من ملاك السيارة و انا كنت منهم.

خد صورة اول ما تفتح الكبوت, وقارن بيها بعد الفنى ما ياخد البصمة, وخليك واقف عينك عليه و إنه مايزحش حاجة من مكانها.

**raad13** · 11-03-2014 10:31 AM

للأسف روحت امبارح عشان اكمل الفلوس و استلم العربية الراجل قالي العربية مش موجودة في صلاح سالم دلوقتي لكنها في ابو رواش و هنخلص ورقها و تستلمها بعد يومين!! على العموم شكرا لكل النصائح القيمة و يا ريت لو حد يعرف شركة تأمين كويسة يقولي عليها

**raad13** · 11-03-2014 10:39 AM

المشاركة الأصلية كتبت بواسطة rock82egy

ممكن ياباشا تقلي التوكيل كلمك امتي علشان يقلك ان الاستلام النهارده

اصلي المفروض كنت استلم امبارح بس الورق كان ليه مخلصش

فقالولي حنحاول نسلمك النهارده برضه

والف الف مبروك مقدماً

انا الي كلمتهم عشان اسأل عن حجزي قالي عندنا واحدة بترولي لو عايزها قلتله قشطة بس لما روحت قالي المكان عندنا زحمة و بنسلم ناس كتيرة فهنسلمك العربية بعد يومين ورقها خلصان

**raad13** · 11-03-2014 10:45 AM

المشاركة الأصلية كتبت بواسطة motaz younis

الف الف الف مبروك .. ربنا يكفيك شرها ويديك خيرها يارب .. بس بعد اذنك عاوز اعرف انت ليه اخترت ال 301 بالذات .. اصل انا ناوى اشترى الفترة اللى جايه ومحتار لسه ..

الله يبارك فيك يا باشا هو انا كان معايا في حدود 130 ألف و طبعا مفيش عربية في السعر ده افضل من البيجو