الموضوع: نكمل الحيرة : تورانزا او my-02 مقاس 205-16 , ولا ادرينالين 195-15 ؟

المشاركة الأصلية كتبت بواسطة chato_eg

أ. يحى زكريا
مبدئيا طلع الكونتينينتال خالص برة اللعبة .. الطراوة مش تخصص شركات الإطارات الأوروبى ..

ال My-02 لسة واحد زميلى مغيره فى عربيته الميجان و كان راكب عنده بريدجستون ( مش عارف موديله ) قبله ..
يبدو إن الفرق بين القديم و الجديد خرافى .. كل إللى بيركب معاه بيحلف بالكاوتش ال My-02 الجديد .
أعتقد إن ممكن تطمئن جدا من ناحية الراحة بالنسبة لل MY-02
عمره ما هايطلع أسوأ من ال MY-01 و اللى بدوره كان طرى جدا بالمقارنة بالميشلان
توكل على الله

قبل الكلام ، شكرا جدا ليك يا أ. chato_eg على اهتمامك و اقتراحك

أنا فكرت في كلامك كويس و سألت بعض الناس الأخرى و كان مجمل كلامهم إن فيه تحسن ملحوظ في My-02 بس لسه موصلش لمستوى الراحة المنشود و كان الإقتراح إني أمسك العصاية من النص و أجيب يوكوهاما سي درايف و خصوصا إن سعره مش عالي و أداؤه جيد و هادي نوعا ما و طري .
و عملت بنصيحتك و نصيحة معظم الناس و استبعدت الـ Continental ContiEcoContact 5

و بالفعل أمس الأربعاء 19-3-2014 العصر اشتريت طقم كامل (4 إطارات) Yokohama C.Drive من علي صبرة في شارع أحمد سعيد من غير تركيب بـ 450 جنيه للإطار الواحد ، و تاريخ الإنتاج الأسبوع 36 من عام 2013 ، و ركبته في تاير مانيا بمدينة نصر (ناس محترفين جدا و شغلهم فوق الممتاز و متفهمين جدا لمعايير الدقة بتاعتي و ريحوني و عملوا اللي طلبته منهم بابتسامة و من غير جدال أصلا ) .

و تفاصيل التركيب و سعر كل خدمة للطقم كالآتي :
-1- الفك و التركيب بـ 20 جـ (Fit & Fix بـ 40 جـ)
-2- الترصيص بـ 60 جـ (Fit & Fix بـ 40 جـ)
-3- شفط الهواء من الإطار ثم نفخه نيتروجين بـ 20 جـ (Fit & Fix بـ 40 جـ)
-4- بلوف كاتش ألماني بـ 40 جـ (نفس سعر Fit & Fix )
-5- أهم حاجة في الموضوع كله و هو إن العربية تترفع بالكوريك بتاعها علشان البهدلة اللي بتحصل للعربية من تحت بسبب الكفة بتاعة الكوريك التمساح و خصوصا إن عربيتي متصفحة من تحت و الشاسيه مش بيبان و لو رفع بالكوريك التمساح عند العتب هيبوظ الشفة اللي ماشية من قدام لورا بطول العربية (و ده أنا شوفته في أي عربية بتترفع بالكوريك المؤذي ده) ، ولو رفع من عند الشاسيه (بالتخمين كده لمكانه) يبقى هيضر التصفيح و يتنيه أو يكسره لأن نص وزن العربية هيتشال على الحافة المدورة بتاعة كفة الكوريك ، و أ. محمد يسري صاحب المحل وافق بس مقابل زيادة 20 جـ ( و أنا وافقت) لأن الأسطى اللي عنده هو اللي هيرفع عجلة عجلة و بكده عربيتي هتاخد وقت كتير و تعطل شغل العربيات التانية لغاية عربيتي متخلص و ده لأنه عنده عاملين إتنين بس و في المعتاد الشغل بيبقى كالآتي العامل المساعد بيرفع الجنب بالكوريك التمساح و يفك العجلتين و يدخلهم الورشة و هناك يستلمهم العامل الأسطى و يشوف شغله (فك القديم و تركيب الجديد و الترصيص) و ياخدهم العامل المساعد يركبهم في العربية و ينقل للجنب التاني و يكرر العملية (يعني كل واحد بيشوف شغله و بكده يقدر الإتنين يشتغلوا في عربيتين في نفس الوقت) .

