الموضوع: نكمل الحيرة : تورانزا او my-02 مقاس 205-16 , ولا ادرينالين 195-15 ؟

المشاركة الأصلية كتبت بواسطة تامر.محمد

انا معايا حاليا my-01
بس على جنط 16
ممتاز في الادء , بس ناااااااااااااشف

أمس السبت جمعتني مكالمة هاتفية طويلة مع عمرو بدوي (صاحب مركز عمرو بدوي لضبط الزوايا و بيع الإطارات في الحي السابع بمدينة نصر) .

من ضمن اللي قاله و يهم حضرتك يا أ. تامر إنه رشحلي الـ Bridgestone MY-02 و قالي إنه مختلف عن Bridgestone MY-01 كتيير من ناحية النشوفية و كمان الصوت.
سألته إن كان ساق عربيات بالإطار الجديد ، أخبرني إنه ساق على القديم كتير و يعرف كويس أد إيه هو ناشف و صوته عالي و إنه لما ساق على الجديد وجد تحسن كبير في النقطتين دول بالذات و إنه عرف إن بريدجستون اشتغلت جامد على تحسين الإطار بخصوص النشوفية و الصوت العالي بدون الإخلال بأداء الإطار الرياضي ، و النتيجة إن MY-02 مختلف كتير عن MY-01 فهو أحسن أداء و أقل في الصوت و ميعتبرش ناشف قوي ، و أخبرني إنه وصل عنده الإطار ده بمقاسات متعددة و إن المقاس بتاعي موجود عنده و إنتاجه حديث جدا آخر 2013 و هيحسبهولي على 495 جنيه . (في التوكيل 536 جنيه قبل خصم نايل موتورز 5% يعني هيبقى 509 جنيه بعد الخصم).

فروحت المركز بتاعه و شوفت الإطار MY-02 مقاس 14-60-185 و كان إنتاج الأسبوع 44 من عام 2013 يعني أول نوفمبر 2013 (لسه طازة) و مصنوع في تايلاند (فيه مقاسات مصنوعة في إندونيسيا شوفتها بعيني) ، بس محبتش أنفذ علطول كده إلا لما أفكر لأني كنت مستبعده من حساباتي ، و خصوصا إنه إطار Rotation ، فهل حضرتك شايف إن ده يعيبه و لا لأ ؟

و عرفت من الإنترنت إن الـ Bridgestone MY-01 كان الـ Traction B مثل الإطار الجديد .

و هنا يأتي السؤال : أخبار MY-01 اللي معاك إيه من حيث الآتي:
1- ثباته على الطرق الطوالي ؟
2- تعامله مع سطح الطريق: بيمسك في خط مستقيم و لا بيعمل حدفة مثلا ؟
3- أداؤه مع الفرامل من حيث المسافة ؟
3- استجابة عجلة القيادة ؟ ( أقصد مدى دقة التوجيه)
4- تحريك عجلة القيادة ؟ ( لما ركبته حسيت بالطارة تقلت شوية و لا خفت و لا محصلش تغير عن الإطار اللي قبليه)
5- أداؤه في أي مشوار بعد السير عليه مسافة بيتحسن و لا لأ ؟ و لو بيتحسن بيبقى بعد وقت أو مسافة أد إيه تقريبا ؟

إجابة حضرتك على الأسئلة اللي فاتت ديه هتدي للي مجربوش تصور جيد عن قدرات الإطار الجديد MY-02 تسليما بصحة كلام أ. عمرو بدوي و هو إن أداء الجديد أحسن مع نشوفية أقل و صوت مزعج أقل .

و تقبل تحياتي.

