الموضوع: فتيسك على ما تعوده.....

نيسان نزلت الفتيس ال xtronic cvt بنظام أسمه adaptive shift control أو إختصاراً asc
أيه بأه حكاية ال asc ده يا خال؟!

ببساطة العربية بتتعرف على طريقة قيادتك فى التسارع....رياضية و لا متحفظة أو ما يطلق عليها economy و الكلام ده بيتخزن فى الكنترول يونيت بتاع الفتيس....أوم إيه بأه لما تيجى تتسارع تانى أو تجرى يقوم الفتيس الذكى يظبط نسب تعشيقه على حسب المعلومات المتخزنة عنده علشان يضاهى نفس نوع القيادة اللى أنت معوده عليها......

يعنى أيه تانى: يعنى لو أنت بتشد و تجرى و تحرق...هتلاقى الفتيس فهم أن الراجل صاحب العربية ده مؤذى و رجلة طارشة على دواسة البنزين فأديله الأداء اللى هو عايزه باللتى هى أحسن و ظبطله الأداء توماتيكى توماتيكى علشان يكون رياضى و ميتعبناش معاه

أما لو اللى كان سايق العربية راجل وقور و رجله هادية على الدواسة قوم الفتيس يخزن المعلومات و قوم أيه بأه ينقل بدرى شوية علشان يريح نفسه كده و يبقى ماشى مفرفش
نفس الشىء لو اللى سايق عايز يوفر فى البنزين و رجله خفيفة....قوم الفتيس ينقل مظبوط علشان يوفرله كوبونات البنزين المدعم و يريحله العربية.....

الخلاصة: فتيسك على ما تعوده.....هتحرق عليه هيفهم أنك عايزه يصحصح معاك و يقرص و أنك راجل مبتهزرش فى الشد.....هتريحه هيفهم أنك عايز سواقة وقار أو economy يغير نسب تعشيقه بناء على هذا الأساس
لاحظ أنه فى حالة تعود مستمر... يعنى بيعمل update لنفسه كل فترة علشان يشوف المتغيرات فى طريقة سواقتك....

تحياتى للجميع