الموضوع: اخر كلام

السيتروين عربيه كويسه بالنسبه لسعرها وشكلها شيك (عربيه حلوه بصراحه)
بس مفيش حاجه كامله للاسف
سعر اعادة بيع في الارض
توكيل زي معظم التوكيلات في مصر في الضياع (بس تفرق هنا بقى ان السيتروين محدش بيفهم فيها بره زي الكوري والياباني وقطع غيارها مش متوفره بره التوكيل بسهوله يعنى هتبقى مجبر على التعامل مع التوكيل بشكل اكبر وده مش كويس خاصه مع عز العرب)

المشاركة الأصلية كتبت بواسطة م أحمد

العربية توأم البيجو لانهم اصبحو شركة واحدة

أنا شوفت البيجو على موقع كونتاكت زمان قبل انتشارها الكبير اليومين دول و توقعت العربية دى تعمل شغل جامد

بالنسبة للستروين سى اليزيه اتوقع انها تشذ عن كل ماركات الستروين فى موضوع اعادة البيع ، و ابسط حاجة هى هى البيجو و بسعر اقل 5 آلاف جنيه

أنا عارف ان هي والبيجو 301 عربيه واحده والاتنين كويسين زي ما أنا قلت
بس الفرنساوي كله أعاده البيع بتاعه في الارض ومش اي حد بيفهم في صيانته وقطع غياره مش متوفره بشكل كبير زي الياباني والكوري
وأحب أنبهك لنقطه تانيه أن حتى قطع الغيار الاستيراد بالنسبه للعربيتين دول بالتحديد في الغالب مش هتكون متوفره بشكل كبير وده يرجع لان العربيتين دول مش نازلين غير للدول الناميه زي شرق اوربا وشمال افريقيا والشرق الاوسط (يعني مفيش سي اليزيه في فرنسا ولا في 301 في المانيا مثلاً)
وفي الغالب تجار قطع الغيار الاستيراد بيجيبوا الحاجه من دول اوروبا الغربيه وامريكا اللي اساساً العربيات دي منزلتش فيها
ولو حتى جابوا لها قطع غيار هتبقى من بلاد ناميه زي حالاتنا ودول طبعاً زينا كده مش بيرموا حاجه غير لما بيكونوا جابوا أخرها يعني من الاخر هتبقى قطع غيار منتهيه
عشان كده أنا بتوقع ان اللي هيشتري العربيتين دول هيبقى تحت ضرس الوكيل بشكل مستمر لان قطع الغيار الجديده بره التوكيل غير منتشره والاستيراد زي موضحتلك كده وجهة نظري فيه
عشان كده انا راي انك تفكر في حاجه تانيه أفضل
وبرشح لك اللانسر الشارك لو اسعار قطع الغيار مش فارقه معاك عشان قطع غيارها غاليه شويه
أو الكيا ريو عربيه كويسه أوي اعاده بيع كويسه قطع غيار كويسه ورخيصه وكيل افضل من عز العرب كتير