بالفيديو: خرطوم مية الردياتير المقطوع فى البيجو 301 (نتيجة سوء تصميم مروحة الردياتير)
فى ناس كتيرة عايزة تعرف إزاى خرطوم مية الردياتير إتقطع و بيكون شكله إيه, فى الفيديو فى تصوير بالكامل للخرطوم المقطوع أثناء تواجدى فى مركز أبو رواش, بالإضافة لإهم النقط خلال تجربتى مع خدمة عملاء بيجو و مركز الصيانة والتى تدل على تدنى مستوى خدمة ما بعد البيع, وعدم تحمل توكيل بيجو مصر للمسؤلية لعيب التصميم فى مروحة الردياتير و إلقاء اللوم على فنى البصمة.
1- بمجرد شرائى للبيجو 301 هاى لاين و ترخيصها إتقطع خرطوم مية الردياتير بسبب تصميم الإطار الخارجى لمروحة الردياتير واللى بيحتوى على زاوية منفرجه حاده - زى ما هاتشوفوا فى الفيديو - إتسببت فى قطع الخرطوم لما تم إزاحته لأخذ بصمة الماتور عند الترخيص.
2- بمجرد إتصالى بخدمة بيجو على 19207 وقولتلهم إن الخرطوم إتقطع - ساعتها ماكنتش عارف إيه السبب - كان اول حاجه قالهالى المهندس أكرم من شركة بيجو "إنت رخصت العربية؟"
* وده معناه إن بالرغم من معرفة الشركة بطبيعة المشكلة و تكرارها, لم تتخذ أى إجراء للتنبيه على العملاء حفاظاَ على حقوقهم و حفاظاَ على سمعتها.
3- تم تحميلى مصاريف الونش و الإصلاح - فى مركز أبو رواش - ورفض تقديم تقرير فنى بطبيعة سبب المشكلة ولم يتم حتى تقديم إعتذار (مجرد إلقاء للوم على فنى الترخيص), وتم إبلاغى إن لو حصل حاجه - لا قدر الله - فى المحرك نتيجة قطع خرطوم مية الرديايتر انا المتحمل للمسؤلية و مصاريف الإصلاح (عشان كده لازم نستمر فى تحركنا الجماعى و الدفاع عن حقنا, لإن مش معقولة العميل يتحمل نتائج عيبوب التصميم).
اقتباس:
نقل العربية بالونش من ميدان الحصرى لمركز أبو رواش : 250 جنيه
* مصاريف الونش - المتعاقد مع شركة بيجو و اللى تم إعطائى رقمه من خلال المهندس أكرم بشركة بيجو - تم دفعها للونش مباشرة مش ضمن فاتورة الإصلاح فى مركز أبو رواش.
اقتباس:
كشف الحساب لإصلاح قطع خرطوم مية الردياتير فى مركز أبو رواش كالأتى:
خرطوم مياه - كوليه مياه وسط : 84 جنيه
مصنعية تغيير خرطوم مياه علوى: 65 جنيه
ضريبة مبيعات: 15 جنيه و عشرة قروش
2 جنيه و اربعين قرش (قطع غيار (م) )
يبقى الإجمالى كله 166 جنيه و خمسون قرشاً
4- الفيديو تم تصويره - بواسطة أخى - أثناء تواجدى بمركز أبو رواش و عند تحدثى مع المهندس مصطفى و المهندس ماهر مدير المركز.
* الفيديو مش طويل لإن اخويا كان بيصوره عشان يدرس إيه اسباب قطع الخرطوم, و يتصادف إن تم تسجيل جزء بسيط - دقيقة واحدة - من مناقشتى للمهندسين فى مركز الصيانة, و اللى إستمرت ساعة ونصف تقريباً.
5- لم تقم شركة بيجو بالإتصال بى قبل شهر من تقديمى للشكوى إليهم من خلال الفيسبوك و إرسال رقمى إليهم, وعند الإتصال قام موظف خدمة العملاء بسؤالى عن مدى رضائى عن مركز أبو رواش, وبعد إجابتى بعدم الرضاء عن معاملة مركز أبو رواش, قام الموظف المحترم بإغلاق الهاتف ولم يتم الإتصال بى من بعدها.
