استفسار عن مشكلة كوردوبا (١٩٩٤-١٤٠٠)

**Ahmedhk** · 20-04-2014 01:56 AM

السلام عليكم
أنا كان حصل معايا مشكلة من فترة تقريبا ٣ شهور كده و هي ان و انا ماشي فجأة بلاقي العربية اكنها هتبطل و تفصل بس الانوار بتفضل شغالة و أحاول ادور متدورش بس بقضل سامع صوت المارش بنفس مستوى الصوت مش بيقل و ده خلاني استبعد البطارية و بعد استمرار المشكلة
ذهبت لبتاع بطاريات و قمت بتنظيف القواشيط و الاسلاك و اتاكدت انهم كلهم تمام بس الموضوع ده مش بيحصل علطول
انا بسيب العربية ٥ ايام عشان بسافر للجامعة لما باجي اسوقها بعد ٥ ايام و هي واقفة بتشتغل معايا تمام و مبيحصلش حاجة طول اليوم ده .
علطول بيحصل ده ثاني يوم اللي خلاني اقول كده انو حصل على مدار ٣ اسابيع نفس الموقف علطول ثاني يوم هو اللي بيحصل كده .
اللي بيحصل بالضبط بكرن ماشي عادي بس بكرن علي سرعة هادئة و فجأة بلاقي العربية اتكتمت و مفيش عزم اجرب ادوس الاقيها فصلت بس النور بيفضل شغال و لما بحاول اشغلها مترضاش ابدا بسمع بس صوت المارش و مبيفصلش بفضل سامعه و بتدور بعديها ب ١٠ دقائق كده .
الفتي اللي سمعته و محتاج آرائكم لو تصادف مع حد نفس المشكلة .

١-أولا واحد قالي ده قعدة الانجشكن و محتاج تتغير عشان فيها تسريب .
(بالفعل جبت واحدة و تم تغييرها لان كان بالفعل فيه تسريب و لكن المشكلة ما زالت موجودة )

٢-مشكلة في المارش و ده مكشفتش عليه خالص لسة .

٣ حاجة في الدينمو او البطارية !!!

٤ - اخر حاجة سمعتها ممكن طرمبة البنزين.

وكمان من الاعراض اللي حصلت مؤخرا و انا ماشي فجأة الار بي ام بينزل مرة واحدة و يطلع تاني و انا ماشي بعد ثانية كده اكنها بتقطع و انا ماشي بس ده حصلت خلال الاسبوع اللي فات بس .
و هل ده ممكن يكون بسبب اني حطيت منظف دورة البنزين اللي بيتحط مع التفويلة شكرا طولت عليكو و في انتظار ردودكم و تجاربكم لو مرت على حد .

وهل ممكن تكون اعراض حاجة من الدبرياج انا جبتو و لسة هغيره!!!

**SYD** · 20-04-2014 02:22 AM

طرمبة

**hossamalsadik** · 20-04-2014 02:56 AM

ديه اعراض طرمبة البنزين
بس ياريت قبل ماتعمل فيها حاجه تتاكد من نضافة فلتر البنزين بردو ممكن يكون مكتوم بسسب الشوائب

**samaty** · 20-04-2014 03:19 AM

كان معايا حكاية زي دي
العربية أوقات تدور من اول تكه وأوقات ما ترضاش تدور خالص
وأحيانا وأنا ماشي تبطل وأدورها مرات تدور ومرات لا ولما اسيبها شوية وأرجع ادورها تدور
ورحت لناس كتير وصرفت فلوس من غير لازمة وسمعت فتي كتير وفي الآخر طلعت فيشة حساس الكرنك بتعلق

**ehab_mansour** · 20-04-2014 02:35 PM

كده الكلام بيقول ان فيه عندك مشكلة مش بتظهر غير مع السخونية .. يعني اعتقد ان و هي بارده مافيش مشكلة

اولا المارش خارج الحسابات تماما لأنه بيلف و انت سامع صوته فملهوش علاقة
ثانيا طرمبة البنزين ممكن تختبرها وقت المشكلة يعني لما مترضاش تدور انزل اكشف الكبوت و فك خرطوم راجع البنزين من مسطرة الرشاشات و افتح كونتاك بس لو نزل بنزين بضغط كويس يبقي مافيش مشكلة من الطلمبة اساسا لو منزلش يبقي طلمبة

و للعلم مقياس كفاءة الطلمبة بيكون بضغطها قوي ولا ضعيف و ده المفروض بيتقاس بعداد بيركب علي الدورة و لكن محدش بيعمل كده اساسا و بيقابله انه لازم ترجع بنزين و ده مقياس من اعتقادي انا و شرحت اسبابه قبل كده

ثالثا اكشف كمبيوتر و شوف هل فيه ايرور لحساس معين ولا كله تمام ؟؟؟

رابعا راجع علي كل وصلات الفاكيوم اللي خارجه من المانيفول تحت البوابة و اتأكد انها سليمة و افحصها و تاكد انها محكمه

خامسا راجع علي الاسبراتير و ضبطه و حالة الوش و الشاكوش و سلوك البوجيهات

سابعا ارجع علي تقسيمه سير الكاتينة

ثامنا راجع علي كل الفيش و الفيوزات و اتاكد انها متثبته كويس و كلبساتها مش مكسورة

معلش انا عددت لك المراجعات فوق و لكن اي حاجه من دول هي سبب مباشر لبرجلة العربية و عدم دوارتها و انا مريت بحالات مشابهه و كان حلولها كما ذكرت فوق

اخر مشكلة مشابهه كان حلها في احدي خراطيم الفاكيوم + تغيير وش و شاكوش الاسبراتير
و الله المستعان

**ehab_mansour** · 20-04-2014 04:16 PM

المشاركة الأصلية كتبت بواسطة ahmedhk

شكرا للرد الرائع
انا هجيب طرمبة بنزين و هقوم بالكشف على كل ما تم ذكره و بشكر حضرتك تاني للرد المتقن .

هل حد هيكون فاتح الاحد او بكرة عشان شم النسيم و لو اه الاقيها عند مين في الاسكندرية .
سيات كوردوبا ١٩٩٤
ماتور ١٤٠٠ سي سي

نصيحة لوجه الله متشتريش طلمبة غير لما تختبرها كما قلت لك سابقا ..
تفك خرطوم الراجع من مسطرة الرشاشات و تفتح كونتاكت لو رجع بنزين بضغط كويس تبقي الطلمبة براءه من الموضوع

و ربك المستعان