الموضوع: طلمبة الباور2

السلام عليكم.
أخوانى الاعزاء ف قسم الشيرى a11 .
منذ فترة وطلمبة الباور مش بتصرخ لأ بتزن طول ما العربية دايرة وبتزيد الزنة مع حركة الدركسيون روحت للميكانيكى قالى دى الطلمبة بتجيب اخرها حاول تغيرها ف اقرب فرصة!!!.
وبدأت اسأل عن الاسعار وايه اللى ممكن يركب عليها من الماركات الاخرى ونجهز نفسنا لتغييرها.
وفى يوم قولت لنفسى ما هى بايظة بايظة طيب ما أحلها وأشوف ايه اللى فيها جايز أعرف أصلحها ما هى طلمبة زيت ترسية عادية.
وحليتها فعلا من العربية وغسلتها وتم فكها من بعضها وفعلا وجدتها طلمبة ترسية عادية جدا عبارة عن روتر وشرائح بتتحرك داخل الروتر وكيسنج بيضاوى وغطاء حاكم... (كل ده من الصلب داخل جسم الومونيوم) لعمل ضغط عالى وبلف رليف بسوسته لما الدركسيون يوصل للاخر يفتح.. وسيفتى بلف لما يحصل سدد اوأي حاجة غير عادية فى الديرة ما تنفجرش والخراطيم تضرب... ولقيتها نظيفة وزى الفل ما فيهاش اى حاجة غير عادية ولا متآكلة ولا خلوصاتها واسعة ولا اى حاجة.
نضفتها من الداخل وغيرت الجوانات الكاوتش ربما تكون بتسرب وقفلتها زي ما كانت وركبتها و قلت يمكن النظافة تعمل حاجة وغيرت الخراطيم الداخل والخارج قولت يمكن بتاخد هواء وده اللى بيعمل الصوت.
مليت الديرة زيت ودورت العربية ... حلوه... بعد عشر دقايق عادت الزنة !!! وكأننا ما عملناش حاجة او ان ده مش العيب اللى بندور عليه!!!.
كده عملت كل حاجة... وفاضل حاجة واحدة بس ما بصناش عليها فى دايرة الباور وهى اننا ننضف المصفاة اللى ف تنك الزيت.
فكيت علبة الزيت بعد ما فضينا الزيت منها وحاولت انضف المصفى وهى داخل العلبة وما امكنش ابدا... هى ليها كلبسين بلاستك وانا بأحاول فكهم وسحب المصفى اتكسرو وسحبت المصفى وكانت عبارة عن مصفاه بلاستك ومسدودة جزئيا.
ركبت العلبة من غيرها ومليت زيت ودورت العربية وكانت المفجأه.

الزنة راحت نهائيا وأصبح صوت الطلمبة ناعم جدا وكأنها جديدة !!!.

الحمدلله

قولت انتظر شوية قبل ما احكيلكم على التجربة يمكن ترجع تانى.
والحمدلله بقالها 10 ايام فيهم سفر اسكندرية والعودة وشغالة وتمام.
اسف على الاطالة بس حبيت احكى المعاناه من الاول وبالتفصيل لانى تعبت معاها وكنت ح اغير الطلمبة وهى سليمة وما فيهاش حاجة و حتى تعم الفائدة على الجميع
والزنة دى سمعتها عند الاستاذ ممدوح فى عربيته فا ممكن لو شال المصفى دى تروح الزنة.
والله المستعان