إجمالي تكلفة الخدمات 160 جـ ( نفس سعر Fit & Fix بس ماكانوش هيوافقوا على رفع العربية بالكوريك بتاعها و ده ظني أنا و مش هيشفطوا الهواء من الإطار قبل نفخه بالنيتروجين و مش هيستحملوني بحسوكتي أبدا أبدا و الجو كان هيبقى متكهرب و احتمال الكروتة هيبقى كبير) .

و بكده تكون التكلفة النهائية للإطار الجديد 490 جـ للواحد ( 1960 جـ للطقم)


و ده دعاء عن رسول الله يقال عند شراء الجديد و عند الرزق الجديد :
" اللهم إني أسألك من خيره و خير ما صنع له ، و أعوذ بك من شره و شر ما صنع له "
" اللهم بارك لي فيه "
" اللهم أعطني خيره و اصرف عني شره "
" الحمد لله الذي رزقني هذا من غير حول مني و لا قوة "
آمين

قرأت أكتر من مرة إن الإطارات الجديدة بتحتاج مسافة 200 - 500 كم لإزاة الطبقة الخارجية الزلقة من مواد التصنيع و الشمع و خلافه و بعد المسافة ديه توصل لأدائها المعروف الخاص بالتماسك مع الأسفلت و الفرامل ، و قرأت في أكثر من موضع إن اليوكو سي درايف بيحتاج حوالي 1000 كم و بيبقى بعدها أحسن بكتير من الأول .

إنطباعي الأولي لأول 20 كم بعد السير عليه في طريق المطار :
- طري و حنين في الحفر و النقر (فرق كبيييييييييييييييييير عن الإطار القديم)
- صوته أعلى من الإطار القديم ( و ده خلاني أكتشف بعد مرور حوالي 4 سنوات و نص إن الإطار اللي كان راكب فيها إطار شبه صامت ).
- الطارة بقت أخف من الأول و أحسن في دقة التوجيه و أسرع في الأستجابة .
- التماسك على الأسفلت لسه لم يختبر .
- إنطلاق العربية من الثبات أنعم و أحسن .
- التسارع أحسن و أنعم في نفس الوقت (المحرك يبذل مجهود أقل) .
- لاحظت إن قراءة استهلاك البنزين قلت عن الأول و ده محتمل جدا و خصوصا لو مقاومة التدحرج بتاعة اليوكو قليلة عن الماتادور ، بس لسه بدري على الحكم و التسليم بإنه بيوفر في استهلاك البنزين (لما أشوف هيعمل إيه في الـ 2000 كم الأولى ) .

للعلم فقط ، فالإطار القديم كان Matador MP 42 Elite 2 و بياناته Treadwear 240 Traction AA Temperature A و صنع في سلوفاكيا و تاريخ إنتاجه كان الأسبوع 21 من عام 2008 يعني عمره تقريبا 6 سنوات و ديه هي فترة الصلاحية لأي إطار .

سأقوم بكتابة نفس المشاركة في موضوع أنواع و أسعار الكاوتش في مصر لأنه موضوع عام و يفيد الكل .

تقبلوا تحياتي

المشاركة الأصلية كتبت بواسطة abou-yahia

نصبحه

اليوكوهاما فرده محترمه جدا جدا وانا افضلها علي التورنزا عشان سعرها والفروق بينهم مش كبيره

وهي افضل بكتيييير عن الميشلان

مجربها في 3 عربيات مختلفه

حضرتك من الناس اللي قرأت لهم مشاركات عن اليوكوهاما و كانت مشجعة للغاية ، و من كلامك و كلام باقي الزملاء عملت بالنصيحة .

و أتفق معاك إن القيمة مقابل السعر هي اللي ساعدتني في إتخاذ القرار بشراء اليوكوهاما و تفضيله على البريدجستون .
- يوكوهاما سي درايف يأخذ درجة 9/10 و بسعر 1800 جنيه للأربعة
- بريدجستون تورانزا جي آر 90 يأخذ درجة 9.5/10 و بسعر 2600 جنيه للأربعة

و بالحسبة ديه قدرت أتغلب على حيرتي و أحسم أمر الكاوتش .

المشاركة الأصلية كتبت بواسطة تامر.محمد

شكرا على نقل تجربتك يا استاذ يحيى و في انتظار انطباعك بعد مرور اول الف كيلو

و مبروك الكاوتش :)

الله يبارك فيك

بإذن الله هنقل إنطباعي عن الإطار بعد 1500 كم (مش 1000 كم) .

و حضرتك عملت إيه ، ركبت إطار جديد و لا لسه ؟ و هل لاقيت الإطار اللي بتبحث عنه ؟