الموضوع: تغيير كماليات الفلوانس فيس ليفت دون اخطار مسبق

خبرتى مع الميجان ii و يمكن رجالة الميجان يشاركونى الرأى ان الكماليات غير ثابتة فى الفئة نفسها و تتغير بتغير كل دفعة
بمعنى ساعات المصنع بيبقى عنده كمالية زيادة او كمالية ناقصة و عليه ضغط طلبات فممكن يزود كمالية او ينقص كمالية علشان الانتاج ما يوقفش و يقدر يلتزم بتوريد الطلبات
ايه يا عم هانى الهرى اللى انت بتقوله ده؟
هدى مثال حى على ذلك
الميجان فى دفعات نزلت منها و فئات مكنتش هاى لاين بمراية صالون الكتروكروم اللى بتغمق اتوماتيك مع شدة الضوء!!!!!!
طيب دى المفروض تنزل هاى لاين فقط و لكن المصنع عجز معاه المراية العادية نتيجة مشكلة عند المورد و المصنع كان عنده استوك من المراية الالكتروكروم او المورد كان يقدر يورد الكتروكروم ساعتها و ما يقدرش يورد العادية....المهم المصنع مش هيوقف انتاج علشان مراية صالون و راح مركب المراية الالكتروكروم فى فئات عادية و نزل يا باشا و سلم العربيات يا باشا و يا بخت اللى استلم مع العلم ان السعر ثابت

انا عربيتى كانت 2006 شكل قديم اول فئة اتوماتيك و مع ذلك كانت نازلة بمثبت و محدد سرعة و ده شىء مكنش بينزل غير فى الهاى لاين سنة 2006 !!!!!

نيجى بقى للفلوانس فيس ليفت و نفس اللعب اشتغل:
- دفعات 2013 كان بينزل فيها بصمة واحدة فى اكرة السواق فقط اما دفعات 2014 فبينزل فيها 4 بصمات للأربع ابواب و دى تعتبر زيادة كويسة جداً
- تانى حاجة لاحظتها و هى ان بعض العربيات نازلة بمسند رأس عادى مش رباعى الضبط بغض النظر عن الفئة
- تالت حاجة بقى و دى محدش لاحظها لندرتها بس انا متفوتش عليا.....انا قلتلكم ان التوكيل عرض عليا استلم هاى لاين شامبين فورى فى نوفمبر 2013 بعد ما حجزت الأسود ولكنى تمسكت باللون بتاعى و انتظرت الأسود و استلمته فى فبراير 2014....طبعاً انا ساعتها رحت التوكيل و قعدت افصفص فى الشامبين و اللى لاحظته ان الهاى لاين كان بينزل فيها زرار للباركينج سينسور موجود جنب بكرة ضبط ضوء التابلوه شمال السائق.....الزرار ده فايدته انك لو عايز توقف تنبيه الباركينج سينسور لحظياً بتدوس عليه تلغيه او تدوس عليه مرة تانية تشغله....لاحظ انك لو طفيت العربية و ولعتها تانى يرجع الباركينج سينسور يشتغل تانى و علشان كده بقول الزرار ده بيفصله لحظى....طبعاً لو عايز تلغى الباركينج سينسور خالص لازم من ال settings....هو صحيح انا مش بلغى السينسورز خالص بس اهو برده مفيد وقت الازعاج بدل ما تقعد تلعب فى ال settings....الغريب بقى انى لما استلمت عربيتى مكنش فيها الزرار ده.....شالوه للتوفير !!!!!!!

مستنى اسمع ملاحظاتكم لان قسمنا مبنى على المكاشفة و الصراحة و لو رينو عملت حاجة كويسة بنشجعها و نشكرها و لو وفرت او كان فيه عيب بنوضحه علشان الكل يستفاد.....احنا بنوضح الكويس و الوحش و ده ما يميز وحوش الرينو

تحياتى