الموضوع: حل للفرامل الضعيفة؟؟

المشاركة الأصلية كتبت بواسطة d . A .\ ayman

نقول تاني ... الفرامل كويسة جدا جدا ... عيبها الوحيد اللى الناس مش قادرة تفهمة نوعية الكاوتش الجوديير اللى راكب في العربية ... بصراحة من أسوأ الكاوتشات اللى شوفتها في حياتي في الفرامل لأنه بيتزحلق بسهولة على الطريق وده السبب إن الـ abs يشتغل كتير وبيأثر على أداء الفرامل عموما بالسلب

الحل

يا إما تخلص عمرهم وانت ماشي بيهم بالراحة وتكون عارف إن معاك كاوتش مش هايسد في أي فرامل ... يا إما تغيرهم وهم جداد وتبيعهم لأي حد ما عندوش abs أو حتى محلات الكاوتش "بس تقول للي هايشتري منك على العيب ده لأنه عيب جوهري في الكاوتش" وتشتري حاجة تانية كويسة زي بريدجستون مثلا

أعتقد العيب مش فى الكاوتش بقدر ما هو فى الفرامل...الفرامل فعلا ممكن يبقى فيها مشكله لنى لما أشتريت العربيه موديل 2009 كان الكاوتش سيلفر ستون وغيرت بعد كده بالجوود يير والفرق ماكانش كيير بيينهم.

المشاركة الأصلية كتبت بواسطة a_samy

أعتقد العيب مش فى الكاوتش بقدر ما هو فى الفرامل...الفرامل فعلا ممكن يبقى فيها مشكله لنى لما أشتريت العربيه موديل 2009 كان الكاوتش سيلفر ستون وغيرت بعد كده بالجوود يير والفرق ماكانش كيير بيينهم.

لو السلفرستون اللى كان بينزل في العربية يبقى مايفرقش برضه عن الجوديير في حاجة ... وعموما هي ماركة مش قد كدة برضه

منظومة الفرامل القصة بتاعتها كلها في إن التيل يقفش على الطنبورة ويمنعها من الحركة تماماً ... والهدف ده لو تم تحقيقة الكاوتش هايتوقف عن الدوران ويبدأ عملية الزحف على الطريق بفعل القصور الذاتي لغاية ما العربية تقف ... مسافة التوقف في الحالة دي متوقفة على جودة الكاوتش اللى راكب في العربية فقط لا غير


الهدف ده بيتحقق في البروتون برضه عادي ... ولكن لأن البروتون فيها abs ... وده معمول مخصوص عشان العجل ما يزحفش على الأرض لمزيد من السيطرة على السيارة ... يبقى أول ما السينسور بتاع الـ abs هايحس إن العجل هايزحف يقوم فاصل نظام الفرامل ويرجع يشغله تاني في أقل من الثانية

كنا قايلين فوق إن العجل الوحش هايزحف كتير لغاية ما العربية تقف ... وبالمثل هنا العجل الوحش الـ abs هايفصل بسببه نظام الفرامل كتير عشان مايزحفش خالص ,,, وتكون النتيجة إن نظام الفرامل ولا كأنه شغال أصلا لأن الـ abs بيشتغل كتير

...

الناس اللى نفسها تجرب نظام الفرامل عامل إزاي بالفعل ... ممكن تفصل فيوز الـ abs وتجرب تمشي بسرعة متوسطة وبعد كدة تضرب فرامل جامدة فجائية .. هايلاقوا إن الفرامل قفشت على العجل ووقفته تماما زيها زي أي فرامل محترمة .. بس طبعا العجل هايتزحلق على الأرض مسافة لا بأس بها لغاية ما يقف وهاتكون العربية خارج نطاق السيطرة طول مسافة التزحلق

الفرامل تبقى وحشة لو أنا ضغطت على دواسة الفرامل لغاية آخر الأرضية ولاقيت إن الدورة فيها هواء مثلا والتيل مش بيقفش على الطنابير إلا بضعف شديد أو لاقيت مافيش استجابة تذكر من الأصل ... وفي الحالة الـ abs مش هايشتغل أساساً لأن العجل لم يتوقف عن الدوران والسنسور بتاعه لم يسجل إن العجل توقف عن الدوران