الموضوع: أروح لمين بتاع تكييف ... حد من الاخر

أولا شكرا لكل واحد ساعدني هنا ... بصراحة يا رجالة دايما بتسدوا وقت الحاجة ... ربنا يباركلكوا
انا بعد ما أستاذ محمد عبد الجليل قال علي مركز cool air .... وانا كنت سمعت عنه من زمان ... بتاع 3 سنين وانا معايا رقمهم بس كنت ناسيهم
المهم يوم الأتنين اللي فات لما كنت نازل أعمله كلمتهم وبصراحة ناس محترمين جدا جدا
كنت بكلمه أسأل لو في كباس أصلا ولا لأ وهيتكلف كام عشان اعمل حسابي
قالي احنا لازم نعمل الصح وهنغير كباس وأسبانشن وبلوف ونغسل سربنتينة داخلية
كان عنده 2 كباس فكنت بحسب معاه التكلفة
هو الشحن والحاجات ده كلها من غير كباس قالي تقريبا 1100 ... مش فاكر بصراحة أرقام بالظبط .... لأني من بعد الرقم ده انا وقفت عن التفكير .... انا أصلا عامل حسابي بالكتير قوي قوي هدفع 1500
كدة لو جبت كباس استيراد وطلع مش تمام يبقي لبست !
المهم عنده كباس جديد صيني بضمان هو بيستورده ... قالي شغال فيه بقاله 8 سنين وزي الفل ... انا من كلامه واثق فيه جدا ... وكون انه قال صيني فده ريحني
الكباس ده كان ب 1700 تقريبا
ولو ال GM قالي في رينج ال 2400 !!
المهم قلتله انا فلوسي كدة مش جاهزة ... وقبل ما هاجي لحضرتك هكلمك ... بس أجهز الفلوس
طبعا انا كدة لو عملت الليلة ده صح يبقي كدة هخشلي في 3500 جنيه !!!!! ... حرام طبعا ... انا جايب مكنة كاملة بالسعر ده
قولت أروح للمطراوي أشوف ايه الدنيا علي حسب توصية أستاذ أدوارد وكذا حد تاني
اول حاجة روحت لهشام ابراهيم في شارع دمشق أسأله فين المطراوي .... أستاذ هشام من أكتر الناس هناك اللي بحترمهم جدا وحد ثقة بالنسبالي جدااااااااااااااا
وصفلي فين بالظبط المكان
بعدها سألته هيبقي عنده كباس ؟
قالي مانا عندي .... عنده ال GM ب 1450 جنيه
قلتله هو سعره ممتاز بصراحة بس انا بقول أشوف استيراد ويكون متظبط
قالي طاب انا عندي حدا علي ضمانتي بتاع تكييف .... انا أي حاجة بيقولها الراجل ده بصدقه علي طول
وصفلي مكانه طلع في الشراع اللي وراه علي طول .... ورا الحرية مول
روحت الراجل كشف وعمل كل حاجة ... وبعد ما كبسنا قالي هو انا مش هعرف اسمع صوت الكباس غير لو شحنا .... بس انا قلتله غيره انا عايز جديد
هم اللي شغالين هناك ... صاحب المكان ... سيد
وفي 2 كمان شاطرين جدا جدا ... سمير وواحد تاني
وميكانيكي فاهم وسريع جدا اسمه كرم
وكام صبي
كرم فك الكباس بسرعه وفك فلتر الفريون وراه لسيد قاله الفلتر ممتاز متغيروش
جبنا الكباس الجديد ركبنا وغير بلف عالي وواطي وحط فريون r134a
شحنا وانا قاعد جوة حاطت الترمومتر بتفرج لغاية ما وصلت الحرارة 1.9 في الظل
غسل السربنتينه وصلت ل 0.5
كل ده مزودتش بنزين لسة والعربية سلانسيه
خدت العربية سيبتها في السمس شوية وقعد أتكلم معاه كتير
كلمته اني كنت رايح الأول للمراكبي ... ولسة مكملتش ... قالي المراكبي كويس بس في حاجات بتسهي منه وفي عربيات بوظها
وبعد كدة كنت رايح ل cool air قالي الناس ده 100 100 وشغلهم نضيف جدا وشكر فيهم كتير بس غاليين شوية
وبعدها رايح للمطراوي وبرضه فضل يشكر فيه جامد انه فاهم وعنده زمة وشغله نضيف
بصراحة انا أحترم قوي اللي يشكر في غيره وكمان منافس ليه
دخلت أشوف درجة الحرارة والعربية منقوعة في الشمس وانا ظابط المرحة علي 2 .... طلعت الحرارة 3
الراجل بيشحن ب 150
بعد الليلة ده كلها .... عشان هشام حبيبي وسيد كمان طلع حد محترم .... كل اللي دفعته 1550
والتكييف فريزر ..... طلع الأكسبانشن سليم الحمد لله
روحت بالعربية وكان التكييف أداء عالي بس مأثر جدا عالسحب .... عربية 2000cc ومتأثرة بتكييف !!!
تاني ويوم ظهر صوت خشونة غريب كدة ... هو كان بسيط بس زاد تاني يوم
الصوت بالظبط عند rpm 1100 غير كدة مش ظاهر .... وفي ال حتة ده بيبقي السحب ضعيف جدا بعدها العربية بتطير
روحتله قالي ده ممكن بلية أو كباس أو فريون زيادة
أول حاجة عملها ... رمي ميه عالسربنتينة ... الصوت راح نهائي ... قالي فريون زيادة ... نقص منه ... بس للأسف التبريد قل ... راح مزود تاني ... الصوت رجع
فك سير المجموعة وفضل يلف في البلي لغاية ما لقي الدينامو قافش ... حاولت ألفه مافيش خالص ... شوية وفك !!
روحت الحرفيين أجيب واحد بتاه vectra وبعد ما وصلت قولت أشوف حد يحله ... بس وانا هناك لقيت الميكانيكي معاه سماعه ... خدتها وقعدت أسمع كل حاجة ... لقيت الصوت جي مالكباس !!!!!
قولت للميكانيكي ... شوف كدة الصوت جي منين ... قالي اه الكباس فعلا
طاب الدينامو كان قافش .... قالي عادي يا باشا ... عض مرة
المهم قولت فاكس دانامو دلوقتي وهغيره بعدين
رجعت علي سيد .... حكيتله كل حاجة ... قالي انا اللي عندك ده فريون زيادة أو كباس ... لأني لما رميت ميه الصوت راح ... طاب أتصرف
أكتر من ساعة شغالين كلهم فيها يعرفوا العيب
عملوا كل حاجة .... زود فريون وقلل ... فضي فريون خالص وخلاها vacuum وشحن من جديد
زهقوا بصراحة وقالي انا هفك الكباس وهديك الفلوس ... انا بصراحة مش عارف
قولتله طاب ثانية نور تحت بالبلادوث وانزل قولي شايف ايه
هو نور تحت وانا باصص من فوق عالكباس وزودت بنزين .... لقيت الكباس عمال يخبط في القاعدة !!!!!!!!!!!!!!!!!!
طلع في مسمار ناقص في القاعدة ... وفي مسمار مفوت
جاب مسامير وركب وظبط ... كله راح ... ظبطنا فريون وتبريد ... كله زي الفل
اللي حصل بقي ان كان فعلا في فريون زيادة كان محمل عالكباس فكان بيتهز جامد يخبط في القاعدة يعمل صوت
لما كان بيقلل كان بيقلل جامد فكان الصوت بيروح بس التبريد يقل
وفي الأخر جي أساله حسابك كام ... قالي خلاص كدة ده كان شغل ناقص وحسابك كامل
ومشيت
بصراحة ناس زي الفل وفاهمة جدا
لما كنت بدردش معاه كان بيقولي انه مستورد لكباسات كتير
جايب بتاع الأوكتافايا a5 ألماني وعليه ضمان سنه بيبيعه ب 3500 وهو هو بيتباع بره ب 8000 !
وبيركب في الأوكتافيا والباسات والجيتا
وعنده حاجات للمرسيدس
وكباسات دايو وهيونداي

