انا لسه مسقتش العربية رغم انها مع كذا صديق ليا, و هقولك انطبعاتى و السمعتوا سواق منهم او من السوق:

العربية ديه بصراحة اول مانزلت كنت منبهر بيها, خصوصا لما شفت واحد بيجرى بيها على طريق الاسكندرية من سنة باسلوب جزارة, غرز شديدة و على 160 بيكبس لقيته فرق جامد , فأعتقد ان مقارنة بالمواتير ال 1600 غير المتربنة فالماتور ادائه مرضى جدا.

صديقى شد مع صاحبه معاه مرسيدس c 180 2010 او 2011 و طلع منوا بالفوكاس.

العربية يعيبها فى نظرى الشنطة الخلفية ضيقة الى حد كبير, و الكنبة نص و نص.

المشكلة الحقيقة بأه والعليها كلام فعلى هو الفتيس.

زميلة عمل جابت العربية ديه اول مانزلت 2012, و بالفعل قابلت مشاكل بالفتيس و عملت صيانة هناك على حساب التوكيل, بس معرفش تفاصيل المشكلة و لكنها كانت موضوع كبير مش حاجة بسيطة.

زميل و صديق جاب موديل 2013 (ده الطلع من المرسيدس), و لغاية دلوقتى معندهوش شكوى غير احساسه بنقلات الفتيس بوصف قريب من الناس بتوصفه فى المنتدى هنا.

صديق لسه جايب 2014 من شهر ,لسه بيحكم عليها بس فى انطباع عام بالارتياح منها, انا كنت قلقته من موضوع الفتيس, و ليه صديق كان قله ان حصل تعديل فى الفتيس فى موديلات 2014 لتلافى الشكوى الفى الموديلات الأقدم.

مع سؤالى لفرج (اشهر ورشة للفورد العند الجراج), و سامى فخرى و هو من اشهر محلات قطع غيار فورد, ال 2 مشكروش فى الموديل ده عشان حوار لفتيس و بيقولوا الموديل الأقدم (المعايا) أكثر اعتمادية و الله أعلم.

ديه معلوماتى عن العربية, و هعمل محاولة لقيادتها قريب ان شاء الله