الموضوع: أرجو الإفادة عن بعض فنيات القيادة

المشاركة الأصلية كتبت بواسطة alalfi

السلام عليكم
انا مش عارف بصراحة إستفساري محله القسم ده ولا قسم تاني فمعلهش أعذروني
عموماً انا كنت مش بعرف أسوق غير الأتوماتيك وبعدين إتعلمت مانيوال من حوالي سنة ومن أول يوم في تعلم المانيوال إتعودت على 3 حاجات مش عارف صح ولا غلط .

1- مبعرفش أدوس فرامل إلا لما أدوس ديبرياج سواء كنت داخل على مطب أو على تقاطع أو إشارة أو ملف .. يعني لو بدوس فرامل لمجرد التهدئة البسيطة وهستمر على نفس الغيار أو للتهدئة الشديدة أو للتوقف ... وطبعاً في الغالب بسيب العربية على الغيار لحد ما تهدي وبعد كده أغير أو أمور على حسب .

لو حضرتك داخل على مطب والسرعة مثلا 80 كيلو وانتا على الرابع طبعا فنصيحة مور العربية وارفع رجلك من على البنزين وغمز فرامل فقط يعنى تدوس وترفع الى ان تصل الى المطب دوس ديبراج وانقل على الثانى وعدى المطب واتوكل على الله**

2- لما أكون على الرابع مثلاً وأهدي السرعة وهنزل للتالت بنزل مباشرة من غير ما أمور غالباً وكذلك الحال من التاني للأول . طبعاً من الخامس للرابع ومن الرابع أو التالت للتاني غصب عني بعدي على المور وطبعاً بدوس دبرياج وفرملة علشان أهدي وأنزل بالغيار بعد ما أهدي (يعني غيار عكس).

لو كنت على الرابع وعاوز تهدى مور العربية وضغط خفيف على الفرامل على حسب الحالة عاوز تمشى دوس ديبرياج وانقل على الغيار المناسب الثانى او الثالث وانطلق**

3- في الزحمة وعلى الكباري لما يكون الطريق واقف في الغالب بكتف العربية بالدبرياج .. يعني نص كبس دبرياج وسنة بنزين .. علشان العربية متبطلش مني ..

كدا غلط الاصطوانه عمرة بيقل بالضغط المتوسط دا بلاش لو فى الزحمة خليك على الأول وسنة بنزين ورجلك على الديبرياج بدون ضغط لتلافى الاستصتدام ** حيبقى ديبرياج كامل وفرامل كامله

هل الثلاث أشياء دي عادية مفيش منها ضرر ولا فيها ضرر ... ولو فيها ضرر إيه هي أضرار كل واحد منها .. وإزاي أكتشف الأضرار دي لأني بقالي سنة بسوق مانيوال وبعمل الحاجات دي بصفة مستمرة ...

وجزاكم الله خير

استمتع بالقيادة بهدوؤ اعصابك ولو لاقيت حد حينرفزك انصحك اركن وخليه يطير بلاش ممكن العصبية من الغير توقعك فى مشكلة يضحك هو وتندم انت**

المشاركة الأصلية كتبت بواسطة borio1704

ما تدوسش دبرياج إلا لو حسيت إن العربية هتبطل...

وزي ما الإخوة الزملاء قالولك... الفرامل كده بتبقى أحسن لو عايز تهدي... ولو عندك مسافة كافية قدامك ممكن ما تستخدمش الفرامل أصلا وتعتمد على "فرامل الموتور engine break"

إزاي؟؟؟

مجرد إنك تشيل رجلك من على جميع الدواسات وانت ماشي هيخلي العربية تهدي لوحدها..

على فكرة... الطريقة دي بتوفر جدا في البنزين... لإن العربية ماشية من غير ولا نقطة بنزين.. وسرعة العربية هي اللي بتحرك الموتور.

لو اتعودت على الطريقة دي هتتحكم في عربيتك بطريقة أحسن بكتير...


بس ابقى استخدمها على السرعات العالية شوية ... أو بمعنى أصح.. مع تعشيق الغيارات العالية (ثالث أو رابع).. وبالذات لما يكون الـrpm أقل من 3000... لإن أعلى من كده بيعمل حمل جامد على التروس وقواعد الموتور.




لو لقيت إنك هتهدي جامد .. يعني مثلا تكون ماشي على 80 وتنزل لحد 20 مثلا... ساعتها ممكن تنزل من الرابع إلى الثاني مباشرة... بس طبعا هتضطر تفضل في المور شوية لحد ما توصل للسرعة المناسبة للتاني

الموضوع طبعا معتمد على الطريق قدامك...

لو عندك مسافة كافية إنك تسيب العربية ماشية بالدفع الذاتي لحد ما توصل لحد السرعة اللي انت عايزها.. ساعتها مور وسيب العربية ماشية من غير ما تدوس دبرياج... وبعدين عشق الغيار المناسب لسرعة العربية.

إنما لو بقيت مضطر إنك تفرمل بسرعة ... فالأفضل طبعا إنك تفرمل وانت دايس دبرياج.

بس على فكرة... استخدام الدبرياج كتير بيقصر عمره جدا... لإنه بيشتغل بالاحتكاك .. والاسطوانة معمولة من نفس مادة تيل الفرامل... فحاول بقدر الإمكان تقلل استخدامه




من أكبر الأخطاء اللي بتدمر اسطوانة الدبرياج... ما تحاولش تعملها تاني...

ده غير البنزين اللي بيروح عالأرض بدون داعي.

استخدم فرامل اليد أحسن.. أو الفرامل العادية... ولما تيجي طالع ابقى دوس بنزين ودبرياج على خفيف وبعدين نزل فرامل اليد.


على فكرة... حتى في العربيات الأوتوماتيك... لما تبقى واقف في إشارة أو على كوبري... المفروض إنك تعشق الوضع "n" وتشد فرامل اليد أو تدوس فرامل... لإنك لو سبت الفتيس على "d" فده بيقصر عمر محول العزم "torque converter" ويسخن زيت الفتيس وكمان بيزود استهلاك البنزين جدا.



...

أستاذ ورئيس قسم بجد بارك الله لك وفيك على المعلومات القيمة***