يااااااااااااااه الحمدلله

الوالد توفاه الله وانا عندى سنه يعنى ماافتكر اى موقف له معى وكان مدير فى شركه كبيره عندنا بالمحله واعمامى قاموا بالواجب اخدوا كل حاجه نفضونا الوالد سايبنا انا واخوتى اطفال ربنا يبارك لامى يارب قامت بينا صح

انا ولله الحمد اشتغلت من رابعه ابتدائى ترزى عند اخو المخرج حسن الامام وكنت باخد 5قروش فى الاسبوع كنت بسيبهم فى البيت قال ايه بساعد :)
وبعد كده تقريبا فى اى اجازه صيفيه فى الدراسه اشتغل اى شىء وافتكر وانا فى المرحله الثانويه كنت احب اشترى بنطلون او قميص مكنتش اطلب من الوالده بعد المدرسه انا واصحابى نروح نشيل طوب او رمل وكانت الوالده تعرف وتزعل منى وتقولى ركز فى دراستك وانا اضحك ومن جوايا بقولها اتمنى اعوضك باى شىء اشتغلت تقريبا اكتر من شغلانه واتقنتهم من شغل معمار وشغل تجاره اى حاجه فلوسها حلال وركزت جدا فى مجالى ميكانيكا النسيج ومن فضل الله اكبر شركه المانيه طلبتنى فى دوره تدريبه ومن بعدها فتح الفتاح وحاولت اعوض الوالده على قد ما اقدر كان نفسها فى عمره بس والحمد لله طلعتها 3 عمرات وحججتها ومن دعائها انا عايش بخيرها وبحاول ازرع الاعتماد على النفس فى اولادى ابنى الكبير بحاول معاه اخليه يقدر يعتمد على نفسه مبحبش اشوفه متبهدل بس لازم ازرع فيه الاعتماد على النفس واخليه يشيل شغلى وانا اتابعه واوجهه