الموضوع: ان شاء الله هحول عربيتى الاوتوماتيك الى مانيوال

عملت العربية والحمد لله بس ناقص شوية حاجات بسيطة
بس تبهدلت بمعنى كلمة اتبهدلت وطلع عينى بسبب غباء الصنايعيه و بتوع قطع الغيار
محدش فاهم حاجه وكله بيعك ومحدش عنده ضمير
معرفتش للاسف اصور ولا صوره
بس هشرح ان شاء الله شرح مفصل للى اتعمل و المشاكل الى قابلتنى عشان لو حدى نوى يعمل العربيه يبقى ياخد باله

اول حاجه خالص هتروح تتفق مع تاجر الاستيراد على القطع الى هتركب
وهى كلتالى :

** فتيس مانوال كامل ودا بيبقى عباره عن الفتيس +العقربه + اتياش النقل +القاعده بتاعة الفتيس المعدنية
و الماستر السفلى بيبقى كمان راكب فيه ومع الماستر فيه خرطوم زيت بلاكور

** ماستر دبرياج العلوى وبيبقى معاه خزنة الزيت عشان الى عند مفيهاش فتحه للدبريج و بتاخد معاه خرطوم زيت الباكم الى بيوصل لقربة الزيت و كمان ماسوره حديد رفيعه بتوصل الزيت للماستر السفلى + المسامير بتاعتة

** عصاية الفتيس بدون الكونصوله لان الكونصوله بتاعتك هتركب زى الفل

** طقم بدالات "3 بدالات" و بتاخد معاهم ماكينة الاستوب بتاعة المانيوال عشان مختلفة عن الاوتوماتيك " بتبقى اطول" و معاهم الصاجة بتاعتهم و المسامير بتاعتهم

** 2 كوبلن مانوال كامل

** ترس فولام بلمسامير بتاعتة و بمسامير طقم الدبرياج

هم حاجه تاخد مسامير اى حاجه بتتفك عشان تركبها عندك لان ابعاد المسامير ممكن بتختلف
مش هتحتاج كونصوله ولا هتحتاج العدادات ولا هتحتاج تغير الردياتير ولا هتحتاج تغير الضفيره او تعدلها او تغير الكنترول زى ما تجار الاستيراد كانو بيفتوا
المشاكل الى حصلت :

*** ترس الفولام مركبش عندى لان الفتيس كان مفكوك من ماكينة 2000
الميكانيكى بذكائة راح وسع الفتحه الى فى النص عشان تركب عند الخراط و بعد ما وسعها مركبتش المسامير
رحت رايح مرجعهوله و جايب ترس فولام نوبيرا
فإتاكد ان ابعاد المسامير واحده بانك تقيس الترس بتاعك على الترس الجديد المانوال

*** تانى مشكله وهى ان مسامير الفولام كانت قصيره ومركبتش لن الترس المانوال سمكه اكبر
روحت دوخت عليهم واضطريت اجبهم جداد عشان اخلص و جبت ال 6 مسامير ب 50 جنية !!!!!!! :(
فأتاكد ان المسامير تاخدها من تاجر الاستيراد و يكونوا اطول من الى طالعين من عندك و يكونوا بنفس السن

*** اتاكد ان الكبالن السن التخين مش الرفيع لان تاجر الاستيراد غلط وجبلى بتوع الانوس و كنت عاوز اقوله @#@^%$&@



التركيب بقى :
كله هيركب ان شاء الله زى الفل و مفيش مشاكل لان الموضوع سهل
هتفك البدالات القديمة و هتفك الكونصوله الى فى النص عشان تخلع عصاية الاوتو و تركب الجديد و ترجع الفيبر مكانة
و هتركب الماستر بتاع الدبرياج العلوى و هو ليه مكان مطبب
هتفك الفتيس الاوتو و فردتين الكاوتش عشان تطلع الكوبلنين وتركب ترس الفولام و طقم الدبرياج والبليه الجديده جوه الفتيس و تركب الفتيس المانوال
وتضبط اتياش النقل مع العصايه

تركب خزنة زيت الباكم و تحط زيت جديد و تاخد هوا من مسمار زيت الباكم الموجود فى الماستر السفلى
هتركب الكبالن و تقفل العجل

هتفك مسمار الى فى اعلى الفتيس وتحط الزيت الجديد " 1.8" لتر


وهنا نيجى لاخر حاجه
هتيجى تدور العربيه مش هتدور!!
تدور ,, برده مش هتدور
ليه بقى ؟
لان العربيه كانت اوتو و الكنترول فاهم انها ليه اوتو
وعان تدور العربيه وهى اوتو فلازم تبقى على ال n او ال p ولو الفتيس على اى نقله تانيو زى ال d هيعمل لوك ومش هتدور
فهنا هتلاقى فيشه فىها 4 اطراف كانت راكبة فى الفتيس الاوتو
طرفين منها بتوصلهم فى الفتيس المانوال عشان تنور لما ترجع مارشدير اللمبة بتاعه الفانوس الى ورا
و طرفين عشان العربيه تدور "" هصور طريقة توصلهم ان شاء الله"



الحجات الى هتشتريها جديد
طقم دبرياج فالو ب 425
2 لتر زت تروس مانوال
ربع لتر زت باكم dot 4


الميكانيكى خد 400 و الكهربائى خد 20