طلب عمل قسم جديد خاص بالقيادة الامنه للسيارات وتحذيرات من مخاطر الطرق علي مستوي مصر
السلام عليكم
بصراحة انا اول ايام ليا في المنتدي هنا كنت معرفش اي حاجه فعلا عن العربية من حوالي كام شهر
لكني قضيت فتره في المنتدي هنا وفي غضون شهور تعلمت كثيرا عن كل اجزاء السيارة
ومن خلال علاقاتي مع مهندسين ميكانيكا وميكانيكية ومدربين قيادة اجانب
الحمد لله اصبحت الي حد ما ملم بشكل كبير بهندسة السيارات
لكني قررت ان اتخصص في مجال واحد فقط في السيارات وهو امان السيارات
حسيت انه واجب قومي لازم نساعد بعض فيه لما نسمع الارقام المرعبة لوفايات حوادث السيارات اللي هما اهالينا وحبايبنا
وكمان بسبب المشاهد المهوله اللي بشوفها علي الطرق يوميا من سيارات مقلوبه ووفيات
ومنساش ابدا اني شوفت حادثة مات فيها 14 انسان علي طريق برج العرب وانا راجع من شغلي
والاسعاف حتي عجز علي انه يوصلهم في ظل المرور المتكدسة وناس ماتت بسبب نزيف كان ممكن يتلحق لو وصل بدري للمستشفي
يوميا علي هذا الطريق وغيره عربيات مقلوبه وضحابا
ضحايا اهمال الدوله في الطرق والمرور
ضحايا الجهل بهندسه الامان في السيارات
ضحايا التخلف والغباوة من قائدي المركبات الغير مؤهلين
فقررت اني اتخصص في المجال ده امان الطرق والسيارات
ولو حتي نروح نعلق علامات تحذيرية علي حسابنا
او نبلغ الجهات المختصه او علي اقل القليل نعمل قوائم مرتبه في قسم هنا خاص فقط بالامان ونكتب فيها التحذيرات من المصايب اللي بتحصل في الطرق
بحيث اللي مسافر علي طريق اول مره يروحه يبقي عارف ان عند الكيلو كذا في مطب كذا
او احتماليه سطو من الحرامية او اي حاجه
انا عندي استعداد احضر مواضيع كاملة عن امان السيارات
وازاي نفهم معني عدد نجوم اختبارات الامان
وازاي بعد تحليل اختبار التصادم لسيارتنا اننا نفادي خبطات لتجنب نقط ضعف السيارة
وازاي لازم نبعد عن عربية اسمها لادا والعربيات القديمة التي تتسبب دائما في حوادث
ازاي احافظ علي حياتي وحياه الاخرين
في افلام مجمعه لحوادث رهيبه كانت ممكن متحصلش لو السواق كان عنده خبرة
انا بقترح نجيب الفيديوهات دي ونعلق عليها سوا ونتعلم ازاي نحافظ علي ارواحنا
انا في حاله نفسية سيئه جدا برجاء السادة الاعضاء التعاون والادارة برجاء عمل قسم جديد خاص فقط بالامان
وشكرا وربنا يحفظنا جميعا من الحوادث