المشاركة الأصلية كتبت بواسطة chato_eg

جربت ال MY-01 ماليزى 40 ألف كيلو
حاليا GR-90 يابانى
الMy-01 ( حاليا بقى MY-02 ) أصبح له صوت خفيف أوى فى الفرامل و المنحيات بسرعة عالية بعد 20 ألف كيلو
ال GR-90 بقى له 13 ألف كيلو حتى الآن .. ممتاز
بص .. أنا سواقتى متنوعة .. أوقات هادى أوى ..و أوقات عنيفة أوى .. ال Gr-90 لحد دلوقتى مريحنى جدا .. و هو طرى و هادى و مش فارق عن ال MY-01 فى أى سرعات ...

فى فرق فى الفلوس أقل شوية من 100 جنيه فى الفردة .. لو الفلوس مش هاتقصر .. ريح دماغك و هات ال GR-90 .. لو هاتفرق ... حقيقى ال MY-01 كان كويس جدا

المشاركة الأصلية كتبت بواسطة chato_eg

نشف مع الاستعمال .. بس هو أصلا مش ناشف أوى لدرجة مزعجة .. خصوصا فى أول 20 ألف كيلو متر ..
إنت مشيت بيه كام كيلو فى زمن قد إيه ؟
طبعا الجنط ال 16 بيفرق بشكل واضح جدا فى النشوفية و الطراوة

المشاركة الأصلية كتبت بواسطة chato_eg

إيه يا جدعان موضوع نشوفية ال MY-01 دى .. إنتوا ما جربتوش ميشلان و لا كونتينينتال قبل كدة !!
ال MY-01 مش ناشف خالص و هو جديد .. بعد ال 20 ألف كيلو متر بيبقى أنشف .. لكن مش طوبة .. الكاوتش قام معايا بالواجب بكل إخلاص لغاية نهاية عمره .. يعنى ما اتخرمش خالص مثلا إلا فى الآخر بقى بيتخرم كتير و هنا أدركت إن وجب التغيير بعد 40 ألف كيلو فى 3 سنوات

بالمناسبة ال GR-90 رائع الآن بعد 13 ألف كيلو و جربته فى نزول من المقطم ( طريق ملىء بالمنحيات القاسية ) .. سواءا فى زيادة السرعة على الملف أو الفرملة القاسية على الملف .. رائع جدا .. مافيش أى صوت و لا أى stepping off line .. و لا أى هزة .. رائع فعلا
و تامر تحديدا عارف الميجان شكلها إيه فى المنطقة دى لإنه ركب معايا قبل ما يشترى عربيته
و بلاش .. حد يسأل " أيوة يعنى بسرعة قد إيه " .. لأ بسرعة و الساعة بعد 12 منتصف الليل .. لإنى كنت بأجرب علبة الدركسيون و المقصات الجديدة بصراحة :) .. و تانى .. تامر عارف التجربة شكلها إيه

السلام عليكم يا أ. chato_eg

أنا عندي نفس الحيرة بالضبط اللي عند أ. تامر و حاسس بيه جدا لأني طالب في طقم الإطارات الكامل اللي عايز أشتريه هذه الأيام نفس طلباته و هي:
الراحة 9/10
و الصوت 9/10
و أداء الفرامل 9.5/10
و الثبات 9/10
و دقة توجيه طارة الدركسيون 9/10
و سرعة استجابة الطارة 9/10

سواقتي هادية جدا جوة البلد و في السفر بلتزم بالسرعة القصوى 120 كم/س

سيارتي هاتشباك (الهاتشباك مشهور بالـ understeer) ، و الباور بتاعها زيت بمحرك كهربائي و هو ناعم جدا ، و مع الإطار الحالي مفيش ثقة خالص و أنا سايق على سرعة أعلى من 80 كم/س ؛ فأنا بعاني من الإطار الحالي من ناحية الثبات على الطرق المستقيمة خصوصا لما الهوا بيعاكس من قدام أو بيضرب من الجنب ساعتها بحس بتعويم شديد في مقدمة السيارة و كأنها مش على الأسفلت و لازم أكلبش بإيدي جامد على الطارة و إلا العربية تنقل حارة كاملة (مفيش مبالغة إطلاقا في كلامي) ، لدرجة إني فحصت في التوكيل و بره التوكيل نظام التعليق و علبة الدركسيون و الزوايا و كانت النتيجة في كل مرة مفيش حاجة غلط ( الحمد لله) ، و لما قرأت عن الإطارات كتير على الإنترنت اتعلمت و عرفت دورها الرهيب في ثبات السيارة من عدمه (لما العربية تبقى سليمة ميكانيكيا) .

