طيب معلش استحملنى .. ايه حكاية الطنابير اللى بتخلص بسرعة دى !!كلام تمام
العربية كويسة جدا في فئتها السعرية وتقفيلها كويس جدا جدا بالنسبة لسعرها بل أفضل من عربيات كتير كوري وسعرها أغلى منها
العيوب اللى حضرتك بتقول عليها
يعني مثلا زراير المالتي في الدركسيون ساعات بتعلق ودي بتكون مشكلة نظافة فقط لا أكثر عيبها إن لما التراب بيدخلها بيتسبب في كدة بجيب سبراي بتاع تنظيف الإلكترونيات وبرش منه عليها بحيث يدخل لجواها وبتقعد فترة كتير كويسة من غير أي تعليق
الريموت علق معايا فعلا يمكن مرة أو اثنين من ساعة ما جبتها بس ثواني فقط ويلقط على طول بعدها
نيجي بقى للفرامل ... الفرامل كويسة جدا جدا ... عيبها الوحيد اللى الناس مش قادرة تفهمة نوعية الكاوتش الجوديير اللى راكب في العربية ... بصراحة من أسوأ الكاوتشات اللى شوفتها في حياتي في الفرامل في الأول بيكون كويس وهو زيرو بعد كدة بيتزحلق بسهولة شديدة على الطريق وده بيسبب إن الـ abs يشتغل كتير وبيأثر على أداء الفرامل عموما بالسلب
الواحد يا إما ياخد عمرهم وهو ماشي بيهم بالراحة ويكون عارف إن معاه كاوتش مش هايسد في أي فرامل ... يا إما يغيرهم وهم جداد ويبيعهم لأي حد ما عندوش abs أو حتى محلات الكاوتش ويشتري حاجة تانية كويسة
الباور مش وحش .. أنا بركب سوزوكي ألتو ودي الباور بتاعها كهربا وياباني ومش بحس بضيق من الباور لما بركب البيرسونا .. بس هو أتقل حاجة طفيفة للأمانة
استهلاك البنزين جوة البلد في سواقة مختلطة ممكن تعمل 200 - 220 كيلومتر / 20 لتر ... لو سواقة في زحمة شديدة ممكن تنزل لغاية 180 - 200 ك / 20 لتر ... لو في السفر سرعة ثابتة 100 ك / س مثلا .. بتعلى لغاية 270 - 300 ك / 20 لتر ... التكييف مش بيفرق معايا خالص في استلاك الوقود سواء شغال أو مطفي
قطع الغيار موجودة برة التوكيل عند بعض التجار وفي ناس بتوع استيراد شغالين فيها بس مش كتير طبعا زي عربيات تانية بس معقولة
في الفئة الشعرية دي مافيش أفضل منها أعتقد ... هي والبيجو 301 والنيسان صني في سلة واحدة مع اختلاف الأذواق
وربنا يوفقك للخير
المفضلات