اتجوزت عن حب ولا صالونات وليه؟؟؟

**micromoud** · 11-04-2014 12:39 AM

كله جواز ...

**الاستاذ** · 11-04-2014 12:56 AM

اتجوزت عن طريق مكتب البريد

**محمود سامح** · 11-04-2014 01:23 AM

سيبك من كل كلام الفلاسفة ياما جواز حب فشل فشل زريع فى اقل من سنة وتعالى اسمع بيقولو عن بعض اية وياما جواز صالونات نهاية كانت من كلا الطرفين ( كانت واقعة سوداء اتغشينا فبهم الخ الخ الخ ) ولكن اللى من ناصيبك ها يصيبك بسم الله الرحمن الرحيم الطيبون للطيبات صدق الله العظيم

**Bassem Youssef** · 11-04-2014 01:36 AM

انا شايف انك تأجل الموضوع شويه لحد ما تقف علي ارض صلبه و ظروف البلد تتظبط ده لو اتظبطت يعني

**Ahmed.Essam** · 11-04-2014 01:39 AM

ليا رأي وحاسس انه هينفعك جدا لاني شاب بردو وعارف احساسك ايه

اوعى تتجوز صالونات اوووووووعى
هتقولي ليه طبعا

هقولك لان اللي هتتجوزها صالونات ممكن تكون جميلة وممكن تكون اخلاقها عالية بس لازم تحط في حساباتك انك زي ما انت بتدور على عروسة وبتختار .. العروسة دي بردو انسانة وعاوزة تختار شريك حياتها

بمعنى اخر ممكن يكون اهلها ضاغطين عليها توافق عليك لانك عريس كويس ماديا واجتماعيا واخلاقيا بس كل ده هيبقى مش هيبقى مشكلة الا لو هي نفسها كانت متعلقة بحد تاني او نفسها ترتبط بشخص تاني حتى لو ما يعرفوش بعض اصلا بس البنت ليها مشاعر ورغبة في الاختيار زي الراجل بالظبط

طب الجواز عن طريق الحب
احيانا بيكون ليه مشاكل
طب ليه ؟؟
لان كل طرف بيبقى شايف التاني ملاك ومفيهوش عيوب ومش بيغلط ومش ممكن يعمل حاجة وحشة
فطبعااااا بعد الجواز والمسئوليات و و و و هتلاقي الطريقة اتغيرت زي ممكن شوية عصبية منك او منها شوية زعيق مشاكل من الاهل الخ الخ
طب ايه الحل ؟؟

الحل الجواز عن طريق الاعجاب
او الجواز بالحب وده احسن بس بشرط يكون كل واحد من الطرفين عاقل وفاهم ان الدنيا مش وردية
ويفهم الطرف التاني ان بعد الجواز هيشيلوا مسئولية ومش الحب بس اللي هيخلي الجواز ينجح لازم شوية تحمل وتخطيط مع الحب ده
وخلال فترة الخطوبة محدش من الطرف يتعمد يخفى عيوبه بالعكس لازم يحاول يظهرها عشان كل واحد يعرف التاني على طبيعته الحقيقية ويا تستحمل يا ماتستحملش

لو الجواز بالحب ده كمل بإذن الله على خير لمدة 3او 5 سنين يبقى كده ان شاء الله هينجح مدى الحياة لان زاد على الحب ده كمان حب العشرة والتعود والدفء بين الطرفين

**eng/ahmed_go** · 11-04-2014 01:51 AM

المشاركة الأصلية كتبت بواسطة ahmed.essam

الحل الجواز عن طريق الاعجاب

يا باشا مانتا لو اتجوزت عن طريق الاعجاب فقط بردو ممكن اهل البنت يضغطوا عليها وتوافق بعد اقناعهم ليها

**Ahmed.Essam** · 11-04-2014 02:01 AM

المشاركة الأصلية كتبت بواسطة eng/ahmed_go

يا باشا مانتا لو اتجوزت عن طريق الاعجاب فقط بردو ممكن اهل البنت يضغطوا عليها وتوافق بعد اقناعهم ليها

انا قايل في الاساس الحب
لكن لو مفيش واحدة في بينك وبينها حب فبقول يعني يبقى الاعجاب المبدأي بس من الطرفين مش منك انت لوحدك
يعني مثلا صادفك موقف مع بنت وحسيت انك اتشديت ليها وهي اتشدت ليك فده يخليك تفكر في الخطوبة وخلال الخطوبة تشوف علاقتكم يبقى فيها حب او لا

**S O P H O S** · 17-04-2014 04:28 PM

فكل الاحوال هتتجوز الجواز الي ربنا كاتبه ليك
يعني لا اعتقد هتفكر تسيب جواز حب وتختار جواز صالونات
او العكس

**eng/ahmed_go** · 17-04-2014 05:12 PM

والله يا جماعه انا اكتشفت ان الاهل بيفضلوا جواز الصالونات عن جواز الحب لانهم دايما بيميلوا للمنطق اكتر
فلو عن حب هتلاقي مشاكل كتير عشان تقنع الاهل بالتغاضي عن بعض العيوب اللي هما شايفينها (وانتا مش عايز تشوفها)

**a raafat** · 09-05-2014 11:52 PM

لسه متجوزتش
والصراحه مش متقبل خالص جواز الصالونات ده ومستحيل اعمله حتى لو مش هتجوز مش قادر اتخيل انى ممكن اروح أزور ناس فى بيتهم أول مره فى حياتى اشوفهم عشان اشوف بنتهم اللى اول مره اشوفها ويا عجبتنى يا معجبتنيش ويا انا عجبتها يا معجبتهاش ولو معجبتنيش هيصعب عليا أقول معجبتنيش واكسر بخاطرها وغير كده أخد واحده معرفش ماضيها ايه وتاريخها أيه وكلنا عارفين ان ممكن تبقى واحده قدام اهلها قطه مغمضه لكن فى الجامعه أسف فى اللفظ " مدورها " ده غير فترة الخطوبه اللى هيا تمثيل فى تمثيل ياراجل ربنا يبعدنا عن جواز الصالونات ده -_-
ومش معنى انى ضد جواز الصالونات انى لازم اتجوز عن قصه حب مشتعله زى الافللام لا خالص انا ليا وجهة نظر مختلفه عن طريق حل وسط بين جواز الصالونات والحب وهوه انى أنا اللى الاقى البنت اللى هرتبط بيها بنفسى سواء فى الشغل او النادى او حتى صدفه وأرتاحلها وأكون متأكد انها هيا كمان مرتحالى ومتقبلانى يعنى من الاخر متأكد ان الموضوع هيتم لكن مروحش بيت ناس واقعد معاهم ويا تم يا متمش !

فكرتنى بواحد زميل ليا شخص اجتماعى ويعرف بنات كتير كده وفى منهم بنات محترمه اكيد ومع ذلك لما فكر يتجوز رايح يوصى ستات العيله يدوروله على عروسه جواز صالونات يعنى !! مش فاهم ايه ده يعنى يسيب كل البنات اللى يعرفهم وعارفهم مزاياهم وعيوبهم ويروح يلبس فى واحده ميعرفش ماضيها ولا تاريخها !!