لفيت كتير و عرفت كل اللي موجود في السوق تقريبا (حوالي 35 موديل) و ديه مشاركتي اللي حطيت فيها خلاصة جولة البحث http://www.nilemotors.net/Nile/23174...post3875466023
و انحصرت المفاضلة على الآتي:
Bridgestone Turanza GR-90 >>> made in Japan >>> 650.0 × 4 = 2600.00
Bridgestone MY-02 >>> made in Thailand >>> 495.0 × 4 = 1980.00
Continental ContiEcoContact 5 >>> made in Czech >>> 460.0 × 4 = 1840.00
Yokohama C.Drive >>> made in Japan >>> 450.0 × 4 = 1800.00
Nokian Line >>> made in Russia >>> 425.0 × 4 = 1700.00

"يوكوهاما سي درايف" : أعضاء هنا في المنتدى بيشكروا جدا فيه ، و نصحني بيه زميل معانا هنا في مشاركة له بموضوع آخر بس قاللي لو تقدر تجيب بريدجستون هاته و متترددش .

"الكونتينينتال إيكو 5" : جنابه طرية جدا جدا (زي الملبن) و نحيفة جدا ، لدرجة إني بقدر أتنيه بكل سهولة بإيدي و ده اللي خلى التجار (حتى اللي بيبيعه) يحذروني من طراوة جنابه المبالغ فيها جدا من وجهة نظرهم .

"MY-02" : لو هيبقى (حقيقي مش إحساس) جيد في الطراوة و الصوت [عبارتك : "إيه يا جدعان موضوع نشوفية ال MY-01 دى .. إنتوا ما جربتوش ميشلان و لا كونتينينتال قبل كدة !!" بتدي أمل إنه يبقى طري أو مش ناشف قوي] ، ساعتها يبقى الإختيار الأمثل لأن سعره في حدود الميزانية (هقولك هي كام بعد كام سطر) .

سيارتي عفشتها ناشفة و ده مخليني مش عايز أتنازل عن الراحة في الإطار الجديد .
و يمكن يا أ. chato_eg تكون عفشة الميجان مساعدة على إحساسك بإن الـ "MY-01" مش ناشف جدا زي ما الناس بتقول ، بس تخيله بقى في عربية سكودا إيه هيكون إحساس اللي راكب ساعتها ، فلو تعرف حد ركبه في سكودا و تعرف رأيه فيه ياريت تنقلنا تجربته .

و في الآخر طبعا الميزانية هي اللي بتحكمك وهي في حالتي 2000 جنيه حد أقصى للطقم (لكن يا سلام لو أقدر أنزل عن كده) ، و مين فينا ميحبش يجيب أحسن حاجة ، بس الأمور بتمشي إنك بتدور على أحسن حاجة في حدود ميزانيتك و قريبة من رقم 1 مش بعيدة عنه بكتير (خصوصا لما رقم 1 ده بيكون سعره مغالى فيه جدا) .

تفتكر يا أ. chato_eg و يا أ. تامر لو إنت مكاني و ده أسلوبك في القيادة و ديه كانت عربيتك و ديه كانت ميزانيتك هتختار إيه من المعروض عليك في السوق .

آسف يا أ. تامر لأني خرجت عن موضوعك الأساسي و هو الإطار المناسب لعربيتك بس أنا قولت أحط حيرتي على حيرتك و يبقى موضوع واحد و نستفيد سوا من خبرات الزملاء الأعضاء و في نفس الوقت ميبقاش فيه تشتيت ليهم بين المواضيع المتشابهة .

تقبلوا تحياتي