الموضوع: الموضوع ده حرام ولا ايه !!

المشاركة الأصلية كتبت بواسطة ahmed_adham

حضرتك بتسميه حق ازاي وهوه مخالف مخالفه صريحه للقانون؟ الاجازه اللي حضرتك بتتكلم عنها لما النيابه مثلا تطلب وكيل نيابه وتعلن ان الاولويه هتكون للتقدير الاعلى وانا اكون جايب امتياز وياخدو واحد جايب جيد جدا في الحاله دي فعلا الواسطه حلال مش متأكد بقى ان كانت الواسطه اللي ببلاش اللي حلال ولا اللي بفلوس بس.

لكن حضرتك هنا شايفه حق عشان القانون مش عاجبك وبالتالي قياسا على كده كل واحد تقع عليه اي مخالفه لأي سبب ولتكن مخالفه سرعه مثلا يدفع رشوه عشان واحد من المرور يغير نمره في صوره العربيه أو يطمس اللوحات في الصوره أو يخفي الصوره من الاساس أو أي طريقه تانيه لابعاد المخالفه عن من ارتكبها.

أنا زي حضرتك شايف ان ايراد جمارك السيارات (2 مليار جنيه سنويه) ممكن تدبيره من مورد اخر أو حتى تدبير نصه وتخفيف الجمارك للنص ومقابل كده يبقى فيه حد ادنى معقول لعدد السنين اللي تكون فيهم السياره صالحه للسير أو على الاقل رفع معايير الموافقه على صلاحيه السيارات للسير لأن فيه بالفعل هياكل سيارات كل اللي فيها هيكل وموتور وفتيس وكنبه واسمها سياره وماشيه في الشارع بدون لمبه اشاره حتى. ولكن طالما القانون قائم يبقى التحايل على القانون غير مقبول شكلا وموضوعا.

انا مش شايف انها عادي عشان انا مش عاجبني القانون
انا شايف انها عادي لان هو ده الواقع
العربية فعلا مستعملة والقانون بيخفض الجمارك للمستعمل بالفعل واشتراط المالك الاول ده هو الزيتونة في الموضوع كله

طب وايه رأي حضرتك في اللي بيتعين في النيابة بجيد بالرفع وبيكون شايل مواد واحيانا ساقط سنين وزمان كان بمقبول لمجرد ان والده او حد من قرايبة قاضي ؟

والمخالفات المرورية بالنسبة للفئات جيش وشرطة وقضا وخلافه والوسايط بتتشال وانت قاعد في المكتب بتشرب فنجان قهوة

وفيه ناس شايفه في الحالات دي انه حقهم وحلالي بلالي ؟

ومرة تانية انا مش بقول ان طالما دول غلط فالكل يمشي غلط لاني شايف في الحوار ده انه مش غلط خالص

انا شايف يا جماعه إن كلكم ناس محترمه سواء اللي قال ان الموضوع ده صح أو اللي شايفه غلط أو حتى اللي قال في حقي كلام مش كويس
بس انا كل اللي نفسي فيه اركب عربيه كويسه بتكاليف قليله زي كل الناس
ولو الموضوع ده لو فيه شبهة حرام حتى لو كان حقي فربنا يعوضني خير والحمد لله على كل شئ
ومتشكر على تفاعلكم جميعا واسف لو كان حد زعل من حد بسببي