خرطوم مية الردياتير ضرب فى البيجو 301 - أقرأ قبل ما ترخص
إقرأ تفاصيل ما حدث عند ذهابى لمركز خدمة أبو رواش
http://www.youtube.com/watch?v=nkz8nRfsRDc
طبعاً اثناء مشاهدتكم للفيديو هاتسمعوا بعض التبريرات الغريبة زى (يا باشا ده الميكروباص دلوقتى أحسن من العربية - ده فى عربيات بـ 250000 جنيه بتيجى على الونش - العربية جميلة و محققه مبيعات - إلخ) بدل من تحمل المسؤلية.
* فى ناس إستلمت من مركز ابو رواش ولم يتم التنبيه عليهم لمشكلة قطع خرطوم مية الردياتير, بالرغم من تأكيدى عليهم إنهم يلفتوا نظر العملاء الجدد لتجنب نفس المشكلة, ولكن لا حياء و لا حياة فى من تنادى.
بيجو 301..نص الشكوى (شارك برأيك و خد موقف لتحسين خدمة ما بعد البيع و تخفيض أسعار قطع الغيار و المصنعية بما يتوافق مع الفئة السعرية للبيجو 301)
تحياتى للشعب المصرى, وللأمام دائماً
اقتباس:
المشاركة الأصلية كتبت بواسطة ahmed amin
أحنا معانا واحد هنا حصل له نفس مشكلتك,
والعربية أتنقلت لتوكيل بيجو بدون أي مصاريف.
وأتغير له الخرطوم بدون أي مصاريف, وحتي أتغريت له الميه من غير أي تكلفة.
طبعاً التصميم ناس كتير حذرت منه زي ما حضرتك عملت بردودك القديمة, وتشكر علي تحذيرك.
لكن برضه المفروض لما الفني يحرك الخرطوم عشان ياخد البصمة يرجعه زي ماكان والتوكيل مش ملزم أنه يغيرلك الحاجة دي في الضمان لأن مش عيب تصميم بمعني ان الخرطوم بيتقطع لوحده بالأستخدام الشخصي ليك بالعربية.
دا عيب ناتج عن تحريك حاجة من مكانها الطبيعي لمكان أخر, بغض النظر عن الحماية بتاعتها وإن شاء الله دا يتعدل في الموديلات الجاية وكل الناس اللي بتحذر من الموضوع دا عشان الجديد ميقعتش فيه مشكورين علي تنبيهاتهم.
كان ممكن تحاول توصل لدفع نص التكلفة مع التوكيل او متدفعش زي ما حصل قبل كدا مع زميل لينا هنا.
زياريت لو ترفق لنا الفاتورة اللي دفعت بيها المبالغ دي أحب أخد فكرة عنها.
لا شكر على واجب, لكن طبعاً ده عيب فى التصميم و هما ملزمين بتغييره بالكامل على حسابهم و مع تقديم الإعتذار كمان, مافيش حاجه إسمها إن تم إزاحة الخرطوم من مكانه يبقى مش مسؤليتهم, لأ مسؤليتهم بالكامل, وإن شاء الله نشوف راى بيجو فرنسا إيه لما احط الفيديو على صفحتهم قدام المستخدمين بتوعهم, لما يتحط إطار عامل زى الشفرة حوالين المروحة ويتسبب فى قطع الخرطوم.
وفى الأخر ارجع و أقول, مش غريبه إن العربية مادخلتش إختبار الأمان الأوروبى, الله اعلم هاتاخد كام لو دخلت الإختبار, إحتمال ماتعديش زى العربيات الصينى.
الحمد لله مشكلتى مش فى دفع فلوس التصليح, انا جايبها اوفر برايس عشان استلمها فى يومها, لكن بما إن الخطأ من عند الشركة فى تصميم إطار المروحة وعدم تنبيها على العملاء لغاية دلوقتى, تبقى الشركة مسؤلة عن تصليحها مع تقديم الإعتذار, لكن طبعاً إحنا فى مصر, الف مبروك عليكم وإلى الأمام دائماً. تحياتى