بصراحة من أكتر الناس اللي أرتحت في التعامل معاه وفاهم جدا
هو مكانه الدخله الي قدام بنزينة التعاون ... الشاع اللي علي ناصيته محل المدينة قبل ما توصل للحرية مول في فيلا مهجورة .... هو جوة الفيلا ده
اسمه سيد وده رقمه 01005619802
اللي يحب يروحله يقوله انه جي من طرف جورج بتاع النوبيرا 2000cc الفضي اللي في الزيتون
هيكرمه في السعر .... انما كشغل أعتقد هو كدة كدة شغله نضيف
طولت عليكوا قوي ... بس كان أمانه مني أفيد الناس بكل اللي أعرفه زي ما فادتني

مبروك عليك يا جو... انت تستاهل كل خير

المشاركة الأصلية كتبت بواسطة popahly

مبروك عليك يا جو... انت تستاهل كل خير

تسلم يا باشا الله يكرمك :d

المشاركة الأصلية كتبت بواسطة gelgel2004

الف مبروك يا هندسه
لما ييجى الحر و رمضان يهل
نبقى نصيف معاك شويه :)
دمت بود و شكرا لنقل التجربة...

الله يبارك في حضرتك :d
انا اللي لازم أشكر حضرتك جدااااااااا علي تعبك معانا
في رمضان ان شاء الله تنوروني ونتسحر كلنا :d

ألف مبروك و ربنا يكرمك و يبارك لك في عربيتك.