الموضوع: الشكل مهم فى الزواج لدرجة ايه؟

بقالى فتره طويلة بدور على عروسة يعنى كذا سنه و طبعا كل الى قابلته كان نظام التقليدى ( الصالونات) و كل البنات الى قابلتهم بالاسلوب ( فوق ال25 بنت) ده معجبونيش ماكنتش فيه قبول او انجذاب و كنت باخد قرار فى المواضيع من اول زياره ده غير ان الوسيط بيدى معلومات غلط اساسا عن الى بيجيبهم او ما بيكونش شافهم من اساسه ....
من ال25 دول خطبت مره كانت متوسطه الشكل بس مش للدرجه الى تبسطنى يعنى نقدر نقول احسن الوحشين و ده خلانى متردد من ناحيتها و مع المشاكل الى حصلت فى الخطوبة قررت افشكل

هل ممكن واحد يتزوج واحده مش مقتنع بشكلها 100% قبل الزواج و يكون مبسوط ؟
هل ممكن حد يلاقى واحده مقبوله الشكل بالاسلوب التقليدى ولا كل الى بيجيوا من النوعيه فقيرين فى الجمال
انا عارف ان الناس هتقول اظفر بذات الدين و اهم حاجه الاخلاق و الشخصيه و كل الكلام الجميل ده و ده انا واخده فى اعتبارى انا بركز فى الدين و الاخلاق و العيله و التعليم بس سؤالى هو عن نقطه القبول لأنى حاولت اتجاهله او يعنى اقول نفس الكلام الى الناس هتقوله الدين و الاخلاق و الادب بس علشان مكانتش ماليه عينى مكنتش مبسوط و لقيت نفسى لا اردايا مش بهتم بيها و مش عايز اكلمها كتيرو مش بجيب هدايا و دايما بفكر فى الفركشة و فسخ الخطوبة بدل ما افكر فى الزواج منها .
انا مسافر خارج مصر و وقتى ضيق و مش متفائل انى ممكن الاقى شىء فى فتره الاجازات
و برضه حوار التواصل مع اى حد ناوى ترتبط بيه على النت و صوتيا بس بيسهل انك تقتنع انه مش هو ده الى انت بتدور عليه ....
انا عمرى دلوقتى تقريبا 28 سنه و بدور على حد مناسب من 3 سنين تقريبا بس كنت مسافر فيهم ....
و الحمد لله ماديا حاليا مستريح يعنى مش حامل هم التكاليف بس الفكره فى انى الاقى الشخص الى يستحق
ساعات بحس انى غلطت لما سافرت قبل ما ارتبط لأن دلوقتى و انا خارج مصر ما بيتعرضش عليا الا ما نقدر نقول عليه ( فرز تانى )
برضه بسأل نفسى هل بعد بهدله الغربه السنين الى فاتت و قرف الكفيل ...الخ علشان اعمل قرشين اجيب منهم متطلبات الحياه الاساسيه اجى فى الاخر و اخد حد مش مقتنع بيه 100% هيعيش عيشه مستريحه على الجاهز ....
الزواج رزق و قضاء و قدر و كل حاجه بس هل لأنه قضاء و قدر و زرق و قسمه و نصيب معناها انى اتزوج واحده مضطرا لأنى ممكن لو استنيت تانى ما لاقيش حاجه عدله او ما الاقيش خالص اساسا ...ولا طالما فى ايدى الاختيار اصبر على امل انى الاقى الى يناسبنى و الى يخلينى مبسوط و اخد المخاطره انى ممكن ما الاقيش فعلا حد تانى ....

منتظر اقتراحاتكم